دروشمی''بژی بەرخۆدانی ڕۆژئاوا'' لە سلێمانی دەنگی دایەوە

بەسەدان هاوڵاتی شاری سلێمانی، لە دژی هێرش و بۆردوومانەکانی دەوڵەتی تورک ڕژانە سەر شەقامەکان و داگیرکاری دەوڵەتی تورکیایان بۆ سەر ڕۆژئاوا، باکورو ڕۆژهەڵاتی سوریا ئیدانە کرد.


هاوڵاتیانی شاری سلێمانی ئەمشەو لە شەقامی سالم''سەهۆڵەکە'' ڕژانە سەر شەقامەکان و هێرشەکانی دەوڵەتی تورکیایان ئیدانە کرد.

خۆپیشاندەران بە جۆش وخرۆشەوە دروشمەکانی'' فاشیست ئەردۆغان، بژی بەرخۆدانی ڕۆژئاوا''یان وتەوە.

ئەبوبەکر مەجید، یەکێک لە ڕێکخەرانی چالاکییەکە وتارێکی پێشکەشکرد و ئاماژەی بەوەکرد، کە ئامانجی دەوڵەتی تورکیا تەنها ڕۆژئاوای کوردستان نییە، بەڵکو ئامانجی کۆمەڵکوژکردنی گەلی کوردە.

داواشی لە هونەرمەند، رۆشنبیران، چالاکوان، کەسایەتی و توێژە جیاجیاکان کرد کە هەڵوێستیان هەبێت دژ بە هێرشەکانی دەوڵەتی تورک.

هەروەها سلێمان عەرەب، نوێنەری پەیەدە لە هەرێمی کوردستان وتارێکی پێشکەشکرد و وتی: با گەلەکەمان بزانێت کە هێرشی دەوڵەتی تورک فشارە بۆ ئەوەی ئێمە ئیرادەی خۆمان تەسلیم بکەین، بەڵام باوەڕمان بە هێزی خۆمان و گەلی خۆمان هەیە و پارێزگاریی لە نرخە مرۆییەکان دەکەین.

وتیشی: ئەم شەڕە شەڕی مان و نەمانە و باوەرمان وایە کە لە ئەنجامی ئەم شەرەدا ستاتۆی ڕۆژئاوای کوردستان دانی پێدا دەنرێت.

ب.ش