دوای كشانەوەی سەدر لە پرۆسەی سیاسی و هەڵوەشاندنەوەی هاوپەیمانیی سێقۆڵیی، پەدەكە خۆی دەگەیەنێتە بەغدا بۆ دەربازبوون لەودۆخە سیاسییەی تێیكەوتووە و وابڕیارە ئەمڕۆ شاندێكی باڵای ئەو حزبە بگاتە بەغدا.
لەگەڵ دەستلەكاركێشانەوەی بەكۆمەڵی ئەندامانی فراكسیۆنی سەدردا لە ئەنجومەنی نوێنەرانی عێراق، هاوپەیمانی سێقۆڵی “سەدر، بارزانی، سوننەكان” هەڵوەشایەوە، كە پێشتر دەیانوێست حكومەتی زۆرینەی نیشتمانی پێكبهێنن.
كشانەوەی سەدر لە پەرلەمان و پێكهێنانی حكومەت، پەدەكەی خستووەتە دۆخێكی ناهەموارەوە، بەو پێیەی ئێستا چوارچێوەی هەماهەنگی هەوڵی پێكهێنانی حكومەت دەدات و پێشتر پەدەكە لە چوارچێوەی هاوپەیمانیی سێقۆڵییدا دروشمی حكومەتی زۆرینەیان بەرزكردوبویەوە.
میدیای فەرمی پەدەكە بڵاویكردەوە، لیژنەیەک بە فەرمانی بارزانی پێکهاتووە، بە مەبەستی دانوستان بۆ پێکھێنانی حکومەتی نوێی عێراق، كە فوئاد حسێن سەرۆکایەتی دەكات و شاخەوان عەبدوڵا و بەنگین رێکانی ئەندامانی لیژنەكەن.
وەك میدیای پەدەكە ڕایگەیاندووە، شاندەکە ئەمڕۆ سەردانی بەغداد دەکات، لەگەڵ لایەنە عێراقییەکان کۆدەبێتەوە و هەموو هەوڵێک بۆ گەیشتن بە ڕێککەوتن و پێکهێنانی حکومەت دەدات.
س.س
