شەممە, 7 يول 2018 – 18:35 ڕۆژنیوز – پەیامنێران
ئێوارەی ئەمڕۆ، بە ‘دەستپێشخەریی بەرەی نیشتمانیی دژی داگیرکاریی’ و بە دروشمی “بۆ دەرەوە بۆ دەرەوە، سوپای تورکیا بۆدەرەوە – ئەردۆغان باش بزانە، قەندیل هێڵی سوورمانە – سوپای تورکی داگیرکەر لە کوردستان بچنەدەر – قەندیل قەڵای بەرخۆدان و فاشیست و تیرۆرست ئەردۆغان”، خۆپیشاندان لە زۆربەی شاروشارۆچکەکانی باشوری کوردستان بەڕێوەچوو.
لە خۆپیشاندانەکاندا هەموو چین و توێژەکان بەشدارییان کرد و دەیان پانکاردیان دژی داگیرکارییەکان بەرزکردەوە.
لە خۆپیشاندانەکەدا منداڵان، ژنان و ژنان و گەنجان بەشدارییان کرد و دروشمەکانی”بۆ دەرەوە بۆ دەرەوە، سوپای تورکیا بۆدەرەوە – ئەردۆغان باش بزانە، قەندیل هێڵی سوورمانە – سوپای تورکی داگیرکەر لە کوردستان بچنەدەر – قەندیل قەڵای بەرخۆدان و فاشیست و تیرۆرست ئەردۆغان”-یان بە یەک دەنگی دەوتەوە.
لە خۆپیشاندانەکاندا بەیاننامەی ‘بەرەی نیشتمانیی دژی داگیرکاریی’ دەخوێندرانەوە.
لە بەیاننامەکەدا هاتووە:”بۆ ڕای گشتی له ناوەوەو ده رەوەی وڵات، بۆ گەلی ئێمە لە باشور وه‌ك هه‌موو ئاگادارن؛ له دۆخی ئێستادا گه‌له‌كه‌مان لە ته‌واوی جوگرافیای سیاسی و كۆمەڵایەتی، زه‌‌مینی وڵاته‌كه‌مان دا، رووبه‌ڕووی دژوارترین پیلانگێڕی داگیركاریی و گێژاو و تەنگژەی دوژمنكارانەی ده وڵه‌تە زلهێزە به‌رژەوەندی خواز و دەوڵەتە داگیركه‌رە هەرێمایەتیەكان بوه‌تەوە، ئه‌م دۆخه ناهه‌مواره‌ش له باشووری كوردستاندا گه‌یشتووەته ئاستی دۆخێكی مه‌ترسیداری چاره‌نووس ساز، به‌تایبه‌تی رژێمی داگیركه‌ری فاشیستی توركیا، له‌چوارچێوه‌ی پیلانێكی ڕەشی مه‌ودافراوانی سیاسی، سه‌ربازی، ئابووری و كه‌لـلتوورییه‌وه، قۆناغێكی نویی پڕۆسەی داگیركردنی باشووری كوردستانی ده ست پێكردووه”.
هەروەها هاتووە:”مەخابن ئه‌و پیلانه‌یشی به‌هاوكاری و پشتیوانی راسته‌وخۆ و ناراسته‌وخۆی هێزگەلێكی باشووری كوردستان به‌ڕێوه‌ده‌چێت ئه‌مه‌ش هاوته‌باییه، له‌گه‌ڵ ئه‌و پڕۆسه داگیركه‌رییه‌دا که دژ به خاك و گه‌ل وڵاتی ئێمه ده‌کرێت، ئێمه پەی به‌وه‌دەبەین كه ئه‌و لەشكركێشییە داگیركارییه‌ی توركیا، بۆ دوو ئامانجی پێكه‌وه گرێدراوه؛ یه‌كه‌میان، له‌ناوبردنی بزووتنه‌وه‌ی ئازادیخوازی گه‌لی ئێمه و گەلانی ناوچەكەیە كه هەموو تێكۆشانی ئەم بزاوتە سیاسیە، شەڕێكی تایبەت ده‌کات لە پێناوی وەدیهێنای ئاشتی و ئازادی و كۆتایهێنان به جەنگ و چەوسانەوە و ستەمكاری، دووه‌م: داگیركردنی ته‌واوی باشووری كوردستان و لە ناوبردنی هه‌ژموونی سیاسی و ژیانی مەدەنی باشور و پاوانكاری سه‌رچاوه‌كانی وزه و سامانی زۆر و زەبه‌ندی باشوری كوردستان”.
لەو بەیاننامەدا باس لە ئامانجەکەی دەوڵەتی تورکیا کراوەو ئاماژە بەوەکراوە کە “هەردوو ئامانجه‌كه‌ی داگیركەران له‌بنچینه‌دا یه‌ك ئامانج و یه‌ك قوڵایی ستراتیژیی هەیە؛ ئه‌ویش داگیركردنی تەواوی زەمینی جوگرافیای سیاسی كوردستان و كۆمه‌ڵكوژكردنی گه‌لی ئێمە و له‌ناوبردنی ئیراده ئازادیخوازه‌كه‌یه‌تی”.
بەرەی نیشتیمانی دژی داگیرکاریی لە درێژەی بەیاننامەکەدا دەڵێت: ده‌بێت ئه‌و راستییه مه‌ترسیداره‌ش بخه‌ینه بەرچاو، ناهەمواری ئابوری و سیاسی نائاسایشی خه‌ڵكی باشووری كوردستان په‌یوه‌ندییه‌كی راسته‌وخۆی به‌و پیلانه داگیركارییه‌ی توركیاوه هه‌یه و له‌ڕێگه‌ی هه‌ندێك لایه‌نی سیاسییه‌وه كار بۆ شكاندنی ئیرادەی گه‌له‌كه‌مان ده‌کرێت و له‌ڕێگه‌ی ئه‌و قه‌یرانه پیلان بۆ داڕێژراوه‌‌وە، خه‌ڵكی باشووری دووچاری ژیانێكی مه‌رگه‌ساتیی و پڕ له ته‌نگه‌ژه كردووه و ئامانجیش لێی ملكه‌چكردنی گه‌له، بۆیه ده‌بێت ئه‌و راستییه بزانین كه هیچ هه‌وڵ و كۆششێك بۆ تێپه‌ڕاندنی قه‌یرانه‌كان و چاره‌سه‌ركردنی گرفته‌كان به‌بێ رووبه‌ڕووبوونه‌وه‌ی داگیركاریی توركیا سه‌رناگرێت”.
هەر لەو بەیاننامەدا هاتووە: له‌سه‌ر ئه‌م بنه‌مایه پێویسته گه‌له‌كه‌مان رووبه‌ڕووبوونه‌وه‌ی داگیركاریی توركیا و رزگاربوون له‌م ته‌نگه‌ژه کاره‌ساتباره‌ی ئێستای باشووری كوردستان به‌یه‌كه‌وه ببینێت و له‌یه‌كتری جیای نه‌كاته‌وه، بۆیه رزگاربوون له‌داگیركاریی و له قه‌یرانه‌كان پێویستی به تێكۆشانێكی هاوبه‌ش و یپێكەوەیی گەلی ئێمەوە هەیە، سەباری ئەمانەش بێ دەنگی لایەنە پەیوەندیدارەكانی وەك پەرلەمان و حكومەتی هەرێم و بێ هەڵوێستی پەرلەمان و حكومەتی عێراق ڕەوشەكەی زیاتر مەترسیدارتر كردووە لەسەر ئایندەی خاك و نیشتیمانی باشوری كوردستان.
بەرەکە پەرلەمان و حكومەتی هەرێمی كوردستانیش ئاگادار دەكاتەوە، كە “هەڵوێستی جدیان هەبێت لە بەرگرتن لەو هێرش و لەشكركێشی و داگیركاریانە، گەر نا هەڵوێستی ترمان دەبێت، له‌م پێناوه‌شدا پێویسته وه‌ك ئه‌ركێكی نیشتمانی و دیموكراتی، هه‌موومان به‌شداربین له به‌رگریكردن و به‌ره‌نگاربوونه‌وه‌دا و ده‌سته و به‌ره‌ی به‌ره‌نگاربوونه‌وه و به‌رگری نشتیمانی مه‌ده‌نی به‌شێوازی جیاواز دروست بكه‌ین و په‌ره به‌چالاكی جۆراوجۆر و هاوبه‌ش بده‌ین”.
لە کۆتاییدا به‌ره‌ی نیشتمانی دژ به‌داگیركاری، بانگه‌وازی له‌ته‌واوی گه‌له‌كه‌مان ده‌كات و دەڵێت بەتایبەت “گه‌نجان، ژنان، پێشمه‌رگه دێرینه‌كان، رۆشنبیران، چالاكوانان و هه‌موو چین و توێژه‌کان كه وه‌ك شورایه‌كی پۆڵایین كه‌رامه‌ت و شكۆی خۆمان و نیشتمانه‌كه‌مان بپارێزین و باشوور له هه‌رجۆره داگیركارییه‌کی هزری و جوغرافی توركیا و قه‌یرانه دروستكراوه‌كانی رزگار بكه‌ین و زیاتر په‌ره به “به‌ره‌ی نیشتمانی دژه داگیركاری” بده‌ین، له‌ئاستی سیاسی، راگه‌یاندنی، كولتووری، رێكخستنی و دیبلۆماسی تێكۆشان و به‌رگریكردنی مه‌ده‌نی فراوان بكه‌ین”.
س.ح
