دیار غەریب: پێویستە دەرفەت بە خەڵكی شەنگال بدرێت خۆیان بەڕێوە ببەن

دیار غەریب، بە پێویستی دەزانێت، کە دەرفەت بدرێت بە خەڵکی شەنگال خۆیان بەڕێوەببەن و دەڵێت، کە باشترین هەڵوێست لەڕووی مرۆیی، نەتەوەیی، دیموكراتی، نیشتمانی و یاساییەوە ئەوەیە كە پارتی و حكومەتی هەرێم دان بە ئیدارەی ئێستای شەنگالدا بنێن، بە بەرپرسانی پارتی-ش دەڵێت:" دەست لە دژایەتی پەكەكە هەڵبگرن و نەبن بە كەوا سوری بەر لەشكری دووژمنان!".


دیار غەریب، ئەندامی کۆنسەی سەرۆکایەتیی کۆما جڤاکێن کوردستان-کەجەکە، لە وتارێکدا لەژێر ناوی "پێویستە دەرفەت بدرێت بە خەڵكی شەنگال خۆیان خۆیان بەڕێوە ببەن"، تیشک دەخاتە سەر کاردانەوەکانی خەڵکی شەنگال لە بەرامبەر هەوڵەکان بۆ گەڕانەوەی مەحما خەلیل، قائیمقامی هەڵهاتوو بۆ شەنگال و هەڵوێستی پارتی دیموکراتی کوردستان-عێراق لە بەرامبەر ئیرادەی خەڵک و دروستکردنی تۆمەت بۆ پەکەکە.

دەقی وتارەکە:

پێویستە دەرفەت بدرێت بە خەڵكی شەنگال خۆیان خۆیان بەڕێوە ببەن

لەم ڕۆژانەدا مەحما خەلیل كە لەلایەنی پارتی دیموكراتی كوردستانەوە بەڕێKكەوتن لەگەڵ فراكسیۆنەكەی ئەسیل نوجەیفیدا و بەبێ گوێدانە ئیرادەی خەڵكی شەنگال و لایەنەكانی تر وەكو قائیمقامی شەنگال دیاری كرایەوە، بەناوی ئیدارەی شەرعییەوە ڕوویان لە شەنگال كرد، ئەوەی جێگەی سەرنج بوو خەڵكی شەنگال بەچالاكیەكی دیموكراتیی ڕێگەیان نەدا كە مەحما خەلیل و شاندەكەی بچنە ناو شەنگالەوە و ئەوەشیان ڕەتكردەوە كە مەحما خەلیل و ئەوانەی لەگەڵیدان و لەلایەنی ئەنجومەنی پارێزگای نەینەواوە كە پارتی جڵەوی كردووە ئەركدار كراون، پەسند بكەن.

خەڵكی شەنگال پێیان لەسەر ئەوە داگرت كە ئەوان ئەو لایەن و كەسانە پەسند ناكەن، كە لەكاتی تەنگانەدا ئەوانیان بەجێهێڵاوە و ئەوانیان ڕادەستی داعش كردووە، خەڵكی شەنگال دەڵێن ئێمە ماوەی 4 ساڵە خۆمان خۆمان دەپارێزین و بەڕێوە دەبەین، لەو ماوەیەدا نە مەحما خەلیل، نە پارتی دیموكراتی كوردستان، نە ئەنجومەنی پارێزگای نەینەوا هیچ شتێكیان بۆ شەنگال و خەڵكەكەی نەكردووە. ئێستا كە مەترسیی لەسەر شەنگال كەم بۆتەوە، ئیتر پێویستمان بە ئەوان نیە، خۆمان دەتوانین خۆمان بەڕێوە ببەین، ئەم داوایەشیان بەرز كردۆتەوە بۆ لایەنە پەیوەندیدارەكانی ئێراق.

بەرپرسان و ڕاگەیاندنەكانی پارتی دیموكراتی كوردستان دوای ئەو ڕووداوانە ڕاستەوخۆ پەكەكەیان وەكو هۆكاری ئەو هەڵوێستە دەستنیشان كرد و پەكەكەیان بەوە تاوانبار كرد، كە ڕێگە نادات ئیدارەی شەرعی بگەڕێتەوە بۆ شەنگال، هەر بەوەوە نەوەستان و گەلێك تۆمەتی تریان دایە پاڵ پەكەكە و جارێكی تر ئەوەیان دووپاتكردەوە كە پەكەكە لەشەنگال نەكشاوەتەوە و پەکەكە لەگەڵ حەشدی شەعبیدا شەنگال بەڕێوە دەبەن، بەم كارەشیان جارێكی تر شەنگالیان كردە ئامانج بۆ دەوڵەتی توركیا و ناڕاستەوخۆ ئەو پەیامەیان دایە توركیا كە هێرش بكاتە سەر شەنگال، ئەمە لە كاتێكدایەكە پەكەكە شەش مانگ زیاترە هێزەكانی خۆی لە شەنگال كشاندۆتەوە، ئەوەشی شەنگال بەڕێوە دەبات ئەنجومەنی خۆبەڕێوەبەری شەنگالە كە لە سەرەتای 2015 دا لە چیای شەنگال لەلایەنی خەڵكی بەرخۆدەری شەنگالەوە دامەزراوە، ئەوانەشی كە شەنگال دەپارێزنیەكینەكانی بەرخۆدانی شەنگال(YBŞ) و یەكینەكانی ژنانی شەنگال(YJŞ)ن كە لە دوای بەجێهێڵانی شەنگال لە لایەنی پارتی دیموكراتی كوردستانەوە و داگیركردنی لەلایەنی داعشەوە دروست بوون. ئەو هێزانەش كوڕان و كچانی شەنگال و كۆمەڵگای ئێزدین، ئەم ڕاستیەش پارتی دیموكرات و خەڵكی تریش دەزانێت، حكومەتی ئێراق و توركیاش دەزانن.

 ئەوەی جێگەی سەرنجە ئەوەیە كە بۆچی بەرپرسەكانی پارتی و ڕاگەیاندنەكانیان لە جێگەی ئەوەی ڕێز لەو ئیرادەیە بگرن كە لەكاتی تەنگانە و بەرخۆداندا دروست بوو، لەو كاتەدا كە فەراغی ئیداریی و ئەمنی هەبوودروست بوو، دەچن دژایەتیان دەكەن؟ بۆچی لە جێگەی ئەوەی سوپاس و دەستخۆشی لە پەكەكە بكەن كە هاوكاری ئەو خەڵكەی كرد لە خۆپاراستن و خۆ بەڕێوەبردندا، دەچن تۆمەتی بۆ دروست دەكەن و دژایەتی دەكەن؟ وەكو تر دەكرێت ئەو پرسیارە بكەین كە ئایا لە ساڵی 2003 وە هەتا 2014 كە پارتی حوكمی شەنگالی دەكرد بۆچی كۆمەڵگای ئێزیدی بەباشی ڕێكنەخست و نەیپاراست؟ بۆچی لەو ماوەیەدا كە توانای سیاسیی و مادییان لە ئێستا زیاتر بوو خزمەتێكی ئەوتۆیان بۆ ئەو ناوچانە نەكرد و چەند پڕۆژەیەكی وەبەرهێنانیان پێش نەخست؟ بۆچی هەلی كاریان بۆ خەڵكی ئێزدی دەستەبەر نەكرد و بەشێكی زۆری گەنجی ئێزدی ناچار بوون بچن لە دەرەوەی ناوچەكانی خۆیان بۆ كار بگەڕێن؟ ئایا كە ئێستا خەڵك هەڵوێست نیشان دەدا بۆچی بیر لەو ڕاستیانە ناكەنەوە؟ بۆچی دەخوازن راستیەكان ئاوژوو بكە‌نەوە؟ ئایا مافی خەڵكی ئێزدی نییە، كە گومان لە پارتی و بەرپرسەكانی بكات و پێیان وابێت كە خزمەتیان ناكەن و نایانپارێزن!؟ ئایا مافی خەڵكی ئێزدی نییە، كە داوا بكات كە خۆی خۆی بەڕێوە ببات؟ ئایا مافی خەڵكی ئێزدی نییە كە بخوازێت خۆی خۆی بپارێزێت و پاراستنی خۆی نەدات بە دەستی كەسانی ترەوە؟ ئەم بابەتانەش پەیوەندیان بە پەكەكەوە نییە، بەڵكو پەیوەندیان بە ئایندەی خەڵكی ئێزدی و هەڵوێستی پارتییەوە هەیە لە ڕابردوودا بەرامبەر ئەو كۆمەڵگایە.

ئێزیدیەكان لەوە دەترسن كە لە سایەی پارتی دیموكراتدا چارەنووسیان وەكو كوردە فەیلیەكانی لێ بێت! وەكو تر مافی ئەو خەڵكەیە بپرسێت كە ئایا بۆچی لە 3/8/2014 دا بەجێتان هێڵاین؟ مافیانە بپرسن كە بۆچی لە دوای 16ی ئۆكتۆبەر جارێكی تر بەجێتان هێڵاین؟ هەروەها مافیانە كە بپرسن؛ لەم كاتەدا كە حەشدی شەعبی دۆسیەی ئەمنیی ئەو ناوچانەی بەدەستیەوەیە ڕادەستی یەكینەكانی بەرخۆدانی شەنگال و یەكینەكانی ژنانی شەنگالی دەكات و حكومەتی ئێراقیش ئیدارەی ئەو ناوچانە بەفەرمی و بە كرداریی دەناسێت و مامەڵەیان لەگەڵدا دەكات، بۆچی پارتی لە ڕێگەی ئەنجومەنی پارێزگای نەینەواوە دەخوازێت دەست بەسەر ناوچەكەدا بگرێت؟ خەڵكی شەنگال دەتوانن بپرسن ئایا ئەو ئەنجومەنەی نەینەوا چەندە ڕەوایی هەیە كە بڕیار لەسەر ڕەوایی ئیدارەی شەنگال بدات؟ ئەمە لە كاتێكدایە خەڵکی شەنگال دەڵێن ئەو ئەنجومەنە لە ڕابردوودا هیچ شتێكی بۆ شەنگال نەكردووە و ئێستاش ناتوانێت هیچ خزمەتێك پێشكەش بەو خەڵكە بكات، تەمەنیشی كۆتایی پێهاتووە. بە دڵنیاییەوە مافی ئەو خەڵكەیە بڵێن كە هەتا هەڵبژاردنی داهاتووی ئەنجومەنی پارێزگاكان دەخوازین خۆمان خۆمان بەڕێوە ببەین و هەڵبژاردنی داهاتووش خۆمان لەڕێگەی سندوقەكانی دەنگدانەوە بڕیار دەدەین، دەبوایە پارتی دیموكراتیش زۆر بەڕێزەوە لەگەڵ ئەو هەڵوێستەدا هەڵسوكەوتی بكردایە. هاوكات ئەگەر دەخوازن خەڵكی ئێزدی لێیان ببورن ئەوا دەبوایە دان بەهەڵەكانی خۆیاندا بنێن و ئەو بەرپرسانەشیان دیاری بكردایە كە لەبەرامبەر ڕادەستكردنی شەنگال بەرپرسن و بدرێنە دادگا. هەروەها هاوكاری ئەو ئیدارەیە بكەن كە ماوەی چوار ساڵە خزمەتی خەڵكی بەرخۆدەری چیای شەنگال دەكات. لەگەڵ ئەوانەدا ڕێگە بكەنەوە لەبەردەم ئەو خەڵكە ئێزیدیەی كە لەژێر دەسەڵاتی ئەواندایە و ئازادیان بكەن بۆ ئەوەی بگەڕێنەوە بۆ ناوچەكانی خۆیان، ئەگەر هەنگاوی بەو شێوەیە بنێن ڕەنگە بتوانن دڵی خەڵكی ئێزدی ئاشت بكەنەوە، بە پێچەوانەوە ئەوەندەی تر ئەو خەڵكە بێزار دەكەن و ئەوەش ئەوەندەی تر مەودا دەخاتە نێوان كۆمەڵگا ئێزدی و كۆمەڵگای كوردی موسوڵمانەوە و دابڕان دروست دەكات، ئەو كاتەش پارتی و بەرپرسەكانی بەپرسن لەئەنجامەكان.

ئەوەی كە لەم بابەتەدا پەیوەندی بە پەكەكەوە هەیە، دەبوایە بەرپرسانی پارتی دەستخۆشیان لە پەكەكە بكردایە كە خەڵكی ئێزدی پاراست و ڕێگەی نەدا قوربانیەكان ببنە دە هێندە. هەروەها دەبێت بەرپرسانی پارتی دیموكرات ئەوەشیان لە یاد نەچێت كە ساڵی 2015 ش پەكەكە خەڵكی چیای شەنگالی ڕازی كرد بەوەی ڕێگە بدەن هێزەكانی پارتی بگەڕێنەوە بۆ ناوچەكە، ئەگەر نا بە هیچ شێوەیەك ڕێگەیان نەدەدا هێزەكانی پارتی بگەڕێنەوە بۆ ناوچەكە، ئەو هەڵوێستەش لەڕوانگەی نەتەوەییەوە نیشان دراوە، لە ئێستاشدا ئەگەر هێزەكانی پەكەكە لەشەنگال بوونایە بەڵكو كار ئاسانییان بۆ پارتی بكردایە بۆ ئەوەی بگەڕێنەوە، بەڵام لەبەر ئەوەی گەریلا لە شەنگال نەماوە پەكەكەش ناتوانێت جارێكی تر ئەو كار ئاسانییە بكات، دەبێت بەرپرسانی پارتی دەست لە دژایەتی پەكەكە هەڵبگرن و نەبن بە كەوا سوری بەر لەشكری دووژمنان!

لەكۆتاییدا ئەوە دووپات دەكەمەوە باشترین هەڵوێست لەڕووی مرۆیی، نەتەوەیی، دیموكراتی، نیشتمانی و یاساییەوە ئەوەیە كە پارتی و حكومەتی هەرێم دان بە ئیدارەی ئێستای شەنگالدا بنێن، ڕێزی بگرن و هاوكاری بن، ئەمە خزمەت بە شەنگال و خەڵكی ئێزدی، هەرێمی كوردستان و نەتەوەی كورد، ئێراق و پڕۆسەی بونیادنانەوە دەكات.

ش.ف