"دەبێت سەربازگەکانی دەوڵەتی تورک لە باشور بکرێنە دەرەوە"

توێژە جیاوازەکانی هەڵەبجە دژی داگیرکارییەکانی دەوڵەتی تورک و هەوڵدان بۆ سڕینەوەی گەلی کوردن و بە پێویستی دەزانن سەربازگەکانی ئەو دەوڵەتە داگیرکەرە لە باشور بکرێنە دەرەوە.


ناڕەزاییەکان لە بەرامبەر داگیرکارییەکانی دەوڵەتی تورک بەردەوامیی هەیە و لەو چوارچێوەیەدا توێژە جیاوزەکانی هەڵەبجە بۆ ڕۆژنیوز دەدوێن.

د.فاروق نەقشبەندیی مامۆستا لە زانكۆی هەڵەبجە ئاماژەی بۆ ئەوە کرد، کە دەوڵەتی تورک لە سەرەتای دامەزراندنییەوە دژایەتی گەلی کوردی کوردووە و وتی: لەوەتەی هەن کوردیان وەک پاشکۆ بینیوە، نەک میلـلەت.

فاروق نەقشبەندی، نەفرەتی لە هەر دەوڵەتێک کرد، کە بیەوێت کورد بسڕێتەوە، جەختیشکردەوە، کە "بەهیچ جۆرێک ناتوانن بمانسڕنەوە، خوا زمان و جوگرافیای پێبەخشیوین دوا ڕۆژیش بۆ ئێمە دەبێت".

ئەو مامۆستایەی زانکۆ هەبوونی سەربازگەکانی دەوڵەتی تورک لە باشوری کوردستان بە مەترسیی دەزانێت و وتی:"دەبێت ڕێكخراوە نێودەوڵەتییەكان و حكومەتی عێراق بێنە دەنگ و بیانكەنە دەرەوە".

هەروەها، سیڤەر عوسمان، خوێندكاری هەمان زانكۆ بۆ ڕووبەڕووبوونەوەی داگیرکارییەکانی دەوڵەتی تورک، کە یەکێک لە جۆرەکانی داگیرکاریی ئابووریییە، بایکۆتکردنی کاڵای تورکیی بە پێویست و گرنگ دەزانێت و وتی: پێویستە لەسەر هەموو بازرگانەکان و هەر هاوڵاتییەکی کرد، کە تەواوی كاڵا توركیەكان فەرامۆش بكەن و هاوردەکردنیان ڕابگرن.

هەر لەوبارەیەوە، ڕێبوار محەمەد هاوڵاتیەكی هەڵەبجە، باسی لەوە کرد، کە ساڵەهای ساڵە گەلی کورد لەپێناو خاکی کوردستاندا خوێن دەڕژێت، دەبێت حكومەتی هەرێم، ڕێگا نەدات ئەو بارەگایانەی دەوڵەتی تورك لەناو خاكی باشوری كوردستاندا هەبێت، پێویستە بڕۆنە دەرەوە.

ش.ف