دوای شكستهێنانی هەوڵەكانی بۆ لەناوبردنی خۆبەڕێوەبەری شنگال، پەدەكە لە ڕێگەی ئەنجومەنی ئاسایشەوە سیناریۆكانی دژ بە ئێزیدییەكان و پەكەكە دەستپێكرد
سیناریۆكەی ئەنجومەنی ئاسایش هەرزوو لەلایەن ئێزیدییەكانەوە بە درۆخرایەوە و هاوڵاتیانی باشوریش بە سیناریۆیەكی قێزەونی دەزانن
لەسەر ئەو سیناریۆیە، حاكم شێخ لەتیف دەڵێت: هەموو دنیا شایەتە پەکەکە برا ئێزدییەکانی پاراست و فریایان کەوت، کاتێک هەمووان بەجێیان هێشتن
ئاسایش و ئەمنییەتی هەر دەوڵەتێک پەیوەستە بە بەهێزی دەزگا ئەمنییەکانییەوە، یەکێک لەو شوێنە هەستیارانەی کە بەدەست یەنەکە و پەدەکەوەیە لە هەرێمی كوردستان دەزگا ئەمنییەکانی و هەواڵگیرییەكانە و بە فشاری کۆمەڵگای نێودەوڵەتی و هاوپەیمانان دەزگایەکی فەرمی میری بە ناوی ئەنجوومەنی ئاسایشی هەرێمی کوردستانەوە دامەزرا، بەڵام پەدەكە هەژمونی تەواوی بەسەر ئەنجومەنەكەوەیە و بونی یەنەكە لەو ئەنجومەنەدا شکڵییە.
ئەوەی جێگای سەیرە دەزگایەک لەو ئاستەدا بەردەوام سیناریۆی سەیر و سەمەرە دروست دەکات و جار لە دوای جار بۆ خەڵکی کوردستانی دەسەلمێنێت کە سیناریۆکانی چەندە قێزەونن.
شەوی ڕابردوو، لە سینایۆیەكی ئامادەكراودا، پەدەكە لە ڕێگەی ئەنجومەنی ئاسایشەوە وا بڵاویكردەوە، دوو كەسی سەر بە پەكەكەیان دەستگیركردووە، كە بە نیازی ئەنجامدانی تەقینەوە بوون لە كەمپەكانی (شاریا، بێرسڤێ، کەبەرتوو و شێخان) لە پارێزگای دهۆک.
ئەو كەمپانەی ئەنجومەنی ئاسایش باسی كردووە، ئیزیدی نشینن و دوای كۆمەڵكوژی شنگال لەلایەن داعشەوە لە ساڵی ٢٠١٤، ئاوارەی كامپەكانبوون.
تائێستا لەدەرباری ئەو سینایۆیەی پەدەکە، لایەنە فەرمییەکانی شەنگال هیچ لێدوانێکی فەرمیان نەداوە.
پەدەكە لەبەرئەوەی لە دیاریکردنی کارەکتەری تیرۆریستیشدا لێهاتوو نین، دەموچاوی وەها دێننە سەر شاشە کە بە دەموچاوی ئەو کەسەوە دیارە تاوانێکی ئەوتۆی نەکردووە یان تیرۆرست بێت.
دەستی پەدەکە لەو سیناریۆیەدا هێندە ئاشکرابوو، بەدەر لە ڕاگەیاندنەکانی پەدەکە هیچ دەزگایەکی تری ڕاگەیاندن بڵاوی نەکردەوە و ئەمەش ئاماژەیەکی ڕوونە کە سینایۆکەی پەدەکە کەس ناتوانێت بڕوای پێ بکات.
حاکم شێخ لەتیف پسپۆڕی یاسایی و دادوەری خانەنشین لەسەر ئەو پرسە نوسیویەتی: ئاخر سیناریۆیەک دابڕێژن ڕێی تێ بچێت، هەموو دنیا شایەتە پەکەکە برا ئێزدییەکانی پاراست و فریایان کەوت کاتێک هەمووان بەجێیان هێشتن
جگە لەوەش دوژمنە سەر سەختەکانی کورد شایەتی بۆ دەدەن کە پەکەکە کاری ترسنۆکانە ئەنجام نادات و مەدەنییەکان ناکاتە ئامانج
حاکم شێخ لەتیف زیاتر لەسەر ئەو پرسە دەوەستێت و دەڵێت: بیرمانە لە ساڵانی ٢٠١٤ و ٢٠١٥ کۆمەڵێک شوێنی مەدەنی لەناو ئەستەمبوڵ و شارەکانی تری تورکیا کرانە ئامانج و هاوڵاتییانی مەدەنی شەهید بوون.
ئەوکاتەیش وەک هەمیشە، پێش لێکۆڵینەوە پەنجەی تۆمەت بۆ پەکەکە ڕاکێشرا، بەڵام هەرزوو لە ناوخۆی تورکیایش و لە دەرەوەش وتییان، ئەوە کاری ئەوان نییە و لە جێ پەنجەی ئەوان ناچێت، چونکە ئەوان هێرش دەکەنە سەر ئامانجی سەربازی و ئەمنی نەک مەدەنی
حاکم شێخ لە تیف دەشڵێت: کەواتە نە تۆمەتبارکردن و سوک کردنی کورد خۆشتان زیاتر سوک دەبن و تەنیا دوژمنان سوودی لێ دەبینن.
هاوڵاتیانی هەرێمی كوردستان لە كۆمێنتەكانیاندا لەسەر ئەو سیناریۆیە دەپرسن، پەدەكە ئێزیدییەكانی لە بەردەستی داعشدا جێهێشت و هەزاران ژن و منداڵ و گەنج و پیریان لێ شەهیدكران، ئێستاش لە ژێر بۆردومانی فڕۆكەی بێ فڕۆكەوانی توركیادان و هەرجارە و چەند كەسێكی ئێزیدی شەهید دەكرێن، خێرە پەدەكە دەنگی لێوە نایەت؟
هەروەها دەڵێن: ئەوكاتەی پەدەكە ئێزیدییەكانی لە بەردەستی چەتەكانی داعشدا جێهێشت نزیكبوو لەوەی بەتەواوی كۆمەڵكوژ بكرێن، پەكەكە لە چیاكانی كوردستانەوە خۆی گەیاندە شنگال و بە خوێنی گەریلاكانی بەری لە كۆمەڵكوژی ئیزیدییەكان گرت.
س . ک
