دووشەممە, 4 يون 2018 – 08:31 ڕۆژنیوز- بڕیار محەمەد
داگیرکارییەکانی دەوڵەتی تورک لە خاکی هەرێمی کوردستان بەردەوامیی هەیە و محەمەد گۆمەشینی، وتەبێژی دەستەی سەربەخۆی مافی مرۆڤ لەبارەی داگیرکارییەکانی تورکیاوە بۆ ڕۆژنیوز دەدوێت.
محەمەد گۆمەشینی، دەڵێت: ئێمە بەردەوام لە بەیاننامە و ڕاگەیاندراوەکانمان نیگەرانیی خۆمان نیشانداوە لەبەرامبەر بەزاندنی سنورەکان لەلایەن تورکیا و ئێرانەوە، بەڵام لەدوای ئەنجامدانی ڕیفراندۆم لە باشوری کوردستان هێرش و داگیرکارییەکان لەلایەن تورکیاوە بۆ سەر خاکی باشووری کوردستان زیاتر بووە.
گۆمەشینی، وتیشی: بەزاندنی سنورەکان لەلایەن تورکیا و ئێرانەوە وەکو ئەوە وایە مۆڵەتیان لە حکومەتی عێراق وەرگرتبێت، بۆیە پێویستە پەرلەمانی عێراق و پەرلەمانی هەرێمی کوردستان لە ڕێگەی پرۆژە یاسایەکەوە داوا لە حکومەت و سەرۆک کۆمار بکەن بێنەسەرخەت، تاوەکو چیتر ڕێگا بە وڵاتان نەدرێت سەروەریی خاکی عێراق پێشێل بکەن.
ئەو بەرپرسەی مافی مرۆڤ باسی لەوەشکرد: بەهۆی بەزاندنی سنورەکان لەلایەن تورکیا و ئێرانەوە دانیشتوانی گوندە سنورییەکانی تووشی دڵەڕاوکێ و زیانێکی ئابووری زۆر کردوەتەوە، وێڕای ئەوە ماوەی چەندین ساڵە بەهۆی بۆردومانەکانەوە کشتوکاڵی ئەو سنورانە دەفەوتێت.
ک.ک
