فڕۆكە جەنگییەكانی دەوڵەتی داگیركەری تورك، بۆردوومانی گوندی بانکێی سنووری شارۆچکەی زاخۆیان کرد.
بۆردوومانكردنی گوندی بانكێ لە شارەدێی باتیفای سەر بە زاخۆ، لە بەرەبەیانی ئەمڕۆدا بووە و تا ئامادەکردنی ئەم هەواڵە، زیانەکانی نەزاندراون.
ئەمە لەكاتێكدایە، دوێنێ تۆپخانەكانی دەوڵەتی تورك، تۆپبارانی گوندی بۆسەلی شارەدێی دەركارێی سەر بە شارۆچكەی زاخۆیان كرد.
لە ئەنجامی ئەو تۆپبارانەدا، پارچە تۆپێك بەرهاوڵاتییەكی تەمەن ٥٢ ساڵ کەوت بەناوی’عەبدولڕەحمان یوسف’ و بە سەختیی بریندار بوو.
هەر دوێنێ، تیمی عێراق كوردستانی cpt بڵاویكردەوە، بەهۆی بۆردوومانە بەردەوامەكانی توركیاوە بەتایبەت لەكاتی دەستپێكردنی هێرشەکەی ٢٣ نیسانەوە، ١٢ هەزار دۆنم زەوی سووتاوە.
وەك لە ڕاگەیەندراوەكەی سی پی تی-دا هاتووە: لە سەرەتای ئەمساڵەوە تائێستا، بەهۆی بۆردوومانەكانی فڕۆكە جەنگییەكانی توركیاوە، ١٩هاوڵاتی مەدەنیی برینداربوو.
س.س
