سەرۆکى لیژنەى دارایی لە پەرلەمانى هەرێم ڕایگەیاند، ئێستا دۆخى حکومەت لەڕووی ئابوورییەوە زۆر باشە و دەتوانێت بە ئاسانیی پارەی مووچە دابین بکات، دەشڵێت: ئێمە و وەزیرەکانى حکومەت ئاگاداری فرۆشتنی نەوت نین، چونکە ئەنجومەنى نەوت و گاز کۆنەبووەتەوە، بەڵام بریارەکان لەلایەن سەرۆکی حکومەتەوە دەدرێت.
زیاد جەبار، سەرۆکی فراکسیۆنی یەنەکە و لە هەمانکاتیشدا سەرۆکى لیژنەى دارایی و ئابووریی لە پەرلەمانى هەرێمى کوردستان لەبارەى دۆخى سیاسیى و ئابوورى هەرێم بە میدیاى فەرمىی حزبەکەى ڕاگەیاندووە: ئێستا دۆخى حکومەتى هەرێمى کوردستان لەڕووی ئابوورییەوە زۆر باشە و داهاتەکەشى بەهۆی بەرزبونەوەی نرخی نەوت زیادیکردووە، بەڵام داهاتی نەوت شەفاف نییە بەجۆرێک لە ئێستادا لە ٤۱٪ی داهاتی نەوت دەگەرێتەوە بۆ حکومەت و لە ٥۹٪ی داهاتی نەوت بۆ کرێی کۆمپانیا و کرێی گواستنەوەی نەوت دەڕوات، بۆیە پێویستە چاکسازیی لەم رێژەیە بکرێت.
دەشڵێت: ئێمە و وەزیرەکانى حکومەت ئاگاداری فرۆشتنی نەوت نین، ئەوەش بەهۆى ئەوەى تا ئێستا ئەنجومەنی نەوت و غازی هەرێم کۆنەبووەتەوە و بریارەکانیش لەلایەن سەرۆکی حکومەتەوە دەدرێت.
لە بەشێکى دیکەى قسەکانیدا وتویەتى: بەشێک لەو کێشانەی لە سلێمانی هەیە دەگەرێتەوە بۆ ئەو فشارە سیاسیی و ئابووریی و میدیاییەى لە سنووری پارێزگای سلێمانی هەیە و حکومەتی هەرێم جیاوازی دەکات لەنێوان پارێزگاکانی هەرێمدا، بۆیە لەئێستادا کێشەکان گەشتوون بەم دۆخەی ئێستا.
لەبارەی نەبوونی یاسای بودجەی هەرێمی کوردستانیشەوە زیاد جەبار دەڵێت: ماوەی چەند ساڵێکە یاسای بودجەمان نییە و ئێمە لە پەرلەمان نازانین داهاتی نەوت چەندە و چۆن دابەش دەکرێت، جگە لەو ڕاپۆرتانەی کۆمپانیای دیلۆیت بڵاوی دەکاتەوە هیچی تر ئاگادار نین، ئەو راپۆرتانەی دیلۆیتیش لەلایەن حکومەتەوە دەیاندرێتیێ واتە ئەو کۆمپانیایە خۆی ناچێت بەدواداچوون بکات و بزانێت بڕى چەند نەوت هەناردە دەکرێت.
سەرۆکى فراکسیۆنى یەنەکە لە پەرلەمانى هەرێم ڕایگەیاندووە: لەکاتێکدا عێراق و هەرێمی کوردستان ۱۸ دەروازەی فەرمییان لەگەڵ ئێران هەیە، بەڵام ئاڵوگۆڕی بازرگانی لەڕێگەى ئیبراهیم خەلیلەوە لەسەرجەمیان زیاترە و تەنانەت ئێستا پسوڵەى ئەوێ لە چاپەمەنییەکەی خۆیان چاپى دەکەن، بەڵام دەروازەکانى دیکە پسوڵە لە وەزارەتی دارایی وەردەگرن .
سەرۆکى فراکسیۆنى یەنەکە هۆکاری کۆنەبوونەوەی پەرلەمانی هەرێمی کوردستانیش دەگێڕێتەوە بۆ “ڕێگریی پارتی لە هەمواری یاسای هەڵبژاردنەکان و کۆمسیۆن” و دەڵێت: پێشتر ڕێککەوتن لەبارەیەوە کراوە و پێویستە ئەم بابەتانە بە سازانی نیشتیمانی تێپەرێت، بەڵام روونە پارتی نایەوێت هەڵبژاردن لە کوردستان بکرێت.
ئ.م
