بە وتەی خاوەن دوكاندارەكانی بازاڕی ئەحمەد ئاغای كەركوك، زیانی ئاگرەکە یەك ملیۆن دۆلار بووە، دەشڵێن: ئاگر لە ژووری پاسەوانەکەوە بینراوە و ئێستاش کەس نازانێت پاسەوانەکە لە کوێیە.
کاتژمێر ١١:٠٠ی شەوی ڕابردوو، بە هۆكارێكی نادیار ئاگر لە باڵەخانەیەك لە ناو بازاڕی ئەحمەد ئاغای شاری كەركوك كەوتەوە، بەهۆیەوە باڵەخانەكە و هەشت دوكان بە تەواوی سووتان.
عەلی محەمەد خاوەنی یەكێك لەو دووكانەی كە زیانی بەركەوتووە، بۆ ڕۆژنیوز وتی:”كۆی گشتی ئەو زیانانەی بەر دوكاندارەكان كەوتوە بە بەهای یەك ملیۆن دۆلار دەخەمڵێندرێت، ئەوەش بۆ تەواوی دوكاندارەكان كە سووتاوە نەك كەسێك، تا ئێستا هۆكاری ئاگرەكە ڕوون نەبووەتەوە، بەڕێوبەرایەتی بەرگری شارستانی كەركوك و پۆلیسی كەركوك دەستیان بە لێكۆڵینەوە كردووە، ئێمەش سكاڵامان تۆماركردووە كە زیانێكی زۆرمان پێ گەیشتووە”.
ئەو دوکاندارە نایشارێتەوە، کە پێیان وانییە ئاگرەکە بە هۆی شۆرتی كارەباوە بوبێت و دەشڵێت: سەرەتا ئاگرە لە ژوری پاسەوانی باڵەخانەكەوە بینراوە، بەڵام تاوەكو ئێستا پاسەوانەكە دیار نییە و كەس نازانێت لە كوێیە”.
ئاگرەكەی بازاڕی ئەحمەد ئاغای شاری كەركوك بۆ ماوەی نزیكەی سێ كاتژمێر بەردەوام بوو، پاشان لەلایەن تیمەكانی بەرگری شارستانی كەركوك و یەكەی ئاگر كوژێنەوەی كۆمپانیای نەوتی باكور’ـەوە كوژێنرایەوە.
س.ح
