ڕۆژنیوز- بڕوا ئەسعەد
زیندانییەكی سیاسی، پەدەکە بە پاشکۆی دەوڵەتی داگیرکەری تورک دەزانێت و پێیوایە، پەدەکە هەر لە سەرەتای دروستبونییەوە بە خیانەت هێناوێتی هەتا ڕۆژی ئەمڕۆ و دەڵێت: توركیا دەیەوێت لە ڕێگەی پەدەکەوە ئامانجەکەی بگات و باشووری کوردستان داگیربکات.
لە شەوی ١٧ی نیسانەوە، دەوڵەتی داگیركەری تورك، بە هەماهەنگیی پەدەكە هێرشی زەمینیی بۆ سەر ناوچەكانی زاپ، مەتینا و ئاڤاشین لە باشووری كوردستان دەستپێكرد، تائێستاش هێرشەكان بە هاوكاریی پەدەكە بەردەوامە و چەندین بنكە و بارەگای نوێش لەلایەن توركیاوە بنیاتنراون.
سەروەر کەریم، زیندانیی سیاسیی، كە لە سەردەمی ڕژێمی بەعسدا سزای ٢٠ ساڵ زیندانی دراوە بە ڕۆژنیوزی وت: ئەگەر سەیری مێژووی پەدەكە بكەین لاپەڕەیەکی پاکی تێدانییە، بۆ ئێستاش ئەگەر پەدەکە نەبێتە کەوا سوری بەرلەشکر، ئەوە لە ئەسڵی خۆی لایداوە، پەدەکە بۆ ئەمە دروستبووە، ئەگەر پەکەکە نەبێت دەوڵەتی تورکیا هەڵسوکەوت لەگەڵ پەدەکەدا ناکات، لە ڕاستیدا ئەوە بوونی پەکەکەیە، كە پەدەکە ماوەتەوە و هەڵسوکەوتیان لەگەڵدا دەکات و پێشوازیان لێدەکات.
سەروەر، ئاماژەی بە ئامانجی پشت هێرشەكەی دەوڵەتی تورك كرد و وتی: بابەتی پەكەكە بیانووە بۆ ئەنجامدانی هێرشەكە، ئەگینا ئامانجی توركیا ئەوەیە بۆ داگیرکردنی هەرێمی کوردستانە و زیندووکردنەوەی ویلایەتی موسڵە.
“ئەم کارەی پەدەکە دەیکات بۆ بەرژەوەندیی خۆی و دەستکەوتنی پارەیە، ئەوەیان دەستدەکەوێت بە گەڕەک ڤێلا دەکڕن لە ئەمریکا، پەدەکە بووەتە پاشکۆی تورکیا و بۆئەوەی بیپارێزن، بۆیە تورکیا لەڕێگەی پەدەکەوە دەیەوێت ئامانجەکەی بگەیەنێت و باشووری کوردستان داگیربکات و ویلایەتی موسڵ دروستبکاتەوە” سەروەر کەریم وای وت”.
دەشڵێت: توركیا زۆر بە دڵناییەوە دەزانێت پەکەکە پارتێکی و فیکریی و ئایدۆلۆژییە، بەڕێگای سەربازی چارەسەر ناکرێت، هەروەها چەندین جاری دیکە ئۆپەراسیۆن بکاتەوە و هێرشبکات بۆ ناوچەکانی زاپ و ئاڤاشین هیچی لە توانادا نییە و پێیناکرێت، چونکە ئەمە بابەتێکی فیکرییە و ئایدۆلۆژییە، پەروەردەی عەبدوڵا ئۆجالانە ئەم خەڵکەی بەو شێوەیە دروست بکات تا بەو جۆرە بتوانێت بەرگریی بکات، ئەمە بابەتێک نییە پارتێک بێت و هەروا بڕوات.
س.س
