چاودێرێکی سیاسی باس لەوە دەکات، تورکیا ئەمڕۆ بەنوێترین تەکنەلۆژیای ناتۆ ڕووبەڕووی هەموو ئەزمونێکی کورد دەبێتەوە، دەشڵێت: شەهیدکردنی ئەو چوار تێکۆشەرە لە گەرمیان بۆ ئێمە جێگەی نیگەرانییە، هەروەها داوای کاراکردنەوەی بڕیاری ژمارە ٣٧ی ساڵی ٢٠٠٣ی پەرلەمانی هەرێم دەکات، کە تایبەتە بە دەرکردنی سوپای تورکیا لەناو خاکی هەرێم.
ڕۆژی ١٧ی ئەم مانگە، دەوڵەتی داگیركەری تورك بە فڕۆكەی بێفڕۆكەوان هێرشی كردە سەر ئۆتۆمبێلێك لەنزیك شارۆچكەی كەلار و بەوهۆیەوە چوار كەس گیان لەدەستدا و كەسێكی تریش برینداربوو، ئەمەش ناڕەزایی توندی بەدوای خۆیدا هێنا.
سالار مەحمود، چاودێرى سیاسى لەوبارەیەوە بە ڕۆژنیوزی وت: شەهیدکردنی ئەو تێکۆشەرانە لە گەرمیان بۆ ئێمە جێگەی نیگەرانییە، گەرمیان سەرزەمینی ئەنفالە و ئەو شوێنەی کە ئەو هەڤاڵانەی تێدا شەهید کرا چەندین داستانی پێشمەرگانەی تێدا تۆمار کراوە و چەندین پێشمەرگەی قارەمان تێیدا ڕووبەڕووی ڕژێمی بەعس بوونەتەوە بۆ ئازادی کوردستان، بەداخەوە دەور و زەمان گۆڕاوە و تێکۆشەرەکانی ئێمە لە ڕۆژئاوای کوردستانەوە دێن و لەوێدا شەهید دەکرێن.
لەبارەی ئامانجی تورکیاوە دەڵێت: تورکیا ئەمڕۆ بەنوێترین تەکنەلۆژیای ناتۆ ڕووبەڕووی هەموو ئەزمونێکی کورد دەبێتەوە ئەگەر لە ئەفریقاش بێت، دژی ئەزمونی ڕۆژئاوا و باشووری کوردستانیشن، هەوڵەکانی تورکیا بۆ پەرتکردنی ڕیزەکان کوردە، ئامانج و ستراتیژییەتیان تەنها سەربازی نییە بەڵکو سیاسی و پەرتکردنە، وەک ڕژێمی بەعس تورکیاش سیاسەتی پەرتکە و زاڵبە بەکاردەهێنێت.
هەروەها وتیشی: دەبێت هەموو ئەمانە وامان لێبکات تورکیا ئیدانە بکەین لەسەر ئاستی عێراق و هەرێمیش، بەفەرمی لەگەڵ باڵیۆزخانەی تورکیا گفتوگۆبکرێت، پەرلەمانی هەرێم دانیشتنی تایبەت بەم پرسە بکات و بڕیاری ژمارە ٣٧ی ساڵی ٢٠٠٣ی پەرلەمانی هەرێم کارابکرێتەوە کە تایبەتە بە دەرکردنی سوپای تورکیا لەناو خاکی هەرێم.
س.س
