بڕیارە سبەینێ ٤٣٠ کۆچبەری لە بیلاڕووسیاوە بگەنەوە فڕۆکەخانەی نێودەوڵەتیی هەولێر، کە زۆرینەیان خەڵکی هەرێمی کوردستانن، بەڕێوبەری فڕۆکەخانەی نێودەوڵەتیی هەولێریش دەڵێت: تائێستا نزیکەی هەزار و ٩٠٠ کۆچبەر لە بیلاڕووسیاوە گەڕاونەتەوە بۆ هەرێمی کوردستان.
سەرچاوەیەک لە ئەنجومەنی وەزیرانی هەرێمی کوردستان بەڕۆژنیوزی ڕاگەیاند: بڕیارە کاتژمێر ٠٥:٠٠ی ئێوارەی سبەینێ پێنجشەممە نزیکەی ٤٣٠ کۆچبەر لە بیلاڕووسیاوە بگەنە فڕۆکەخانەی نێودەوڵەتیی هەولێر، زۆرینەی کۆچبەرەکانیش کوردن و خەڵکی هەرێمی کوردستانن.
لەلایەکی دیکەوە ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ڕۆژنیوزی ڕاگەیاند: تائێستا بەسێ قۆناغ هەزار و ٨٠٠ کۆچبەر لەڕێگەی فڕۆکەخانەی نێودەوڵەتیی هەولێرەوە گەوڕانەتەوە هەرێمی کوردستان، ژمارەی ئەو کۆچبەرانەشی کە بەشێوەی تاکوتەرا لە گەشتەکانی دیکەماندا گەڕاونەتەوە نزیکەی ١٠٠ کۆچبەردەبن، بەوەش تائێستا نزیکەی هەزار و ٩٠٠ کۆچبەر گەڕاونەتەوە هەرێمی کوردستان.
بەڕێوبەری فڕۆکەخانەی نێودەوڵەتیی هەولێر ئاماژەی بەوەشکرد، کە “بەهۆی ئەوەی کۆچبەرە گەڕاوەکان بە پاسپۆرتی عێراقیی دەگەڕێنەوە هەولێر و پاشان دەڕۆنەوە ناوچەکانی خۆیان، نازانین لەو کۆچبەرانەی کە گەڕاونەتەوە و خەڵکی هەرێمی کوردستانن چەندیان کوردن و چەندیان لە نەتەوەکانی دیکەن”.
ب.ل
