سلێمانی بە سەرهەڵدان ڕێزی لە خەباتی دیار غەریب گرت

لە بەردەم ماڵی دایکی شەهید دیار غەریبەوە لە گەڕەکی بەختیاری لە سلێمانی، ڕێپێوانێکی فراوان دژی شەهیدکردنی دیار غەریب دەستیپێکرد و چەندین دروشم بۆ پیزانینی خەباتی دیار غەریب و دژی شەهیدکردنی وترانەوە، لە ڕێپێوانەکەدا بە ڕێژەیەکی بەرفراوان ژنان بەشدارییان کرد.


خۆپیشاندانەکە لە گەڕەکی بەختیارییەوە تا بەردەم مزگەوتی ئەحمەدی حاجی عەلی لە شەقامی شەست مەتری سلێمانی درێژەی هەبوو، دواتر پرسە لە هۆڵی مزگەوتەکە بۆ ژنان و پیاوان دەستیپێکرد و بڕیارە ئەمڕۆ و سبەینێ بەردەوامیی هەبێت.

لە خۆپیشاندانەکەدا دەیان وێنەی شەهید دیار غەریب و عەبدوڵا ئۆجالان ڕێبەری پەکەکە و ئاڵاکانی پەکەکە و کەجەکە بەرزکراونەوە، لەگەڵ ئەوەشدا زۆرینەی بەشداران لە ژنان بوون، کە تێیدا هەموو تەمەنەکان دەبینران و هەمووان بە یەک دەنگ دڵسۆزییان بۆ خەباتی شەهید دیار غەریب دووپات دەکردەوە.

لە خۆپیشاندانەکەدا، چەندین دروشم وترانەوە لەوانە "دیار غەریب ڕابەرە، سەرکردە و تاجی سەرە - دیار غەریب ڕابەرە، پەکەکە هیزی گەلە - تیرۆرست ئەردۆغان - هەرگیز هەرگیز تۆ لەبیر ناکەین - خائینان رسوا دەکەین، کوردستان ڕزگار دەکەین - لە قەندیل بەرخۆدانە، سلێمانی سەرهەڵدانە، بمرێ خیانەت- هەڵمەت نامرێ- بۆ دەرەوە بۆ دەرەوە، سوپای تورکیا بۆ دەرەوە، بمرێ فاشیزم، شەڕ شەڕ شەڕ بۆ ئازادی شەڕ و گەلی کورد تۆڵەی دەوێ و بێ تۆڵە قەت ناسرەوێ".

جێگای ئاماژەیە، دوینێ لە ڕاگەیەندراوێکدا، کەجەکە شەهیدبوونی دیار غەریب ئەندامی کۆنسەی سەرۆکایەتی کەجەکەی ڕاگەیاند.

س.ح