پێنجشەممە, 12 سبت 2019 – 07:58 ڕۆژنیوز – سۆران
https://youtu.be/1_3z0ydaGNU=
پەلامار و دەستدرێژییەکانی دەوڵەتی تورک بۆ سەر باشووری کوردستان بەردەوامە، لەسەر ئەو پرسەش چالاكوان و پارێزەرانی شارۆچکەی سۆرانی سەر بە پارێزگای هەولێر، کە ئێستا ناوچەکەیان لەژێر هەڕەشە و پەلامارەکانی دەوڵەتی تورکدایە تێڕوانینی خۆیان بۆ ڕۆژنیوز خستەڕوو.
زانیار حەسەن، یاساناس و لێكۆڵەری دادی لەزانكۆی سۆران ڕایگەیاند، توركیا پێشێلی بەند و ماددە یاساییەكانی ناوخۆی عێراق و پەیماننامە نێودەوڵەتیەكانیش دەكات لەمەسەلەی داگیركردنی خاكی كوردستان، بەڵام بێ هەڵوێستی و بێدەنگی هەردوو حكومەتی عێراق و هەرێمی كوردستان وایكردووە توركیا ئەو داگیركارییە بەمافی خۆی بزانێت.
زانیار باس لەوەش دەكات كۆنگرەی نەتەوەیی زامنی مافەكانی گەلی كوردە لە هەرچوار پارچەی كوردستان، بەڵام بەرژەوەندپەرستی و سیخوڕی هەندێك لە هێزە سیاسیەكان بە بەربەستی بەردەم بەستنی كۆنگرەی نەتەوەیی كورد دەزانێت.
لەسەر هەمان پرس شەوقی مستەفا سورچی، چالاكوانی سیاسی، پێیوایە هەمیشە دوژمنانی گەلی كورد سودیان لەپەرتەوازەیی و شێواوی نێو ماڵی گەلی كورد بینیوە، دەشڵێت: پێویستە كۆنگرەی نەتەوەیی ئەنجام بدرێت و چیتر كورد پەرتەوازە و هەزار پارچە نەبێت، هاوكات داگیركاری و بۆردومان و تۆپبارانەكانی دەوڵەتی توركیاش بۆ نەبوونی یەكڕیزی و یەكێتی كوردان دەبینێـتەوە، لەگەڵ ئەوەی باس لەوەدەكات كە توركیا پیلانی درێژخایەن و ستراتیژی هەیە بۆ داگیركردنی خاكی كوردستان.
جگە لە پرسی داگیرکاریی ئەو چالاکوانە نەبەستنی كۆنگرەی نەتەوەیی كورد بە کێشەیەکی سەرەکی دەزانێت و داوا لەسەرجەم هێزو لایەنە سیاسیەكانی هەرچوار پارچەی كوردستان دەكات پەلە بكەن لەبەستنی كۆنگرەی نەتەوەیی و كۆتاییهێنان بەو پەرتەوازەیی و داگیركاریەی کە دوژمنان دروستییان کردووە.
ک.س
