سۆران عومەر ڕایگەیاند، بۆردوومان و تیرۆرەکانی دەوڵەتی تورک بەچاوساغی هێزی ناوخۆی هەرێمی کوردستان ئەنجام دەدرێت، بێدەنگی هەرێمی کوردستان و عێراق ئاماژەی ڕێکەوتنی نهێنی نێوانیانە.
سۆران عومەر، ئەندامی ئەنجومەنی نوینەرانی عێراق ڕایگەیاند: بۆردوومانی فڕۆکەی بێ فڕۆکەوان لە کەمپی ئاوارەکانی مەخمورو شارەدێی ئاغجەلەر و پێشتر لە چیای ئەزمڕ و گەڵاڵە و شارباژێر و ناوچەکانی دهۆک و بادینان بە بەهانەی پەکەکە ئەنجامدانی تیرۆری سیاسی و کۆمەڵکوژی مەدەنییە کە لەلایەن تورکیاوە ئەنجام دەدرێت.
ئەو پەرلەمانتارە لە فەیسبووکی خۆی وتوشیەتی: ئەو تیرۆرە بەچاوساغی هێزی ناوخۆی هەرێمی کوردستان ئەنجام دەدرێت، بێدەنگی هەرێمی کوردستان و عێراق ئاماژەی ڕێکەوتنی نهێنی نێوانیانە بۆ ئەم بۆردوومان و تیرۆرانە.
ئاماژەی بەوەشکردووە کەبە هۆی بۆردوومانەکانەوە: دوودڵی و ترسێکی زۆری لەناوچەکەدا دروست کردووە، ناکرێ ئاسمان و سنورەکانی عێراق و هەرێم واڵا بێت بۆ وڵاتانی دراوسێ تاوانی دەرهەق بەخەڵکی کوردستان و عێراق تێدا ئەنجام بدەن.
ئەوەش دوای ئەوەهات کە ڕۆژی ١٧ی ئەم مانگە محەمەد زەکی چەلەبی، خاوەنی ڕێستۆرانتی دەنیز لە سلێمانی تیرۆر کرا و ئەمڕۆش فڕۆکەی بێ فڕۆکەوانی دەوڵەتی تورک بۆردوومانی هەریەکە لە گوندێکی سەر بە ئاغجەلەر و کامپی شەهید رۆستەم جودیان کرد.
ها-غ
