بەهۆی سکاڵای وەبەرهێنێکی گەرمیان، سێ پەرلەمانتاری فراکسێونی بزوتنەوەی گۆڕان لە پەرلەمانی هەرێمی کوردستان، بانگهێشتی دادگا کران و وتەیان لێوەرگیرا.
دوای سکاڵای وەبەرهێنێکی گەرمیان لەسەر کەیسی کۆمەڵگەی عەلوەی نوێی کەلار و بانگهێشتکردنیان لەلایەن دادگای بەرایی شارۆچکەی کەلاری ناوەندی ئیدارەی گەرمیان، بەیانی ئەمڕۆ، هەر یەک لە عەلی حەمەساڵح، شیرین ئەمین و ڕزگار محەمەد، ئەندامانی پەرلەمانی هەرێمی کوردستان، سەردانی دادگاکەیان کرد و وتەیان لێوەرگیرا.
شیرین ئەمین، لە لێدوانێکیدا بۆ ڕۆژنیوز، ئاماژەی بۆ ئەوە کرد، کە وەبەرهێنەکە بە بەهانەی “ناوزڕاندن”، سکاڵای لەدژیان تۆمار کردووە.
شیرین ئەمین، ڕوونیکردەوە، ئەوان دوای بەدواداچوون، باسیان لە کردنەوەی عەلوەکە کردووە بە نایاسایی، وتیشی: ئێمە داوامانکردووە بەپێی ڕێکاری یاسایی ئەو پرۆژەیە تەواو ببێت، کەچی تەوا نەکراو و کراوەتەوە، تا ئێستا پرۆژە خزمەتگورارییەکانی بەپێی پێویست نیە، بەڵگەمان لەبەردەستە دەستوەردانی حزبی لە پرۆژەکەدا هەیە، جێگری سەرۆکی حکومەت و فەرمانگەکانی سنووری گەرمیانیش بەشداری ئەو دەستێوەردانەن.
شیرین، زیاتر ڕوونیکردەوە”ئەو عەلوەیە بێ ئەوەی فەرمانی دەستەی وەبەرهێنان هەبێت، کراوەتەوە وهێز نێردراوەتە سەر ئەو خەڵکانەی خەریکی سەوزە فرۆشتن ومیوە فرۆشتنن و گوازراونەتەوە بۆ عەلوەکە”.
ئەو پەرلەمانتارە، وتیشی: ئێمە لەسەر داواکاریی خەڵکی ئەو عەلوەیە دەستوەردانمان کردوە، هیچ بەڵگەیەک نییە بۆ ئەو وەبەرهێنە بیسەلمێنیت لەدادگا کە ئێمەتەشهیرمان کردووە، هەست دەکەین ئەم سکاڵایە دەستوەردانە لە ئیش و کاری پەرلەمانتاران، لەکاتێکدا بەپێی پەیڕەوی ناوخۆی پەرلەمان، پەرلەمان دەست کراوەیە بۆ بەدواداچوون.
هەروەها، عەلی حەمە ساڵح، وتی: ئێمە قسەمان لەسەر ئەوە کردوە، پرۆژەکە زیانی بە خەڵکی هەژار و کاسبکار گەیاندوە، لە هەرێمی کوردستان ئەوانەی خەریکی دزیی و قاچاغیی و گەندەڵێین، ڕۆژێک نەدراونەتە دادگا، کەچی ئێمە بەرگریی لەخەڵک دەکەین و دژی دزی و گەندەڵیی و داگیرکاریی وقاچاغین، دەیانەوێ ماندوومان بکەن هەڕ ڕۆژێک لەدادگایەک سکاڵامان لەسەر تۆمار دەکەن.
پرۆژەی عەلوەی نوێی کەلار، کە پرۆژەیەکی دەستەی وەبەرهێنانە و مۆڵەتی ژمارە ١١٠ی لە بەڕێوبەرایەتی گشتی وەبەرهەنانی سلێمانی پێدراوە و دراوە بە کۆمپانیای سەبج، بەگوێرەی یاسای دەستەی وەبەرهێنان هەر پرۆژەیەک تا تەواونەکرێت نابێت دەستاودەستکردنی پێوەبکرێت، بەڵام بە پێچەوانەی یاساوە ئەم پرۆژەیە پێش تەواوبوونی کڕین و فرۆشتن و دەستاودەستکردنی پێوەکراوە و پیشەوەرانی عەلوەی کۆن “بە فشار” گواستراونەتەوە ناو پرۆژەکەوە.
ش.ف
