سەردار ستار: توركیا باشور داگیردەكات و دەسەڵات سەرقاڵی سەودای كورسییە

سەردار ستار فەرماندەیەكی هەپەگە، لەوتارێكدا باس لەپیلانەكانی داگیركەریی دەوڵەتی تورك دەكات و ئەوە دەخاتە ڕوو، لەم پیلانگێڕییەدا توركیا تەنها نییە، بەڵكو وڵاتانی زلهێز و هاوپەیمانییی ناتۆ لەگەڵیدان، هەروەها دەڵێت: توركیا باشور داگیردەكات و دەسەڵات سەرقاڵی سەودای كورسییە.


دەوڵەتی تورک لە دەڤەری سۆران و برادۆست و بادینان، دەستی بە داگیرکردنی خاکی باشوری کوردستان کردووە، لە سەر داگیرکارییەکانی دەوڵەتی تورک و پیلانەکانی بەرامبەر بە باشوری کوردستان، سەردار ستار، فەرماندەیەکی هەپەگە، لەوتارێکدا کەبۆ ڕۆژنیوزی ناردووە وردەکاریی پیلانەکانی تورکیا و هەڵوێستی حزبەکانی باشوری کوردستانی بەرامبەر ئەو پیلانگێڕییە خستووەتە ڕوو.

دەقی وتارەکەی سەردار ستار

داگیركارییەكانی توركیا لەنێوان هەڵوێستی جەماوەر و حیزبە دەسەڵاتدارەكانی باشوردا

  دوای نۆ مانگ لە هەڵبژاردنی پەرلەمانی هەرێمی كوردستان، تازە بەتازە پۆستەكان یەكلایی دەكرێنەوە، وەك سەركەوتنێك بەگەل دەفرۆشرێنەوە، گوایە پشوو درێژبوون لە دانوستاندن و دیالۆگ، ئەنجامی ڕێككەوتنەكان دواكەوتووە ئەگەرنا ئەوان پەلەیان بووە لە ئاواكردنی حكومەتی نوێ!! هەڵبەت خۆڵكردنە چاوی خەڵكە و هیچ پەیوەندیی بە راستییەوە نییە، چوار ساڵ و نۆ مانگ بوو دەسەڵات لەلایەن مام و برازاوە بەڕێوەدەچوو، چوار ساڵی داهاتووش لەلایەن شازادە ئامۆزاكانەوە بەڕێوەدەچێت.

شایی و لۆغانی دەسەڵاتدارانی پ د ك/عێراق گوایە دەسەڵاتێكی بەهێز دروست دەكەن، چونكە خۆیان بەتەنها حكومداری ڕەهان، تائێستا تەنها لەگەڵ بزوتنەوەی گۆڕان و كەمە نەتەوەكانی تری هەرێم ڕێككەوتوون، ئەوەش وایكرد لەدەنگدان بۆ سەرۆكی هەرێم تەنها 68 دەنگ لەناو پەرلەماندا بهێنێت.

 (پارتی و یەكێتی) هێشتا دیار نییە لەسەر چی ڕێكەوتوون، خاڵی سەرەكی لە نێوانیان پرسی پارێزگاری كەركوك بوو، بێگومان یەكێتی بەمافی خۆی دەزانێت حكومەتی خۆجێی كەركوكی لەدەستدابێت، لە بەرگریكردندا لەكەركوك لە ڕاكردندان، بەڵام لە پۆست و پلەو پایە وەرگرتندا، كەس ڕێگا بەوەی تر نادات، خۆزگە لە بەرگری كردن لەكوردستانیش هەروا لێهاتووبان، ، بۆیە تائێستا هیچ ڕێككەوتنێكی بەهێز دیارنییەو تەنها خۆنمایشكردنە.

٢٨ساڵە دەسەڵاتی هەرێمی كوردستان لە سەر سكی خەڵك بەڕێوەدەچێ و ئەو موچە و ئاو و كارەبایەی دەیدەنە خەڵك وەك ئەوەی خزمەت دەكا‌ت دەیژمێرن، خۆ ئەوەی دەسەڵاتدارانی هەرێمی كوردستان دەیكەن، ماوەی نزیكەی 19ساڵە شارەوانی بناری قەندیلیش دەیكات، ئەوانەی تر هیچیان موڵكی خەڵك نین، نە تەلارە بەرزەكان و نە بیرە نەوتەكان و نە پارە و سامانەكەی، ئەوانەی ئێستا بەناو دەكرێن بە كەسایەتی بەهێز بۆ دەسەڵاتێكی بەهێز، هەر ئەوانەبوون و لەژێر دەسەڵاتی ئەواندابوو، گەندەڵی، دزی، تاڵان، هێنانی سوپای داگیركەران، ڕاكردن لە شەنگال و ڕادەستكردنی كەركوك و دروست كردنی قەیرانەكان پەیدابوون، دەبێ جارێك ئەو كەسایەتییانەو ئەو پارت و دەسەڵاتە بڵێت؛ من دۆڕاوو هاوبەش بووم لەهەموو خراپییەكان، گەلی كوردستان هاوكارمان بن، بەڵكو چوار ساڵی داهاتوو بتوانین خزمەت بكەین، واتا ئەو شێوازە خۆ لەسەر كۆمەڵگە دیتن واز لێبێنن، لانی كەم تائێستا بارێكی گران و سیمایەكی ڕەزا قورستان هەبوو، بەڵكو لەمەودوا بتوانن خەڵك لەگەڵتان ئاشتبێتەوەو بەهاوبەشی خزمەت بكەن.

بێدەنگی لەبەرامبەر داگیركەری

لەدوای تێكدانی پرۆسەی دیالۆگ و دانوستان لەلایەن دەوڵەتی تورك و خودی ئەردۆغانەوە لە 2015، هەمانكات دەستپێكردنەوەی خولێكی نوێ لە شەڕی داگیركاری، قۆناخی شەڕی خۆسەری لەشارەكانی باكوور، پاشان هێرش و داگیركردنی هەرێمی عەفرین لە رۆژئاوا، هەروەها ئۆپەراسیۆنەكانی داگیركردنی هەرێمەكانی پارستنی مەدیا لە حەفتانینەوە تاكو قەندیل، بێگومان ئەوەش بەیارمەتی و رێنوێنی ئەمریكا و هاوپەیمانی ناتۆیە، مەبەستی ئەو هێزانە و داگیركەران دیارە، نایانەوێت گەلی كورد لە نەخشەی نوێی ڕۆژهەڵاتی ناوەڕاستدا هەبێ، واتا كوردستان و كورد وەك چۆن لە سەدەی ڕابردوو بە نەبو ئەژمار دەكرا بەهەمان شێوە لە سەدەی بیست و یەكیش نایانەوێت كورد بوونی هەبێت، مەگەر تەنها بیانەوێت هێزی چەكداری كورد بۆ مەرامی داگیركاری و هەژمونی خۆیان لەناوچەكەدا بەكاربێنن.

دەوڵەتی داگیركەری تورك بەنوێترین تەكنیك و تەكنەلۆژیای سەربازی نوێ هێرشەكانی دەكات لە بەرچاوی ڕای گشتی جیهان، بەڵام هەموویان لێی بێدەنگن و بە پێچەوانەوە یارمەتییەكانیان بۆ دەوڵەتی داگیركەری تورك بەردەوامە، دەوڵەتی ئێران كە لە لاوازترین كاتی خۆی دایە لە تەمەنی چڵ ساڵی ڕابردووی، ئەویش لە بچوكترین دەرفەتدا گورزی خۆی لە بزاڤی كوردی دەوەشێنێ، یان بە بێدەنگی گڵۆپی سەوز بۆ داگیركەری تورك هەڵدەكات، نمونەی داگیركردنی كێوی شەكیف..

دەوڵەتی داگیركەری تورك مەبەستیەتی لەهێرشەكانی لە 2015وە تاكو ئەمڕۆ گورزێكی كەمەرشكێن لە گەریلابدات، تابتوانێ ڕێبەر ئاپۆ لەزیندان بێ كاریگەر بكا و ئەنجامەكانی دوای شەڕی داعش خۆی دروێنەیان بكات، بەرخودانی گەریلا و گەل پێكەوە لە عەفرینەوە تاكو قەندیل، بەهاوبەشی لەگەڵ جەماوەری كوردستان، بەتایبەتیش لەوبارەوە خەڵكی باشوور، ڕۆڵێكی بەرچاویان بینی، ئەگەر ئێستاش ڕێگری و فشار و سەركوتكردنی دەسەڵات نەبێ، گومانی تێدا نیە، زۆرینەی خەڵكی باشوور رۆحی خەڵكی شیلادزێیان هەیە و كەسیان چارەی دەوڵەتی توركیان ناوێت و دەیانەوێت لە شەو رۆژێكدا شاربەدەریان بكەن، خۆپیشاندانەكانی خەڵك لە دژی داگیركەری عەفرین، پشتیوانی بۆ شۆڕشی ڕۆژئاوا، ئامادەباشی و ناڕەزایی نیشاندان بەرامبەر هێرشكردنە سەر قەندیل ئەوانە هەموو ئەو چەند نمونەیەن لەو سەدان چالاكی و خۆپشاندانەی كە خەڵكی باشوور لەماوەی ئەو چوار ساڵەی ڕابردوو نیشانیانداوە، لە شیلادزێش گەیشتە لوتكە.

رۆحی بەرخودانی شیلادزێ

خەڵكی دەشتی زێ لە سنوری دێرەلوك و شێلادزێ و سیریێ، واتا سنوری عەشیرەتەكانی نێروەو ڕێكان و دۆسكی و هێتوتی و ئۆرەماری و بەشێكیش لە زێباری، ناوەندیش رێكانیەكانن كە زۆرینەی ئەو دەڤەرە پێكدێنن، خەڵكی شێلادزێ و دەوروبەری بە مەردایەتی و خاوەن لەیەكتری دەركەوتن و لەتەنگانە بەهانای یەكترەوە چوون و پەسەندنەكردنی زۆرداری و داگیركاری، لە دابونەریتی لەپێشینەی ئەو هەرێمەیە، لەسەردەمی بەعس لەو هەرێمانە بە سەدان كەس لە ڕیزی بەرگری نیشتماندابوون و پێشمەرگەبوون، ئەگەر هەڵەی سەركردایەتی بزاڤی ئەیلول نەبوایە و خیڵگەرایی لەسەر حاكم نەبووایە، بێگومان زۆرینەی خەڵكی ئەو هەرێمە لە خزمەت پرسی نەتەوەكەیدا دەبوو.

لە دوای دەركەوتنی بزووتنەوەی ئازادیی كوردستان بە پێشەنگایەتی پەكەكە، خەڵكی ئەو دەڤەرانە چ لە ساڵانی هەشتاكان، چ لە ساڵانی نەوەدەكان و بەتایبەتی تریش لە ساڵانی دوو هەزار بەدواوە زۆر زیاتر بەپیر خزمەتە نیشتمانیەكانەوە دەچن، دەیان كوڕو كچی ڕێكانی و زێباری و دۆسكی و ئورەماری و نێروەیی بەشدارییان لە ڕیزەكانی شۆڕشدا كردوەو چەندین كەسیشیان گەیشتوونەتە كاروانی شەهیدان، دواینیشیان هەڤاڵ دەمهات زیندان بوو لە عەشیرەتی ڕێكانی.

ڕۆژانە خەڵكی ئەو دەڤەرانە لەگەڵ هێزەكانی گەریلا لەناو جموجۆڵ و هاوكاریدان، واتا ئەو خەڵكە لە خۆشی و ناخۆشیەكانی شۆڕش بەشدارە‌.

لەوانەیە بگوترێ ئەو خۆپیشاندان و سەرهەڵدان و هێرشكردنانەی سەر بنكەو بارەگاكانی دەوڵەتی توركی داگیركەر لە سەرەتای ساڵدا هەڕەمەكی و بێ پێشینەبوبێت و كاردانەوەیەكی لەناكاوبووبێت، بەڵام  لە ڕاستیدا خەڵكی شیلادزێ و دەوروبەری پێویستییان بە هیچ پارت و ڕێكخراوێك نییە ڕێنماییان بكات، چونكە ئەوان خۆیان رێكخستووە، لایەنێكیان بە دابونەریتی كۆمەڵگەی عەشیرەتی، لایەنێكیش تێكەڵ بوونیان لەگەڵ شۆڕشگێڕان و تێكۆشانی ئازادیخوازی، خۆی لەخۆیدا خەڵكی باشوور بەگشتی خەڵكێكی سیاسییە و دوو سەد ساڵە لەناو تێكۆشانی سیاسی دایە، بۆیە ناكرێ وابزانرێ ئەو ڕۆحەی لەبەرامبەر داگیركەری دەركەوتووە ڕووداوێكی لەناكاوەو بێ ڕێكخستن بووە، هەمانكات ناكرێ وابزانرێت تەنها بەوەندەش توڕەیی ئەو خەڵكە دامركاوەتەوە، بەڵكو لەهەر دەرفەتێكدا دەكرێ بەهێزتر و بەگوڕتر دەركەوێ، واتا قسە و لێدوانەكانی سەرۆكی حكومەتی هەرێمی ئەوكات گوایە ئەوانەی هێرشیان كردۆتە سەر دوژمن لە شیلادزێ(گێرەشێوێنن)یان بێدەنگی و بەپیرەوە نەچوونی پارت و لایەنە سیاسییەكان و خۆدزینەوە لە پشتیوانیكردن و بەردەوام كردنی ئەو سەرهەڵدانە و توڕەییەكەی ساردنەكردوونەتەوە، چونكە هەبوونی داگیركەری و هەموو رۆژێكیش هێرشكردنە سەر خەڵك و ڕێگریكردن لە ئاوەدانكردنەوەو چاندنی ڕەزو باخ و كۆكردنەوەی بەرهەمەكان، هەروەها دەستكەوتەكانی باشوور كە بەخوێنی دەیان هەزار شەهید بەدەستهاتوون، ئەمڕۆ لەژێر مەترسی پۆستاڵی داگیركەریدان، بێگومان ئەوانە هەموویان بەردەوامن، بۆیەش ڕق و قین و توڕەیی خەڵكی شیلادزێش بەردەوامە، خەڵكی دەڤەری دەشتی زێ قۆناخەكەی ڕاست خوێندەوە، بەڵام دەسەڵاتی هەرێم پێچەوانە تەماشای ڕووداوەكان دەكات.

ئەركە هەنووكەیەكانمان

هێرشەكانی داگیركەری بەهەموو هێزی خۆی و بەپشتیوانی نێودەوڵەتی بەردەوامن‌، ئۆپەراسیۆنی داگیركردنی خواكورك و هەرێمی برادۆست درێژە پێدانی ئەو هێرشە داگیركەرییانەن كەتەنها بە بەرخودان و یەكێتی نێوان كوردان دەتوانرێت تێكبشكێنرێن، گەریلا بەهەموو ئیرادەو تواناكانی لەسەنگەری بەرگریدایە و هەر ڕۆژ داستانی نوێ تۆمار دەكات. هێزی پاراستنی جەوهەری باشووریش پەیامێكی ترە بۆ داگیركەران، گەلی كوردستانیش لە ناوەوەو دەرەوەی وڵات لە شەش مانگی رابردوو بە چالاكی مانگرتن توانییان پێشەنگایەتی بۆ قۆناغێك بكەن و دەرگای ئیمرالی بكەنەوە، تێكشكاندنی سوپای داگیركەری تورك لە خواكورك و هەرێمی برادۆست، بۆ دواجار تێكشكاندنی فاشیزمە، چونكە بەو شێوەیە ئەكەپە و مەهەپە دەسەڵاتی ئیستەنبوڵ و تەواوی توركیاشی لەدەست دەچێت.

دەسەڵاتدارانی هەرێمی كوردستان پێویستە دەسبەرداری ئەو زهنیەتە كلاسیكە ببن(بۆیە دەوڵەتی تورك هێرش دەكاتە سەر خاكی هەرێم، چونكە گەریلای پەكەكەی لێیە)ئەگەر پەكەكە نەبێ بێگومان بەئاسانی داگیركەران مەرامەكانیان پێكدێت، بۆیە هێشتا كات ماوەە تاكو بتوانین پێكەوە ڕووبەڕووی داگیركەری ببینەوە، ئەگینا مێژو لێیان نابورێت. لەكاتێكدا كە داگیركەر هەر ڕۆژ چەمبەری لەسەر هەرێم تەنگ دەكاتەوە، زەماوەندی وەرگرتنی پۆستەكان بەهاناتانەوە نایەت، بەڵكو بەرخودان و كەوتنە سەنگەری بەرگری دەتوانێ دەسكەوتەكان بپاریزێ و ئیرادەیەكی نوێ نیشان بدات.