سەرۆكایەتی پەرلەمان سەبارەت بە داگیرکارییەکانی تورک وەڵامی پەرلەمانتاران ناداتەوە

دەستەی سەرۆكایەتی پەرلەمانی هەرێمی كوردستان دوای زیاتر لە ٤٠ ڕۆژ تاوەكو ئێستا وەڵامی داواکاری ئەو پەرلەمانتارانەی نەداوەتەوە كە داوایان کردبوو پەرلەمان دانیشتنێکی تایبەت لەسەر پرسی بۆردومان و داگیرکارییەکانی دەوڵەتی تورک بکات.


کەمپینی دەستپێشخەریی دژی داگیرکاریی، ڕۆژی ٢٠ی حوزەیرانی ئەمساڵ ڕاگەیەندرا و ڕۆژی ٣ی تەموز ئەنجامی کەمپینەکەیان لە یاداشتێکدا بە واژۆی ٨٩١ کەسەوە ڕادەستی نووسینگەی سلێمانی پەرلەمانی هەرێمی کوردستان و ئەنجومەنی نوێنەرانی عێراق، کرد و تیایدا لە چەند خاڵێکدا داوایانکرد سنور بۆ په‌لامار و داگیركارییەکانی توركیا بۆ سه‌ر خاكی هه‌رێمی كوردستان دابنرێت.

دوای پێشكەشكردنی واژۆکان ڕۆژی ٤ی تەموز ١٥ پەرلەمانتاری فراكسیۆنە جیاجیاكانی پەرلەمانی هەرێمی كوردستان، واژۆیان کۆکردەوە و بە فەرمی داوای دانیشتنی تایبەتیان لەسەر پرسی داگیرکاریی ئاراستەی سەرۆكایەتیی پەرلەمان كرد، بەڵام تاوەكو ئێستا دەستەی سەرۆكایەتی پەرلەمان وەڵامی داواکەیانی نەداتەوە .

لەوبارەیەوە دیاری ئەنوەر، لە فراكسیۆنی نەوەی نوێ و یەكێك لەو پەرلەمانتارانەی واژۆی كۆكردۆتەوە و ئاراستەی دەستەی سەرۆكایەتی پەرلەمانی هەرێمی كوردستانی كردووە بە ڕۆژنیوزی وت: "تا ئێستا دەستەی سەرۆكایەتی پەرلەمانی هەرێمی كوردستان بە شێوەیەكی فەرمی وەڵامی داواكەی نەداتەوە".

وتیشی: ئەوكات كە واژۆكانمان پێشكەش كرد دكتۆرە ڤالا سەرۆكی پەرلەمان بوو، بە زارەکیش بۆ دانیشتنەکە پێموت بەڵام وەڵامی نەدایەوە، لە ئێستاشدا پەرلەمانی هەرێمَی كوردستان كەوتووەتە ناو پشوو، بۆیە داوامان لە دكتۆرە ڕێواز فایەق نەكردوە، هەركاتێك پشووی پەرلەمان تەواوبێت هەوڵەكانمان دەست پێدەكەینەوە بۆ ئەوەی پەرلەمانی هەرێمی كوردستان دانشتنێكی تایبەت بەو پرسە ئەنجامبدات.

 دیاری ئەنوەر، ئاماژەی بۆ ئەوەشکرد کە چاوەڕوان دەکەن بۆ ئەوەی دەستەی نوێی سەرۆكایەتی پەرلەمان بڕیار لە بارەی دانیشتنەکەوە بدات.

ک.س