ئەمینداری گشتیی یەکگرتووی ئیسلامی کوردستان لەبارەی داگیرکارییەکانی دەوڵەتی تورکەوە دەڵێت، ئێمە دەڵێین شکاندنی سیادەی عێراق شکاندنی دەستوور، داگیرکاریی لە ئەدەبیاتی ئێمەدا نییە و هەروەها، پەكەكە بە بیانوو دەزانێت بۆ هێرشە داگیركارییەكانی دەوڵەتی تورك.
ئەمڕۆ، سەلاحەدین بەهادین، ئەمینداری گشتیی یەکگرتووی ئیسلامی کوردستان لە بارەگای سەرەکی خزبەکەی لە شاری سلێمانی، کۆنگرەیەکی ڕۆژنامەنووسی ئەنجامدا، لەبارەی ئەنجامدانی زنجیرە سەردان و دیدارێک، لەگەڵ سەرکردە و لایەنە سیاسییەکان و باڵیۆزی وڵاتان لە عێراق، کە لە ناویاندا سەردانی باڵیۆزی تورکیاشی کردبوو.
لە وەڵامی پرسیاری پەیامنێری ڕۆژنیوزدا، ئەمینداری گشتیی یەکگرتووی ئیسلامی كوردستان هێرشە داگیركارییەكانی دەوڵە توركی بۆسەر هەرێمی كوردستان بە داگیركاریی ناونەبرد و وتی:”داگیرکاریی لە ئەدەبیاتی ئێمەدا نییە”.
ئەو وتەیەی سەلاحەدین بەهادین، لەكاتێكدایە دەوڵەتی تورك ٦٠بنكەی سەربازیی لەناو خاكی هەرێمی كوردستاندا دروستكردووە و هەزاران سەربازی تێدا جێگیركردووە، قەدەغەی هاتووچۆی لە ناوچەكانی نزیك لە بارەگاكانیدا ڕاگەیاندووە و تەنانەت دانیشتوانی گوندەكانیش بە چەندین بازگەی توندی سەربازییدا، هاتوچۆ دەكەن.
بۆ پاساو هێنانەوە بۆ هێرشە داگیركارییەكانی دەوڵەتی تورك، سەلاحەدین بەهادین، ئاماژەی بە ڕێککەوتنێک کرد، كە لەنێوان عێراق و تورکیا كراوە، لە کاتێکدا فوئاد حسێن، وەزیری دەرەوەی عێراق لە ماوەی ڕابردوودا بەفەرمی ڕایگەیاند، یەک کۆنووس هەیە لەنێوان عێراق و تورکیا، کە ساڵی ١٩٨٣ لەلایەن تاریق عەزیزی وەزیری ئەوكاتەی دەرەوەی عێراقەوە واژۆ کراوە، كە تیایدا هاتووە: تورکیا دەتوانێت تەنیا پێنج کیلۆمەتر بێتە ناو خاکی عێراقەوە بۆ پاراستنی ئاساییشی نەتەوەیی خۆی، بەڵام دەبێت ٧٢ كاتژمێر پێشتر عێراق ئاگادار بکاتەوەو پاش ٧٢ كاتژمێریش بکشێتەوە، ئەمەش تەنها بۆساڵێک نوسراو.
ئەمیداری گشتیی یەکگرتووی ئیسلامیی، باس لەوەدەکات، کە سەردەمی چەکداریی بەسەرچووە و کێشەکان بە ڕێگای سەربازیی چارەسەرنابن،پێویستە چارەسەری سیاسی بگیرێتەبەر، لە کاتێکدا ڕێبەری گەلی کورد عەبدوڵا ئۆجالان، چەندین جار ئاگربەستی یەکلایەنەی ڕاگەیاندووە و هەموو هەوڵێکی خستووەتەگەڕ بۆ کۆتاییهاتن بە شەڕ و چارەسەری ئاشتییانە و لەو چوارچێوەیەشدا مانفێستی ڕێگاچارەی ئاشتییانەی پێشکەش بە دەوڵەتی تورک کردووە، بەڵام هەموو هەوڵ و هەنگاوەکان لەپێناو ئاشتییدا ڕەتکراوەتەوە و دەوڵەتی تورک بە هێرشی سەربازیی وەڵامی داوەتەوە.
هەروەها، لە کۆنگرە ڕۆنامەنووسییەکەدا لە وەڵامی پرسیاری پەیامنێری ڕۆژنیوز سەبارەت بە هەڵوێستی یەکگرتووی ئیسلامی بەڕوونیی بەرامبەر بە داگیرکارییەکانی دەوڵەتی تورک، سەلاحەدین بەهادین وتی: ئێمە دەڵێین شکاندنی سیادەی عێراق شکاندنی دەستوور و یاسایە و حکومەتی عێراق و هەرێم دەبێت بێنە سەرخەت لەم بابەتەدا، بەڵام بابەتەکە کراوە بە مامەڵەیەک کە لە ئەنجامدا بەشێوەیەک لە شێوەکان تورکیایان دەستکراوە کردووە، جا بە بێدەنگییان بێت یاخود شێوەی تر، تورکیا لەگەڵ حکومەتی هەرێم و عێراق ڕێککەوتووە، بۆ ئەو هێرشانەی ئەنجامی دەدات.
ئەوەشی وت: دواجار شکاندنی سیادە و چارەسەری سەربازی هەڵەیە، هەروەها هێنانی سوپا و بەئامانج گرتنی هاوڵاتی و وێرانکردنی گوندەکان تاوانە، پێویستە بە هەموومانەوە هەوڵبدەین بۆ کۆتاییهاتنی.
لە بەشێکی قسەکانیدا سەلاحەدین بەهادین، پەکەکە دەکاتە بیانوو بۆ هێرش و داگیرکارییەکانی دەوڵەتی تورک، لە کاتێکدا یەکەم هێرشی فراوانی داگیرکاریی دەوڵەتی تورک بۆسەر باشووری کوردستان لە ساڵی ١٩٨٣دابوو، کە ئەوکات پەکەکە نە لە باشووری کوردستاندا بوو نە خاوەن هێزی چەکداری بوو.
س.س
