سەنتەری میترۆ پێشێلکارییەکانی بەرامبەر ڕۆژنامەنووسان ئاشکرا دەکات

سەنتەری میترۆ، ئەو پێشێلکاریانەی ئاشکراکرد، کە لەلایەن هێزە ئەمنییەکانەوە بەرامبەر ڕۆژنامەنووسان ئەنجامدراوە لە ماوەی قەدەغەی هاتووچۆدا، دەشڵێت: كاری ڕۆژنامەنووسان بەكەم تەماشا نەكەن، دەستهەڵگرن لە ڕێگرتن و هەراسانكردنیان، ڕۆژنامەنووسانیش لەناو جەرگەی شەڕی ڤایرۆسی كۆرۆنان، كارەكەیان شایەنی ڕێزە.


سەنتەری میترۆ بۆ داکۆکیکردن لە ڕۆژنامەنووسان، لە ڕاگەیەندراوێکدا ئاماری پێشیلکاری بەرامبەر ڕۆژنامەنووسان ئاشکراکرد و تێیدا دەڵێت: بە گوێرەی بەیانی ژمارە ١١ كە لە ١٣ی ئازار دەچووە، واژۆی ڕێبەر ئەحمەد، وەزیری ناوخۆی لەسەرە و ئاڕاستەی هەردوو پارێزگای هەولێر و سلێمانی كراوە"بڕیاری ڕاگرتنی هاتووچۆ لە نێوان شارەكاندا، ڕۆژنامەنووس و كارمەندانی دەزگاكانی ڕاگەیاندن ناگرێتەوە، بە مەرجێك لە كاتی هاتن و چووندا باجی ئەو دەزگایەیان پێبێت كە كاری تێدادەكەن.

لەبەشێکی دیکەی ڕاگەیەندراوەکەدا سەنتەری میترۆ ئاماژەی بە پێشێلکاریەکان کردووە و دەڵێت: ئەو پێشێلكاریانەن كە لە 3 هەفتەی ڕابردوو گەیشتووە بە سەنتەری میترۆ و تۆمار كراون بریتین لە:

• نیوەرۆِی ٢٥ی ئازار لە ناحییەی چوارقورنەی سەر بە ئیدارەی ڕاپەڕین بازگەیەكی هێزەكان ٧٠هێزی پێشمەرگە، ڕێگرییان لە دوو تیمی كەناڵی سپێدە و پەیام كرد، (بروا عەلی،بەرزان ئەحمەد، رێناس ئەرسلان) چوون بۆ وەرگرتنی ئاماری توشبووان بەڵام وەك خۆیان باسیدەكەن " هێرشیان بۆ هێنیان و سوكایەتیان بە تیمەكان كرد".
• نیوەرۆی ٢٤ی ئازار لەكاتی ڕووماڵكردنی جموجۆڵی لەناكاوی بازاڕی دۆلارفرۆشانی شاری سلێمانی، هێزێكی ئاسایشی ناوخۆ بە دەمانچەی كارەبایی هێرشیانە كردە سەر تیمێكی كەناڵی ناوخۆییBMC ، كە پێك هاتبوون لە وێنەگرو پەیامنێری كەناڵەكە (زانا جەلال، پێشەوا بەختیار).
• ڕۆژی ٢٢ی ئازاری ٢٠٢٠، لە كاتی ڕوماڵی ڕاستەوخۆدا لە شاری سلێمانی كامێرامانی سایتی ناسنیوز (ئاودێر عومەر) لەلایەن هێزێكی ئاسایشەوە ڕێگیری لێكراو و ئازار درا.
• ڕۆژی ٢٢ی ئازار بنكەی پۆلیسی داسنیا لە پارێزگای دهۆك تیمی كەناڵی سپێدەیان دەسبەسەر كرد (ئازاد سعید،پەیامنێر، محمد حسێن،كامێرامان)
• ڕۆژی ٢٠ی ئازار لەسەر سكاڵای ئەندامێكی پەرلەمانی كوردستان كوردستان، ئومێد حاجی بەڕۆشكی لە سایتی پرس میدیا لەلایەن بنكەی پۆلیسی نەررۆز دەستبەسەركرا.
• نیوەرۆی ٢٠ی ئازار (سەفین حەمید و شڤان هەركی) لە ئاژانسی AFP و میدل ئێست ئیمێجسMiddle East Images، ویستویانە بچنە ئاكرێ پابەندبوونی هاوڵاتیان بە رێنمایی تەندروستی و بریاری قەغەكردنی هاتووچۆن روماڵبكەن، لە بازگەی پردی بێخمە رێگرییان لێكرا.
• رۆژی ١٤ی ئازار رێگری لە بێژەری كەناڵی NRT هەكار ئامێدی لە چوارتاوەو بەرەو ئۆفیسی كەناڵ دەچێت لە رێگادا لە بازگەی سیتەك رێگری لێكراوە، كارمەندانی بازگەكە پێیان ووتوە تەنها رێگە بە هێزی ئەمنی دەدەین.
• لە 7ی ئازار لە لایەن پۆلیسی شەقلاوە، هونەر مزوری ، كارمەندی جەزیرە دەست بە سەر كرا، بە كەفالەتی ١٠ ملیون دیناری ئیراقی ئازادكرا، دۆسییەكەی پەیوەندی بە پۆستێكی فەیسبەكەوە هەبوو سەبارەت بە ڤایروسی كورونا.

• رۆژی ١ی ئازار لە كۆمەڵگەی گومرگی حاجی ئۆمەران، لەناحیەیی حاجی ئۆمەران سەر بەقەزای چۆمان لە سنوری پارێزگای هەولێر رێگری كرا لە پەیامنێری رۆژنیوز (زۆزگ حەمەد مینە)، ئەو ویستوێتی وەك دەزگاكانی میدیای تر كە لەو شوێنە بوون ڕوماڵی جموجۆڵی بازرگانی و ڕێوشوێنە تەندروستی و ئەمنیەكان بكات بۆ ڕوبەڕوبونەوی ڤایرۆسی كۆڕۆنا.
د.ع