شرۆڤەكارێكی سیاسی عێراقی ڕایدەگەیەنێت، بۆردومان و هێرشەكانی توركیا قبوڵ كراو نین، چونكە زیان بەناو و ناوبانگی عێراق دەگەیەنێت و دەڵێت: حكومەتی عێراق دەبێت هەنگاوی جدی تر بگرێتەبەر دژی هێرشەكانی توركیا.
عەبدوڵا كیانی، شرۆڤەكاری سیاسی عێراق بە ڕۆژنیوزی ڕاگەیاند، بۆردومانكردنی ناوچەكانی كوردستان بێ گوێدانە ئەوەی لەلایەن توركیاوە بووبێت یان ئێران، جێگای قبوڵكردن نییە، لەلایەن خەڵكی عێراقەوە بە هەموو نەتەوە و مەزهەبەكانەوە.
ئاماژەی بەوەشكرد، وەڵامی حكومەتی عێراق بۆ هێرشەكانی توركیا نابێت ئەوەندە ئاسان بێت، بەڵكو پێویستە توندتر و جددیتر بێت.
دەشڵێت: هێرشەكانی توركیا و ئێران قبوڵكراو نیە، چونكە زیان بە ناوبانگ و كەرامەتی عێراق دەگەیەنێت، جگە لەوەی هۆكارێكە بۆ لەناوبردنی ژێرخانی عێراق.
ئەو شرۆڤەكارە وتیشی: بە دڵنیاییەوە ئۆپۆزسیۆنێكی ئێرانی و توركیا لە ناوخۆی عێراقدا هەیە و ئەمەش بیانووی بۆردومان و دەستدرێژی ئێران و توركیا نییە، بەڵكو دەبێت ئەو كێشانە لە ڕێگەی گفتوگۆ و لێكتێگەیشتنەوە ئاشتیانەوە چارەسەر بكرێن.
سەبارەت بە بیانوی ئێران و تورکیا بۆ بۆردومانی خاكی عێراق، ئەو شرۆڤەكارە دەپرسێت، ئایا ئێران دەتوانێت بە بیانوی ئۆپۆزسیۆن ئێران ئازەربایجان بۆردومان بكات؟ یان توركیا دەتوانێت ئۆپۆزسیۆن لە قوبرس و یۆنان و باقی وڵاتان بۆردومان بكات؟ و دەڵێت بە دڵنیاییەوە ناتوانیت.
ئاشکرایکرد، پێدەچێت سودانی دوای سەردانەكەی بۆ ئێران، سەردانی وڵاتی توركیاش بكات، سەبارەت بەهێرشی توركیا لەهەرێمی كوردستان و عێراق.
دەوڵەتی داگیركەری تورك لە ناوەڕاستی مانگی نیسانی ئەمساڵەوە بەردەوامە لە هێرشە بەرفراوانەكان بۆ سەر ناوچەكانی هەرێمی كوردستان و عێراق، جگە لە بەكارهێنانی چەكی كیمیایی دژی گەریلا، هەزاران هێرش و پێشێلكاری دژی سەروەری عێراق ئەنجامداوە.
هـ.ئ
