شۆفێرانی تەكسی لە چۆمان و حاجی ئۆمەران گردبوونەوە

شۆفێرانی تەكسی لە چۆمان و حاجی ئۆمەران گردبوونەوە و کاری گواستنەوەی هاوڵاتیانیان ڕاگرت، بەوتەی شۆفێران ئاسایش دوو کەسیانی دەستگیرکردووە و دەست لە کاروباری ئەنجومەنی شۆفێران وەردەدات.


لەبەرامبەر دەستوەردان لە کاروباری ئەنجومەنی شۆفێران و دەستگیركردنی دوو لە ئەندامانی ئەنجومەنی شۆفێرانی چۆمان لە لایەن ئاسایشەوە، ئەمڕۆ شۆفێرانی تەكسی لە چۆمان و حاجی ئۆمەران گردبوونەوە و کاری گواستنەوەی هاوڵاتیانیان ڕاگرت.

هەڵگۆرد ناوەندەیی، یەكێك لە شۆفێرانی تەكسی بۆ ڕۆژنیوز، وتی: ئاسایشی حاجی ئۆمەران دەیەوێت بەشێوەی مەركەزیەت هەیكەلیەتی ئەنجومەنەكەمان هەڵوەشێنێـت و خۆی بەخواستی خۆی ئەنجومەنێك دیاری بكات، بۆیە ئێمەش ئەو دەست وەردانەی ئاسایش قبوڵ ناكەین و داواكارین ئاسایش دەستوەردان لە كارەكانمان ڕابگرێت.

وتیشی، لەسەر ئەو كارە ئاسایش دوو لە هاوڕێیانی ئێمەی دەستگیركردووە، بەناوەكانی (عەبدولڕەزاق ناوەندەیی و كاكە سەلیم) كە ئەندامی ئەنجومەنن و بەرپرسی خەتی چۆمان و حاجی ئۆمەرانن كە لەگەڵ هەموو شارەكانی هەرێم یەكتری دەبەستێتەوە، بۆیە دەمانەوێت بەزوترین كات ئەو هاوڕێیانەشمان ئازادكرێن، چونكە ئێمە وەك شۆفێران خۆمان ئەو کەسانەمان هەڵبژاردووە.

ئاماژەی بەوەشكرد، کە ئەوان دژی دەستوەردانی ئاسایشن و داوادەکەن وەزارەتی گواستنەوە و گەیاندن کێشەکەیان چارەسەربکات و هەڵبژاردن ئەنجامبدات.

شۆفێران ئاماژە بۆ ئەوەشدەکەن کە "تا ئەو هاوڕێیانەمان ئازادنەكرێن و ئاسایش دەست وەردان لە كارەكانمان ڕانەگرێت دەست بە كاركردن ناكەینەوە و بەردەوامدەبین لە ناڕەزایی دەربڕین".

شۆفێرانی چۆمان لە ١٣٨ کەس پێکدێن و بەشێوەی هەڵبژاردن ٣ كەسیان وەك نوێنەری خۆیان لە ئەنجومەنەکەدا دیاریكردووە.

ک.س