سێشەممە, 17 يول 2018 – 12:37 ڕۆژنیوز ـ هەولێر
بەیانی ئەمڕۆ ژمارەیەك شۆفێری بارهەڵگر لە بازگەی خازر لەسەر ڕێگەی هەولێر-موسڵ گردبوونەوە و ڕێگەكەیان بۆ ماوەی چەند كاتژمێرێك داخست، ئەوان دژی زیادكردنی باج لە سەریان گردبوونەوە.
سەلاح محەمەد، یەكێك لە شۆفێرەكانی بەشداربووی گردبوونەوەكە، بە ڕۆژنیوزی ڕایگەیاند: ئێمە وتمان ڕێگاكە ناكەینەوە تا بەرپرسان بە دەم داواكەمانەوە نەیەن، ئێمە ناڕازین بەرامبەر بە زیادكردنی كرێی سۆنەر و باج و ڕسومات لەسەرمان، بەڵام بەرپرسان هاتنەلامان و بەڵێنی جێبەجێكردنی داواكارییەكانیان پێداین.
ئاماژەی بەوەشكرد: پێشتر كرێی سۆنەر و پشكنین تەنها یەك هەزار دینار بوو، بەڵام ئێستا لە پێنج هەزارەوە تا ٥٠ هەزاریش زیادیان كردوە لەسەرمان و هەندێك جار بازگەكان بە ویستی خۆیان پارەمان لێدەسەنن.
ئەو شۆفێرە وتیشی: “داهاتی وەرگرتنی پارەی سۆنەر و پشكنین و باج لێمان بۆ حكومەت نیە و وەك ڕەشوە و سەرانە ئەو پارەیەمان لێدەسەنن، ئێمە ڕێگەكە چۆڵناكەین تا باجەكە وەك جاران لێنەكەنەوە”.
ئەو شۆفێرانە پێداویستی كەرەستەی خواردەمەنی و بیناسازی لە هەرێمی كوردستانەوە دەگوازنەوە بۆ موسڵ و شارەكانی دیكەی عێراق.
ك.ك/ب
