شیوعی لەسەر کوشتنی هاوڵاتییەک لەلایەن سوپای تورکەوە هاتەدەنگ

ڕێكخراوە جەماوەریەكانی حزبی شیوعی كوردستان، لە سۆران، لەسەر بۆردوومانکردنی ئۆتۆمبێلی هاوڵاتییەکی مەدەنی لەلایەن سوپای تورکەوە هاتە دەنگ و داوا لە حکومەتی هەرێمی کوردستان و حکومەتی عێراق و ڕای گشتی جیهان دەکات، کە بێنەدەنگ لەبەرامبەر داگیرکارییەکانی دەوڵەتی تورک لە باشوری کوردستان.


ئێوارەی دوێنێ لەناوچەی گۆشینە، لە دەڤەری برادۆست، فڕۆکە جەنگییەکانی سوپای تورک، ئۆتۆمبێلی هاوڵاتیەكی مەدەنیان کردە ئامانج، لەئەنجامدا هاوڵاتییەک بەناوی مەنسور، گیانی لەدەستادا و هاوڵاتییەکی دیکە بەناوی پێشۆ، برینداربوو، کە هەردووکیان بران و دانیشتووی شارۆچکەی سۆرانن.

ڕێكخراوە جەماوەریەكانی حزبی شیوعی كوردستان، لە سۆران، لەسەر ئەو هێرشەی سوپای تورک بۆسەر هاوڵاتیانی مەدەنی لە ڕاگەیەندراوێکدا ئیدانەی هێرش و داگیرکارییەکانی دەوڵەتی تورک دەکەن لە باشوری کوردستان و دەڵێن: سوپای توركیا بەردەوامە لەپێشێلكردنی سەروەریی خاكی كوردستان و شەهید كردنی هاوڵاتیانی سڤیل، دواین هێرشی فڕۆكە جەنگییەكانی توركیا ئۆتۆمبێلی هاوڵاتیەكی دانیشتووی دەڤەری باڵەكایەتی كردە ئامانج و لە ئەنجامدا دووبرای یەك خێزان شەهید و برینداربوون.

لە درێژەی ڕاگەیەندراوەکەدا هاتووە: بەهۆی بەردەوامی تۆپباران و بۆردوومانی فڕۆكە جەنگیەكانی توركیا، تادێت گوندنشینان ڕووبەڕووی ترس و فشاری زیاتر دەبنەوە، ئەمەش وێڕای زیانە گیانی و ماددییەكان سەقامگیریی ناوچە سنووریەكانیش ڕووبەڕووی ئاڵۆزیی زیاتر بووەتەوە.

لە کۆتایی ڕاگەیەندراوەکەیاندا ڕێكخراوە جەماوەریەكانی حزبی شیوعی كوردستان، لە سۆران، داوای هەڵوێست دەکات دژی دەوڵەتی تورک و دەڵێن: ئێمە ئیدانەی ئەم ڕووداوە دەكەین و داواكارین حكومەتی عێراق و هەرێم و ڕای گشتی جیهان، چیتر لەئاست بەزاندنی خاكی كوردستان بێدەنگ نەبن و هەڵوێستی جیدیان هەبێت، هەوڵەكانیان بخەنە گەڕ بەمەبەستی ڕاگرتنی تۆپباران و بۆردوومانی سوپای توركیا و كاری جدی بكرێت لەپێناو گەڕانەوەی ئارامیی و سەقامگیریی بۆ دانیشتوانی ناوچە سنورییەكان .

د.ع