شەهیدانی سێدارە و شەهیدانی مانگی گوڵان بەبیرهێنرانەوە

هەینی, 8 ماي 2020 – 15:49  ڕۆژنیوز – سلێمانی

دوانیوەڕۆی ئەمڕۆ لە شاری سلێمانی لە پارکی هەواری شار، شەهیدانی سێدارە، “فەرزاد کەمانگەر، شیرین عەلەمهولی، عەلی حەیدەریان و فەرهاد وەکیلی”، هەروەها شەهیدانی دیکەی مانگی گوڵان لەلایەن خانەوادەی شەهیدانی ڕۆژهەڵاتی کوردستانەوە بەبیرهێنرانەوە و ڕاگەیەندراوێک خوێندرایەوە کە لەلایەن ئازاد سەقزییەوە پێشکەشکرا. 

لە ڕاگەیەندراوەکەدا هاتووە: لە ڕۆژی ١ی گوڵانی ٢٠٠٨ـدا، شەش ئەندامی ڕاگەیاندنی پژاک لە ئەنجامی هێرشی ئاسمانیی دەوڵەتی داگیرکەری تورک شەهیدبوون، هەروەها ٥ی گوڵانی ساڵی ٢٠١٠، پینج گەریلا لە پیلانێکدا لە داڵاهۆ ژەهرخوار و شەهید کران،  ٩ی گوڵانی هەمان ساڵیش، فەرزاد کەمانگەر، شیرین عەلەمهولی، عەلی حەیدەریان و فەرهاد وەکیلی، بە شێوەیەکی زاڵمانە لەسێدارەدران، کە دەیان نمونەی لەم شێوەیەمان هەیە. 

هەروەها هاتووە: لە دۆخی هەستیاری نەخۆشیی کۆرۆنادا، چاوەڕێ دەکرا کە دۆخی زیندانیانی سیاسی لە زیندانەکانی ئێران، تورکیا و لە زیندانەکانی پارتیدا، باش بکرێت، بەڵام دۆخی هەموویان لە مەترسیدایە، بەم بۆنەیەوە پێویستە گەلەکەمان لە ڕۆژهەڵاتی کوردستان و پارچەکانی دیکە، لەدژی ئەم سیاسەتە هەستن و هەڵویستی خۆیان نیشان بدەن. 
لە کۆتاییشدا هاتووە: هەموو شەهیدان بەبیر دێنیینەوە و وەفاداریی خۆمان بۆ شەهیدان دووبارە دەکەینەوە. 

ک.س