عوسمان قاسم: هاوپەیمانێتی ٤ پارتی ئێزدی گرنگ و پێویستە

ئەندامێكی بزوتنەوەی ئێزدییان بۆ چارەسەری و پێشكەوتن لەبارەی هاوپەیمانێتی چوار پارتی ئێزدی ڕایگەیاند: ئەم ڕێككەوتن و هاوپەیمانێتییە، بۆ كۆمەڵگەی ئێزدی، كارێكی گرنگ و پێویستە. 


لە ٨ ی ئابدا لە شارۆچكەی سنونێ‌-ی سەر بە شەنگال، سەرۆك و بەڕێوەبەرانی چوار پارتی ئێزدی كۆبوونەوە و ڕێككەوتنێكیان واژۆكرد كە لە سێ‌ خاڵ پێكهاتووە، پارتەكان بریتین لە پارتی ئازادی و دیموكراتی ئێزدییان-پادێ‌، پارتی پێشكەوتووی ئێزدیی، پارتی دیموكراتی ئێزدییان، بزوتنەوەی ئێزدیان بۆ چارەسەری و پێشكەوتن، ناوەڕۆكی ڕێككەوتنەكە تایبەتە بە ئامادەكاری بۆ هەڵبژاردنی ئەنجومەنی پارێزگاكانی عێراق بەگشتی و ئەنجومەنی پارێزگای موسڵ بەتایبەتی كە بەم شێوەیەی خوارەوەیە:

_ هەرچوار حزبی ئێزدی، پێكەوە بەشداری هەڵبژاردنەكانی پارێزگاكانی عێراق دەكەن.

_ هێزێكی هاوبەشی ئێزدییەكان دروست بكرێت، پێكەوە كار و خەبات بكەن.

_ بەڕێكوپێكی كاردنی هاوبەش بۆ دروستكردنی ئیدارەیەكی فەرمی لە شەنگال، خاڵێكی دیكەی ڕێكەوتنەكەیە.

عوسمان قاسم، ئەندامی بزوتنەوەی ئێزدیان بۆ چارەسەری و پێشكەوتن وتی: بەبۆنەی جەژنی قوربانەوە هیوادارین ئەم جەژنە ببێتە هۆی ئازادبوونی هەموو دیل و دەستگیركراوەكانی ئێمە، ئەم هاوپەیمانێتییە، بەشێوەیەكی باش دەبێتە وەڵامێك بۆ دوژمنانی ئێمە، وە بۆ كۆمەڵگەی ئێزدیش گەلێك پێویست بوو.

عوسمان قاسم وتیشی: ئێمە لە ڕۆژی فەرمانی ٣ی ئابدا، بە بارودۆخێكی گەلێك سەختدا تێپەڕین، لەماوەی ئەم چەند ساڵەدا چەندین جار هەوڵدراوە بۆ پێكهێنانی هاوپەیمانێتییەكی لەم شێوەیە بەڵام نەتوانراوە پێك بهێنرێت، ئێستا كە ئەم هاوپەیمانێتییە پێكهاتووە پێویستە ئامانجی سەرەكی ئێمە ئەوەبێت كە ئەم هاوپەیمانێتییە، دووربێت لەبەرژەوەندی حیزبی و پێویستە هیوا و ئامانجە كانی گەلەكەمان بەدی بهێنین.
 

د.ح