عوسمان گوڵپی، چاودێری سیاسی پشتیوانی پەیامەکەی کەجەکە دەکات و پێیوایە: بۆ پاراستنی دەستکەوتە نەتەوەییەکانمان و ڕووبەڕووبوونەوەی ئەم قۆناغە مەترسیدارە پێویستە یەکگرتووبین، دەشڵێت: هەندێک هێزی ناوخۆ وابەستەی داگیرکەرانن، ئەگەر بەم پەرتەوازەییە بەردەوامبین دەگەڕێینەوە خاڵی دەستپێک.
پەیامەکەی کەجەکە لەبارەی پرۆژەی دەوڵەتی تورک بۆ پاکتاوکردنی گەلی کورد و هاوکارییەکانی پارتی دیموکراتی کوردستان- پەدەکە بۆ ئەو پرۆژەیە، هەروەها بانگەوازییان بۆ یەکدەنگی و یەکگرتوویی لایەنە سیاسییەکان دژی داگیرکاریی، دەنگدانەوەی دروستکردووە و تا دێت پشتیوانی کردن لێی فراوانتر دەبێت، لەم بارەیەوە، عوسمان گوڵپی چاودێری سیاسی لە سنوری پارێزگای سلێمانی بۆ ڕۆژنیوز دەدوێت.
عوسمان گوڵپی، لەسەرەتادا ئاماژەی بەوەدا کە دەوڵەتی تورکیا خەونی فراوانکردنی دەسەڵاتی خۆی و زیندوکردنەوەی ئیمپراتۆریەتی عوسمانی هەیە، لەسەر حسابی نەتەوەکانی دیکە و داگیرکردنی خاکی ناوچەکە، بەڵام ئەردۆغان ئەمەی بۆ ناچێتەسەر و بە زیان بەسەر خۆیدا دەشکێتەوە، بەتەواوی سەرهەڵدان و شۆڕشەکانەوە لە مێژووی کورددا، هەمیشە خاڵی لاوازیان دووبەرەکی ناوخۆ بووە، هەروەها پشتیوانیکردنی هەندێک لە هێزە کوردییەکان بۆ دوژمنانی خۆی، بەداخەوە هەتا ئەمڕۆش درێژەی هەیە.
هەروەها وتی: لەم کاتەدا ئەگەر یەکگرتووبین دەتوانین داگیرکاریی و پلانەکانی تورکیا بچوکبکەینەوە و ڕای نێودەوڵەتی بۆ خۆمان ڕاکێشین، بە یەکگرتوویی و پشتیوانی ناوخۆیی دەتوانین پشتیوانی هەموو ئەو وڵاتانە بەدەستبهێنین کە دژی تورکیان، هەروەها ڕووبەڕووی ئەو قۆناغە ببینەوە کە مەترسییە لەسەر کوردستان و بەتایبەتی باشوری کوردستان.
لەبارەی پەیامەکەی کەجەکەوە ئاماژەی بەوەدا: لەبەر ئەوەی هەر هێزێک و ئاراستەیەکی سیاسی لە باشوری کوردستان وابەستەی وڵاتێکی دەرەکییە و هەر یەک بەجۆرێک پەیوەندی لەگەڵ وڵاتێکی داگیرکەردا هەیە ئەمەش وای کردووە کە یەکێتی نەتەوەیی کورد نەبەسترێت، هەروەها لەم قۆناغەدا گرنگترین شت یەکگرتن و یەکێتی نەتەوەیی گەلی کوردە، ئەگەر یەکگرتووبین دەتوانین دەستکەوتەکانمان بپارێزین و داهاتوویەکی ڕوون بەدەستبخەین، کە دوژمن نەتوانێت زەفەرمان پێبەرێت.
عوسمان گوڵپی، دەشڵێت: ئەگەر بێت و یەکنەگرین و بەم ڕەنگە پەرتەوازەبین ئەوەشی کە هەمانە لەدەستی دەدەین، هەم باشوری کوردستان، قەندیل و کۆبانێ و هەموو دەستکەوتەکانمان لەدەست دەدەین و جاریکی دیکە دەگەڕێینەوە بۆ خاڵی دەستپێک.
ک.س
