عەبدولمەهدی لەگەڵ بارزانی و بەرپرسانی هەرێم کۆبووەوە

عادل عەبدولمەهدی لەگەڵ هەریەک لە سەرۆکی هەرێمی کوردستان، سەرۆکی حکومەت و جێگرەکەی کۆبووە و لەگەڵ مەسعود بارزان-یش لە کۆبوونەوەدایە، بۆ کۆبوونەوە لەگەڵ یەکێتیی-ش دەچێتە سلێمانی.


دوای گەیشتن بە شاری هەولێر و پێشوازییلێکردنی لەلایەن سەرۆکی هەرێمی کوردستانەوە، پێش نیوەڕۆی ئەمڕۆ عادل عەبدولمەهدی، سەرۆکی دەستلەکارکێشاوەی عێراق و شاندی یاوەری لەگەڵ نێچیرڤان بارزانی سەرۆکی هەرێم و دواتریش لەگەڵ مەسرور بارزانی سەرۆکی حکومەت و جێگرەکەی قوباد تاڵەبانی و بەشێک لە وەزیرەکانی هەرێم کۆبوونەوە.

بەپێی ڕاگەیەندراوێکی سەرۆکایەتیی هەرێمی کوردستان، نێچیرڤان بارزانی و عادل عه‌بدولمه‌هدی لە کۆبوونەوەکەدا جه‌ختیان لەوە کردووەتەوە، كه‌ "عێراق نه‌كرێته‌ گۆڕه‌پانی ململانێی هێزه‌ هه‌رێمی و نێوده‌وڵه‌تییه‌كان، هه‌روه‌ها په‌یوه‌ندییه‌كانی عێراق له‌گه‌ڵ وڵاتان له‌سه‌ر بنه‌مای به‌رژه‌وه‌ندیی هاوبه‌ش و ڕێزگرتن له‌ سه‌روه‌ریی عێراق بێت و هه‌موو لایه‌نه‌كان پێكه‌وه‌ كار بكه‌ن بۆ ئاڵۆزترنه‌بوونی زیاتری دۆخه‌كه‌ و گێڕانه‌وه‌ی ئارامی و سه‌قامگیریی، به‌رژه‌وه‌ندییه‌كانی عێراقیش ئه‌وله‌ویه‌تی هه‌مووان بێت".

باس لەوەش کراوە، کە هەر لەو کۆبوونەوەیەدا، كێشه‌كانی هه‌ولێر ـ به‌غدا و دیالۆگی چاره‌سه‌ركردنیان تاوتوێ كراوە.

لەبارەی کۆبوونەوەی دووەمی عەبدولمەهدی کە لەگەڵ سەرۆک و جێگری سەرۆکی حکومەت ئەنجامیدا، تا ئێستا هیچ ڕاگەیەندراوێکی فەرمیی بڵاونەکراوەتەوە.

دواین کۆبوونەوەی عادل عەبدولمەهدی لە هەولێر لەگەڵ مەسعود بارزانی، سەرۆکی پارتی دیموکراتی کوردستان-عێراق-دایە، کە هەتا کاتی ئامادەکردنی ئەم هەواڵە بەردەوامە.

بڕیارە هەر ئەمڕۆ عەبدولمەهدی و شاندەکەی یاوەری سەردانی ماڵی کۆسرەت ڕەسوڵ، سەرۆکی ئەنجومەنی باڵای سیاسیی و بەرژەوەندیی یەکێتیی نیشتیمانیی کوردستان بکات لە شاری سلێمانی و لەگەڵ بەرپرسانی ئەو حزبەدا کۆببێتەوە.

ش.ف