نوسەر و توێژەری بواری فەلسەفە فاروق ڕەفیق، لەبارەی گرنگی کەمپەینی ئازادی ڕێبەر ئۆجالان دەڵێت: ئەو لەسەر دۆزێک لە زینداندایە، لە ئانوساتی قڕکردنی کورددا کوردی زیندووکردەوە، خەباتکردن بۆ ئازادی ئۆجالان لەهەمان کاتدا خەباتکردنە بۆ ئاشتی لە کوردستان و تورکیا و چارەسەرە بۆ کێشەی کورد و هەموو نەتەوەکانیتر.
شەوی ڕابردوو لەلایەن کۆمەڵێک لە ئەکادیمیست، توێژەر، پارێزەر، ڕۆژنامەنووس و مامۆستای زانکۆوە، لە ڕێگای ڤیدیۆ کۆنفرانسەوە کەمپەینێکی ئۆنلاین بۆ ئازادکردنی عەبدوڵا ئۆجالان ڕێبەری گەلی کورد ڕاگەیەندرا، فاروق ڕەفیق نوسەر و توێژەری بواری فەلسەفە، کە یەکێکە لە ئەندامانی کەمپەینەکە، لە چوارچێوەی ڤیدیۆ کۆنفرانسەکەدا لەبارەی گۆشەگیری سەر ڕێبەر ئۆجالان و گرنگی کەمپەینەکەوە قسەیکرد،
د. فاروق ڕەفیق لەبارەی گۆشەگیری سەر ڕێبەر ئۆجالانەوە وتی: ئەو خەباتگێڕێکە و لەسەر دۆزێک لە زیندان دایە، کە لە هەلومەرجێکی تایبەتی تورکیادا کورد کە بەرەو فەوتان و لەناوچوون دەچوو بەهۆی خەباتی ئەو و بزوتنەوەکەی و کەسانی ئازادیخواز، نەتەوەی کورد زیندووبووەتەوە و پرۆسەی پاکتاوکردنی کورد سەرنەکەوت، دۆزکەی ئەو هەر ئەمەیە.
لەبارەی گرنگی کەمپەینەکەوە وتی: خەباتکردن بۆ ئازادی بەڕێز ئۆجالان لەهەمان کاتدا خەباتکردنە بۆ ئاشتی لە کوردستان و تورکیا، هەروەها چارەسەرە بۆ کێشەی کورد و نەتەوەکانی دیکەش، ئەم گرێدراوبوونە گرنگە بیبینین، ئەوکاتە بەڕێز ئۆجالان ئازاد دەبێت کە لە تورکیادا بە کرداری هەنگاوی گەورە دەنرێت بۆ ئاشتی، ئەم ئاشتییەش تەنها بۆ کورد نییە چونکە ئەم بزوتنەوەیەی کە ئەم ئازادیخوازانە دروستیان کردووە سنووری ناسیۆنالیستی تێپەڕاندووە و داوای پێکەوەژیانی هەموو گەلانی ناوچەکە دەکات،
هەروەها ئاماژەی بەوەشدا: بەداخەوە ٢٠ ساڵە ئەم کەیسە جێهێڵراوە بۆ پەکەکە، لە کاتێکە بەتەنها کەیسی پەکەکە نییە، چونکە بەڕیز ئۆجالان ئازادیخوازێکی ڕۆژهەڵاتی ناوەڕاستە، بۆیە دەبێت ئەم کەمپەینەی ئێمە ببێتە هۆی فراوانکردنی ئەم کەیسە، بۆیە دەبێت هەموو ئازادیخوازان و کەسانی خەباتگێڕ بۆ ئازادی ودیموکراسی و مافەکانی مرۆڤ لە ڕۆژهەڵاتی ناوەڕاستدا، بەشداری لەم کەمپەینەدا بکەن.
س.ح
