بڕوا ئەسعەد
فەرماندەیەکی پێشمەرگە ڕایدەگەیەنێت، لە سەرەتای دەستبەکاربونی مەسرور بارزانی تا ئێستا، تورکیا ١٣ جار کامپی شەهید ڕۆستەم جودی بۆردومانکردووە، دەشڵێت: چەندین حزب بوونەتە نۆکەرى تورکیا و هاوکاریی پەدەکە بۆ تورکیا، ساغ بووەتەوە.
هێرش و داگیرکارییەکانی دەوڵەتی تورک بۆسەر باشووری کوردستان بەردەوامە و بێجیاوازیی کوردستانیان دەکاتە ئامانج، دوێنیش مەخمور و ئاغجەلەری بۆردوومان کرد و شەش هاوڵآتی شەهید کرد.
لەوبارەیەوە، غازى فەیسەڵ، فەرماندەی پێشمەرگە لە قەرەچوغ لە سنوورى مەخمور، بە ڕۆژنیوزی وت: وەک یەکێتی بەیاننامەی توندمان لەبارەى هێرشەکانى تورکیا بۆسەر هەرێم دەرکردووە و داوامان کردووە، کە نوێنەرایەتیەکانی تورکیا لە هەرێم و بەغداد بانگ بکرێن و لێپرسینەوەیان لەگەڵدا بکرێت، تا بزانرێت هۆکار چیە هاوڵاتى مەدەنی و بێ چەک شەهید دەکەن؟.
ئەو فەرماندەیەی پێشمەرگە، ڕاشیگەیاند: لە سەرەتای دەستبەکاربوونی کابینەى نۆیەم بەسەرپەرشتى مەسرور بارزانی تا ئێستا، تورکیا ١٣ جار کامپی شەهید ڕۆستەم جودی لە شارۆچکەى مەخمور بۆردوومان کردووە، کە هاوڵاتیانى مەدەنى و بێ چەکى تێدا نیشتەجێن.
غازی فەیسەڵ، ئاماژەی بۆ ئەوە کرد، دەوڵەتی تورکیا دوو ناوی گەورەیان لەخۆیان ناوە و بەناوی خەلافەتەوە ستەم لە مسوڵمانان دەکەن و لەهەمانکاتیشدا بانگەشەی دیموکراسیی دەکەن و هاوڵاتى مەدەنی شەهید دەکەن.
ئەو فەرماندەیەی پێشمەرگە، سەرنجی ڕاکێشایە سەر هاوکارییەکانی دەوڵەتی پەدەکە بۆ دەوڵەتی تورک و وتی: پارتی پەیوەندیەکی باشى لەگەڵ تورکیادا هەیە، کە جێگەی گومانە.
جەختیش دەکاتەوە لەوەی”بۆردوومان و لەشکرکێشەکانی تورکیا بەبێ بوونى چاوساغ بەڕێوە ناچێت” و وتی: ئەو وڵاتە لەڕێگەی چەندین کۆمپانیای جیاوازەوە لەناو شارى هەولێر، دەستیان خستووەتە ناو کاروبارى حکومەتی هەرێم و چەندین حزب-یش بوونەتە جاش و نۆکەرییان، بۆیە دەتوانن بە ئاسانیی کردەوەی تیرۆرستیی لە هەرێم ئەنجام بدەن.
ڕاشیگەیاند: حکومەتى هەرێم بە تەواوی لە دەستی مەسرور بارزانی و پارتیدایە و ئەو سەردانانەی بۆ تورکیا ئەنجامی دەدەن سەرلەبەری جێگەی گومانە، کەس نازانێت لە کۆبوونەوەکاندا باسی چی دەکەن، کە بێگومان هاوکاری ئەوان بۆ تورکیا ساغ بووەتەوە.
لەگەڵ ئەوەشدا، غازى فەیسەڵ، بە پێویستی دەزانێت، هەرچى زووە حکومەتی هەرێم لێکۆڵینەوە لە ڕووداوی تێرۆرکردنەکان و بۆردومانەکانى تورکیا بکات و وتی: لە هەمانکاتیشدا پێویستە حکومەتی عێراقیش بێتە دەنگ و سەروەری خاکی وڵاتەکەى بپارێزێت.
بە هاوکاریی پەدەکە، لە ١٥ی نیسانەوە دەوڵەتی داگیرکەری تورک هێرشی ئاسمانیی بۆ سەر ناوچەکانی زاپ، مەتینا و ئاڤاشین دەستپێکرد و لە شەوی ١٧ی نیسانیشەوە هێرشی ئاسمانیی و زەمینیی پێکەوە دەستیپێکرد و بەپێی ڕاگەیەندراوی هەپەگە، دووژمن گازی ژەهراویی لە هێرشەکاندا بەکارهێناوە.
هەروەها، ڕۆژی ٢١ی ئایار، دەوڵەتى داگیرکەرى تورک لە ڕێگەى فڕۆکەى بێفڕۆکەوانەوە دوو هێرشى بۆسەر ئاغجەلەر لە سنوورى چەمچەماڵ و کامپى شەهید ڕۆستەم جودى لە مەخمور ئەنجامدا و بەهۆیەوە شەش کەس شەهید بوون.
لەشەوی ١٨ی ئایاریش، لە كردەوەیەكی تیرۆرییدا زەكی چەلەبی، پەنابەری سیاسی باكووری كوردستانیان لە گەڕەکى بەختیارى شاری سلێمانی تیرۆركرد.
ئ.م
