سێشەممە, 10 أبر 2018 – 11:52
ڕۆژنیوز- دانا عومەر
فەلەکناس ئوجا، پەرلەمانتاری هەدەپە، جەخت لەسەر گرنگیی بەستنی کۆنگرەی نەتەوەیی دەکاتەوە و ڕایدەگەیەنێت:”کوردان لەگەڵ یەکتر دانووستاندن نەکەن و یەکنەگرن، کۆمەڵکوژیی گەورە پێکدێت”.
ماوەی چوار ڕۆژە شاندێکی پەرلەمانتارانی پارتی دیموکراتی دیموکراتی گەلان (هەدەپە)، لە باشوری کوردستانە و لەگەڵ حزب و لایەنە سیاسییەکان و ڕێکخراوەکانی کۆمەڵگەی مەدەنیی دەکەن، بە ئامانجی هەنگاونان بۆ بەستنی کۆنگرەی نەتەوەیی.
لەوبارەی گرنگیی کۆنگرەی نەتەوەییەوە، فەلەکناس ئوجا، پەرلەمانتاری هەدەپە و ئەندامی شاندەکە بە ڕۆژنیوزی وت: لەدوای پەیمانی سایکس بیکۆ و لۆزان، جارێکی دیکە هەوڵ دەدرێت ڕۆژهەڵاتی ناوەڕاست دیزاین بکرێتەوە، چەندین گروپ و زهنیەتی دەسەڵاتدار دەستیان نایە ناو دەستی یەکتر لە دژی کورد، نمونەش کەرکوک، عەفرین و ئەمڕۆش شەنگالە، چەتەکانی داعش کۆمەڵکوژیی گەورەیان لەسەر کورد پێکهێنا، بۆیە سەرەڕای کەمووکوڕییەکان دەبێت کۆنگرەی نەتەوەیی ببەسترێت.
فەلەکنسا ئوجا، لە بەردەوامییدا وتی: گەلی کورد و پارتە کوردستانییەکان پێویستە بە یەکگرتوویی ببنە وەڵامێک بۆ هەموو هێرشێک، ئەم دیدارانەش وەک سەرەتایەکە بۆ ئەوەی هێدی هێدی گفتوگۆ بکەین و کێشەکان باس بکەین تا ئامادە دەبین بۆ دەستپێکردنی کۆنگرەی نەتەوەیی.
سەبارەت بە هەوڵوێستی لایەنە سیاسییەکانی باشور-یش، ئەو پەرلەمانتارەی هەدەپە وتی: هەر یەک لە پارتە سیاسییەکان بە گەرمی پێشوازییان کرد و خواستنی بەستنی کۆنگرەی نەتەوەییان هەیە، ڕەنگە کێشەی سیاسیی لە نێوانیاندا هەبێت، بەڵام دیسان دەبێت پرسی نەتەوەیی قسەی لە سەر بکرێت.
ناوبراو، ئاماژەی گرنگیی ڕۆڵی گەل کرد بۆ بەستنی کۆنگرە و وتی: ئەوەی کە حزبی سیاسیی هێشتووەتەوە تێکۆشانی گەلی کورد بووە، بۆیە بابەتی کورد تایبەت بە حزب و لایەنێک نییە و هەموو کەس دەتوانێت بەشداری ئەم تێکۆشانە بێت.
فەلەکنسا ئوجا، لە کۆتایی لێدوانەکەیدا وتی: ئەگەر ئەمڕۆ کوردان لە گەڵ یەکتر دانووستاندن نەکەن و یەکنەگرن ئەوا کۆمەڵکوژیی گەورە پێکدێت.
ش.ف
