قه‌سه‌ده‌: له‌ ماوه‌ی مانگێكدا ٦٥١ چه‌ته‌ كوژراون

قه‌سه‌ده‌، ئاماری شه‌ڕی مانگێكی هه‌ڵمه‌تی گه‌رده‌لوولی جزیرە-ی بڵاوكرده‌وه،‌ كه‌ له‌ چوارچێوه‌ی شه‌ڕی نه‌هێشتنی تێرۆردا به‌ڕێوه‌ده‌چێت، تێیدا ئاماژە بەوەکراوە، کە له‌ مانگێكدا ٦٥١ چه‌ته‌ كوژراون و شەش چه‌ته‌ش ده‌ستگیركراون.


ناوه‌ندی ڕاگه‌یاندنی هێزه‌كانی سووریای دیموكرات- قه‌سه‌ده، لە ڕاگەیەندراوێکدا ئامارى شه‌ڕی مانگی ڕابردووی هه‌ڵمه‌تی گه‌رده‌لوولی جزیرە-ی ئاشكرا كرد، كه‌ له‌ چوارچێوه‌ی شه‌ڕی نه‌هێشتنی تێرۆردا له‌ باكووری سووریا به‌ڕێوه‌ده‌چێت.

قه‌سه‌ده‌ ڕایگه‌یاند، له‌ ماوه‌ی مانگی ڕابردوودا ٦٥١ چه‌ته‌ كوژراون و ٦ چه‌ته‌ش به‌ ساغی ده‌ستگیر كراون، هه‌روه‌ها بڕێكی زۆری چه‌ك و ته‌قه‌مه‌نی ده‌ستی به‌سه‌ردا گیراوه‌ و ده‌یان مینیش پووچه‌ڵ كراونه‌ته‌وه‌.

قه‌سه‌ده‌ ده‌ستنیشانی كردووه‌، كه‌ شه‌ڕڤانان به‌شدارییان له‌ ٥٨ چالاكی كردووه‌ و له‌ ماوه‌ی مانگێكیشدا ٣٧ شه‌ڕڤان شه‌هید بوون، دەشڵێن: له‌گه‌ڵ ڕزگار كردنی سه‌دان سیڤیل دوو ژنی ئێزدی-یش ڕزگار كراون.

ده‌قی ڕاگه‌یه‌نراوی قه‌سه‌ده‌

له‌ چوارچێوه‌ی 'شه‌ڕی نه‌هێشتی تێرۆر'ی قۆناغی كۆتایی هه‌ڵمه‌تی گه‌رده‌لوولی جزیرە، بۆ له‌ناوبردنی داعش له‌ ڕۆژهه‌ڵاتی چه‌می فورات، هێزه‌كانی سووریای دیموكرات - قه‌سه‌ده‌، به‌ هاریكاریی هاوپه‌یمانێتى نێونه‌ته‌وه‌یی له‌ ١٠ی ئه‌یلوولی ڕابردوو به‌دواوه‌ به‌رخۆدانێكی دژواریان له‌ دژی تێرۆرستان كردووه‌ بۆ ئه‌وه‌ی ده‌ڤه‌ره‌كانی وه‌ك حه‌جین، سووسه‌، شه‌حفه‌ و ده‌وروبه‌ری و گونده‌كانی دێره‌زۆر ڕزگار بكه‌ن، كه‌ له‌ژێر ده‌ستی چەتەکانى داعشدان.

هێزه‌كانمان له‌ ١١ی ئه‌یلوولی ڕابردوو هه‌تا ئێستا سه‌ركه‌وتنێكی گه‌وره‌یان به‌ده‌ستهێناوه‌ و ده‌ڤه‌رێكی به‌رفره‌وانیان له‌ ده‌ستی تێرۆریستانی داعش ڕزگار كردووه‌، هه‌روه‌ها زۆر بنكه‌ی چه‌ته‌كان ڕووخێنراون و بڕێكی زۆری چه‌ك و ته‌قه‌مه‌نی چه‌ته‌كان ده‌ستی به‌سه‌ردا گیراوه‌، له‌گه‌ڵ ئه‌وه‌شدا چه‌ندین هێرشی خۆكوژیی تێرۆریستان بۆ سه‌ر شه‌ڕڤانان، شكێنراون.

ئاماری شه‌ڕی مانگێك

هێزه‌كانمان به‌شدارییان له‌ ٥٨ شه‌ڕی ڕووبه‌ڕووی تێرۆریستان كردووه‌. هێزه‌كانی هاوپه‌یمانه‌تیی نێونه‌ته‌وه‌یی ٢١٥ هێرشی ئاسمانی و ١٧ هێرشی تۆپهاوێژییان ئه‌نجام داوه‌.

 هێزه‌كانمان پشتڕاستیان كرده‌وه‌ كه‌ ٦٥١ تێرۆریست كوژراون و ته‌رمی ١٧ تێرۆریست كه‌وتوونه‌ته‌ ده‌ستی شه‌ڕڤانان و به‌شێوه‌یه‌كی ڕێكوپێك نێژراون، هه‌روه‌ها ده‌یان ته‌رمی تێرۆریستان له‌نێو باخچه‌كانی ده‌ڤه‌ره‌كه‌ ماونه‌ته‌وه‌ و هێزه‌كانمان نه‌یانتوانیوه‌ ئه‌و ته‌رمانه‌ هه‌ڵگرنه‌وه‌ به‌هۆی ئه‌وه‌ی تێرۆریستان ئه‌و ناوچانه‌یان مینڕێژ كردووه‌، شەش تێرۆریست كه‌وتوونه‌ته‌ ده‌ستی شه‌ڕڤانان و هێزه‌كانمان ٣٧٠ خاڵی نوێیان ڕزگار كردووه‌ و توانیویانه‌ ٤٠كم له‌ ڕووبه‌ری زه‌وی و گونده‌كانی باخۆز، شه‌جه‌ل و موزان ڕزگار بكه‌ن.

ئه‌و چه‌ك و ته‌قه‌مه‌نییانه‌ی ده‌ستیان به‌سه‌ردا گیراوه‌، بريتين لە 'دۆشكه‌یه‌كی ١٢.٥ملم، ١٤ سندووق فیشه‌كی دۆشكه‌ی ١٢.٥ملم، ١٤ چه‌كی كڵاشینكۆف، ٥ چه‌كی بی كه‌ی سی، پێنج چه‌كی بی حەوت لەگەڵ ١٥ فیشه‌ك، حەوت هاوه‌نی ١٢٠ملم لەگەڵ ٢٦٨، دوو٢ جانتای فیشه‌ك، دۆشكه‌یه‌كی ٢٣.٥ملم، ١٦ سندووقی فیشه‌كی دۆشكه‌ی ٢٣.٥ملم، چه‌كێكی م١٦، زنجیرێكی فیشه‌كی كڵاشینكۆف، فڕۆكه‌یه‌كی سیخووڕی، 26هه‌زار فیشه‌كی دۆشكه‌ی ١٢.٥ملم، ٢٥ هه‌زار فیشه‌كی بی كه‌ی سی، ٢٠٠ تۆپی هاوه‌نی ١٢٠ملم، ١١٢ حه‌شوه‌ی هاوه‌ن، پێنج هه‌زار فیشه‌كی كڵاشینكۆف، دوو سه‌به‌ته‌ی دۆشكه‌ی ٢٣.٥ملم، ٢١ سه‌به‌ته‌ی دۆشكه‌ی ١٤.٥ملم، چه‌كێكی ٢٤.

هێزه‌كانمان ژماره‌یه‌كی زۆری چه‌ك و ئۆتۆمبێلی داعشیان تێكشكاند و چه‌ندین كۆگا‌ی ته‌قه‌مه‌نی و بنكه‌ی كۆبوونه‌وه‌ی چه‌ته‌كانیان ڕووخاند، كە بەم شێوەیە بووە، تێکشکاندنى، شەش تۆپهاوێژی هاوه‌ن، ١٢ ئۆتۆمبێلی سه‌ربازی، ١١ كۆگا‌ی چه‌ك و ته‌قه‌مه‌نی، نۆ ناوه‌ندی فه‌رمانداره‌تیی تێرۆریستانی داعش، ٢٢ ئۆتۆمبێلی بۆمبڕێژكراو، شەش ماتۆڕی بۆمبڕێژكراو، قاعیده‌یه‌كی هاویشتنی مووشه‌كی حه‌راری،كارگه‌یه‌كی ئاماده‌كردنی ئۆتۆمبێلی بۆمبڕێژكراو، ناوه‌ندێكی په‌یوه‌ندییه‌كان، دوو فڕۆكه‌ی سیخووڕی، دوو حه‌فاره، حەوت توونێل، ٢٤ ناوه‌ندی چه‌ته‌كان،لەگەڵ تێکشکاندنى ٣٤ هێرشی خۆكوژی.

 له‌نێو چالاكییه‌كاندا، تێرۆرستانی داعش ویستیان ڕێگری له‌ پێشڕه‌ویی شه‌ڕڤانان له‌ ڕێی خۆكوژ و ئۆتۆمبێلی بۆمبڕێژكراو بكه‌ن و چه‌ندین جار ئه‌و شوێنانه‌یان مینڕێژ ‌كرد كه‌ لێی ده‌كشانه‌وه‌، تێرۆریستان ٣٧ هێرشیان له‌ دژی بنكه‌كانی شه‌ڕڤانان ئه‌نجام دا، ٢٢ له‌و هێرشانه‌ به‌ ئۆتۆمبێل و شەش ماتۆڕی بۆمبڕێژكراو و حەوت هێرشی خۆكوژی بوو. هێزه‌كانمان ٢٤٦ مینیان پووچه‌ڵ كرده‌وه‌ كه‌ چه‌ته‌كان دایاننابوونه‌وه‌.

هێزه‌كانمان سه‌دان هاوڵاتیی سیڤیلیان له‌ ده‌ستی چه‌ته‌كان ڕزگار كرد، كه‌ زۆرینه‌یان ژن و منداڵ بوون، هەموو ڕزگار کراوەکان ده‌موده‌ست له‌ كا‌مپه‌كان پێشوازییان لێ كراوه‌ و هاریكارییان پێشكه‌ش كراوه‌.

 یه‌كینه‌تایبه‌ته‌كانی سه‌ر به‌ هێزه‌كانمان توانییان دوو ژنی ئێزدیی خه‌ڵكی شه‌نگال له‌ ده‌ستی چه‌ته‌كان ڕزگار بكه‌ن، هه‌ردوو ژنه‌ ئێزدییه‌كه‌ بریتین له‌: منداڵێكی ته‌مه‌ن ١٢ ساڵان به‌ ناوی ئیناس ڕه‌شۆ، كه‌ له‌ شارۆچكه‌ی خانه‌سۆر ڕفێنراوه‌ و مه‌لكۆ خدر كووتێی، ته‌مه‌ن ٤٠ ساڵان كه‌ له‌ گوندی كۆچه‌ر-ی شه‌نگال ڕفێنراوه‌.

له‌ ماوه‌ی به‌رخۆدانی مانگێكی شه‌ڕڤانانی قه‌سه‌ده‌دا، ٣٧ شه‌ڕڤان پاش به‌رخۆدانێكی قاره‌مانانه‌ و بێ وێنه‌ شه‌هید بوون، كۆمه‌ڵێك شه‌ڕڤانی دیكه‌ش بریندار بوون.

د.ع