قەرەیلان: تێکشکاندنی تەواوەتیی پیلانگێڕیی ١٥ی شوبات ئەرکی سەرەکییە

موردا قەرەیلان، ئەندامی کۆمیتەی بەڕێوەبەری پەکەکە، ڕایگەیاند، ٣٤ دەوڵەت بەشێوەی ڕاستەوخۆ و ناڕاستەوخۆ بەشدارییان لە پیلانگێڕیی ١٥ی شوباتدا هەبووە، ئاماژە بۆ ئەوەشدەکات، ئەگەر ئێستا پیلانگێڕیی پوچیش کرابێتەوە، بەڵام بە تەواوی لە ناو نەچووە، بۆیە ئەرکی کادێرانی بزووتنەوەی ئازادیی تەنها ئیدانەکردنی پیلانگێڕییەکە نییە، بەڵکو ئەرکی بنەڕەتی و سەرەکی تێکشکاندنی تەواوەتیی پیلانگێڕییەکەیە.


موردا قەرەیلان، ئەندامی کۆمیتەی بەڕێوەبەری پەکەکە، ڕۆژی سێشەممەی ڕابردوو میوانی بەرنامەی تایبەتی کەناڵی ئاسمانیی ستێرک تیڤی بوو و وەڵامی پرسیارەکانی رۆژنامەنووس ئارژین فەرات-ی دایەوە.

قەرەیلان ڕایگەیاند، سەرەتا لە کەسایەتیی هەموو ئەو گیانبەختکردوانە، کە بە دروشمی "ئێوە ناتوانن ڕۆژمان تاریک بکەن" جەستەی خۆیان لە دژی پیلانگێڕیی نێونەتەوەیی کرد بە بازنەیەک لە ئاگر، بە ڕێزەوە یادی هەموو شەهیدانی شۆڕشی کوردستان دەکەمەوە و یادیان بەرز رادەگرم.

قەرەیلان ڕایگەیاند، پیلانگێڕیی نێونەتەوەیی لە کەسایەتیی عەبدوڵا ئۆجالان ڕێبەری گەلی کورد بۆ پاکتاوکردنی بزووتنەوەی ئازادیی کوردستان و کوردی ئازاد ئەنجامدرا و وتی "بۆ ئەو ئامانجە بزووتنەوەکەمان گەمارۆدرا، ئەوەندەی بۆمان ڕوون بووەتەوە، ٣٤ دەوڵەت بەشێوەی ڕاستەوخۆ و ناڕاستەوخۆ بەشدارییان لەو پیلانگێڕییەدا هەبووە، ئامانجی بنەڕەتیشیان بۆ کۆتاییهێنان بوو بە ئێمە، هێزە پیلانگێڕەکان تەمەنێکیان بۆ ئێمە دەستنیشانکردبوو و هەندێکیان دەیانوت، ٦ مانگ و هەندێکی تریشیان دەیانوت لە ماوەی ساڵێکدا لە ناو دەچن.

بەڵام ڕێبەر ئاپۆ لە زیندانی ئیمراڵی هەڵوێستێکی زۆر مانادار و مێژووی لە خۆی نیشاندا، هەم بە بەرخودانی خۆی و هەم بە هەڵوێستی نەتەوەیی و هەم بە پارادیگمای دیموکراتیک، ئیکۆلۆژیک و ئازادیپارێزی ژنان وەڵامێکی مێژوویی بە پیلانگێڕییەکە دایەوە، ڕێبەر ئاپۆ بەشێوەیەکی بەهێز و تێگەیشتوانە ئەو پیلانگێڕییەی پوچ کردەوە، بێگومان هاوکات لەگەڵ ئەوەشدا کادیرانی بزووتنەوەی ئازادیشمان بەشداری ئەو بەرخودانە بوون".

لە درێژەی چاوپێکەوتنەکیدا قەرەیلان، ڕایگەیاند، بەرخودانە گەورەکە لە ئیمراڵییە و لەگەڵ بەرخودانی چیا، زیندان و هەموو کوردستان بوونە یەک و پیلانگێڕییەکەیان بێمانان و پوچ کردەوە و بەوشێوەیە رێگایان نەدا پیلانگێڕییەکە بە ئامانجی خۆی بگات و وتی "بزوتنەوەی ئازادی ئێستا لە هەموو کات زیاتر گەورە و بەهێز بووە، هێڵێ ڕێبەر ئاپۆ ئێستا لە ڕۆژهەڵاتی ناوەڕاست بووەتە بەهێزترین هێڵ، ئەوانە هەموویان سەلمێنەری ئەوەن، کە پیلانگێڕیی نێونەتەوەیی بە ئامانجەکەی خۆی نەگەیشتووە و پوچ کراوەتەوە، بەڵام دەبێت ئێمە ئەوەش بزانین، ئەگەر پیلانگێڕییەکە پوچیش کرابێتەوە، بەڵام بە تەواوی لە ناو نەچووە، بۆیە بێگومان ئەرکی کادێرانی بزووتنەوەی ئازادی تەنها ئیدانەکردنی پیلانگێڕییەکە نییە، بەڵکو ئەرکی بنەڕەتی و سەرەکیمان تێکشکاندنی تەواوەتیی پیلانگێڕییەکەیە".

موراد قەرەیلان ڕاشیگەیاند، ئەگەر پیلانگێڕییەکە تاوەکو ئێستا بە تەواوەتی تێکنەشکابێت ئەوە بەهۆی کەموکوڕیی خۆمانەوەیە و وتی "تێکشکاندنی تەواوەتیی پیلانگێڕییەکە تەنها بە ئازادیی ڕێبەر ئاپۆ و کوردستان بەدی دێت، چونکە ئازادیی ڕێبەر ئاپۆ و کوردستان یەک شتن، ئیدی کەس ئەوانە لە یەک جیا ناکاتەوە و تەنانەت دوژمن ئەوەی قبوڵکردووە، لەبەر ئەوەش کەی ڕێبەر ئاپۆ و کوردستان ئازادبوون ئەوکاتە پیلانگێڕییەکە بە تەواوەتی تێکشکێنراوە، تێکشکاندنی ئەو پیلانگێڕییە و کاریگەریی لەسەر کوردستان لە ڕۆژەڤی ئێمەدایە، ئێمە دەزانین، کە هەموو کاتێک ئێمە زیاتر لە تێکشکاندنی پیلانگێڕییەکە نزیک دەبینەوە، ئێستا ڕيێبەر ئاپۆ گۆشەگیرییەکی توند و ڕەهای بەسەردا سەپێنراوە، ئەو گۆشەگیرییە بە مانای پێداگرییە لە بەردەوامیدان بە پیلانگێڕییەکە".

قەرەیلان ڕاشیگەیاند، "ئەوەی گۆشەگیر کراوە تەنها ئۆجالان ڕێبەر گەلی کورد نییە، بەڵکو دیموکراسیی تورکیا، داهاتووی گەلانی کورد و تورک، داهاتووی گەلانی هەرێمەکە گۆشەگیرکراوە".

قەرەیلان ئەوەشی ڕاگەیاند، سیستمی ئەشکەنجەی ئیمراڵی وەرسوڕێنراوە بۆ سیستمی قڕکردن و لەناوبردنی گەلی کورد و وتی "فاشیزم دەیەوێت تەمەنی خۆی بەو هۆیەوە درێژ بکاتەوە، لەبەر ئەوەش تێکۆشان لە دژی گۆشەگیری تێکۆشانە بۆ ئازادیی کوردستان و دیموکراسی لە تورکیا و بۆ گەلانە، بۆیە دەبێت هەر کەسێک لە کوردستان، لە تورکیا و ناوچەکە لە دژی سیستمی گۆشەگیری تێبکۆشێت، ئێمە باش دەزانین، ئەگەر سیستمی گۆشەگیریی ڕەها هەڵبوەشێنرێتەوە ئەوە فاشیزم هەڵدەوەشێتەوە، سیستمی فاشیست لە تورکیا و گوشارکانی بۆ سەر کوردستان و ناوچەکە و ئەو هێرشیانەی ئەنجامی دەدەن لەگەڵ سیستمی گۆشەگیریی ئیمراڵی دا ڕێکخراوە و فۆرمولە کراوە و هەموویان پێکەوەن و شانبەشانی یەکتر بەرێوەدەبرێن، ئەگەر کۆتایی بە گۆشەگیری بهێنرێت، ئەوە سیستمی فاشیست هەڵدەوەشێت و دیموکراسی لە تورکیا بەدی دێت، سیستمی گۆشەگیری ئیدی هەڵگری ئەو واتا و گرنگییەیە و تێکۆشانی ئێمەش لەسەر ئەو بنەمایە و لەو چوارچێوەیەدایە بۆ تێکشکاندنی ئەو گۆشەگیرییە ڕەهایە".

وتیشی: ئەگەر سیستمی فاشیست لەسەر ئەوە درێژە بە بوونی خۆی دەدات ئەوا دەبێت لە ٢٢هەمین ساڵدا تێکۆشانی خۆمان بەهێز بکەین و ئەو پیلانگێڕییە بە تەواوەتی تێکبشکێنین.

لە بەردەوامیدا قەرەیلان باسی ئەوەیکرد، دەوڵەتی تورک بە سەرکێشیی ئەردۆغان ماوەیەکی زۆرە بۆ سەرلەنوێ ئەنجامدانەوەی پیلانگێڕی لەگەڵ ژمارەیەکی زۆر لە دەوڵەتەکاندا لە سات و سەودا دەکات و وتی "دەوڵەتی تورک ئەمجارە دەیەوێت بە پیلانگێڕییەکەی هەموو پارچەکانی کوردستان بسڕێتەوە و کورد قڕ بکات، نەک تەنها لە باکووری کوردستان، پیلانگێڕی لە سەرتاسەری کوردستان بەڕێوەدەببا و دەیەوێت گەلی کورد قڕ بکات و بسڕێتەوە و گەلی کورد بە بێ پێگە بکات".

موراد قەرەیلان، ئەندامی کۆمیتەی بەڕێوەبەری پەکەکە ئاماژەی بەوەشکرد، لەو چوارچێوەیەدا ترامپ و ئەردۆغان، پوتین و ئەردۆغان سات و سەودای چەپەڵ و قێزەونیان ئەنجامداوە و وتی "لەو چوارچێوەیەدا ڕۆژی ٩ی تشرینی یەکەمی ٢٠١٩ لە دژی باکوور – ڕۆژهەڵاتی سوریا و ڕۆژئاوای کوردستان هێرشی داگیرکەرییان دەستپێکرد، ئەو هێرشە بۆ خۆی نوێکردنەوەی پیلانگێڕیی نێونەتەوەیی بوو، هێرشەکە بۆ ئەو ئامانجە بوو، لەو ڕێگەیەوە خواستیان شۆڕشی ڕۆژئاوا بە تەواوی لەبەر یەک هەڵوەشێنن و داگیرکەریی دەوڵەتی تورک بەسەر ناوچەکەدا بسەپێنن، بۆ ئەوەش هێرش و داگیرکەریی ٩ی تشرینی یەکەمیان ئەنجامدا، ئەوە هەنگاوێک بوو بۆ نوێکردنەوە، بەرفروانکردن و بەهێزکردنی پیلانگێڕییەکە، بەڵام بەرخودانی هێزەکانی قەسەدە، هێزەکانی پاراستنی باکوور و ڕۆژهەڵاتی سوریا، بەرخودانی گەلەکەمان  لە کورد، عەرەب، ئاشور – سوریان و هەڵوێستیی خاوەنداریکردن لە شۆڕشی رۆژئاوای کوردستان لەلایەن ڕای گشتیی جیهانەوە، بوونە ڕێگر و لەمپەر لە بەردەم ئەو هەڵمەتە پیلانگێڕییەدا، ئێمە دەتوانین بڵێین، ئامانج و حساباتی پیلانگێڕەکان سەری نەگرت".

قەرەیلان، لە کۆتایشدا ڕایگەیاند، هێرشە داگیرکەرییەکان بۆ سەر سەرێکانی و گرێ سپی هەنگاوێکە بۆ بە هەمیشەیی کردنی پیلانگێڕییەکە و وتی "ئەوە هێشتا لە پلان و بەرنامە و بڕیاراندایە و کار بۆ جێبەجێکردنی دەکەن و دەستبەرداری نەبوون، بەڵام لەو قۆناغەدا ئەوە بینرا، بناغەکانی پیلانگێڕییەکە لاواز بووە، وەک باسمکرد، ٣٤ دەوڵەت بەشداری پیلانگێڕییەکەی ساڵی ١٩٩٩ بوون و کەس ورتەی لێوە نەهات. هەموویان لە چوارچێوەی هاوپەیمانییەکدا ئەو پیلانگێڕییەیان ئەنجامدا، بەڵام ئێستا سەرلەنوێ ئەنجامدانەوەی پیلانگێڕی، بە تایبەتی پیلانگێڕی لە دژی ڕۆژئاوای کوردستان و پارچەکانی دیکەی کوردستان لەلایەن ڕای گشتی و جیهانەوە قبوڵ ناکرێت، بناغەکانی پیلانگێڕییەکە لاواز بووە، ئەوەش سەلمێنەری ئەوەیە، کە بناغەکانی پیلانگێڕیی نێونەتەوەیی بەشێوەی گشتی لاواز بوون، ئەگەر ئێمە بتوانین تێکۆشان لە دژی پیلانگێڕییەکە بە بەهێزی بەڕێوەببەین، ئێستا هەلومەرجەکە لە هەموو کات زیاتر و باشترە بۆ تێکشکاندنی پیلانگێڕیی نێونەتەوەیی و ئەو هێزانەی کە دەیانەوێت هێڵی کوردستانی ئازاد لەناو ببەن، بێگومان بۆ ئەوەش پێویستی بە تێکۆشان هەیە".

ک.س