قەسەدە ئاماری شەڕو بەرخۆدانی ٢٤ کاتژمێری ڕابردووی بڵاوکردەوە

هێزەکانی سوریای دیموکراتیک-قەسەدە ئەنجامی شەڕ و بەرخۆدانی ٢٤ کاتژمێری رابردووی شەڕڤانانی لە دژی داگیرکەران ئاشکرا کرد و رایگەیاند زیاتر لە ١٣ چەتە کوژراون.


ناوەندی راگەیاندنی هێزەکانی سوریای دیمۆکراتیک ئەنجامی چالاکییەکانی شەڕڤانانی قەسەدە لە چوارچێوەی مافی خۆپاراستنی ڕەوادا ، هێرشی داگیرکەرانی دەوڵەتی تورک و چەتەکانی لە باکور و رۆژهەڵاتی سوریا بڵاو کردەوەو ئاشکرای کرد کە لە ماوەی ٢٤ کاتژمێردا ١٣ چەتە کوژراون و ١٩ چەتەش بریندار بوون.

قەسەدە ئاماژەی بەوەشکردووە، لە ئەنجامی بەرخۆدانی هێزەکانیاندا ١٢ شەڕڤانیش شەهیدبوون و ٧ شەڕڤانیش بریندار بوون.

قەسەدە وردەکاری زیاتر بەمشێوەیە دەخاتەڕوو:

"سوپای داگیرکەری تورک و چەتەکانی سەرەڕای ئەوەی ئاگربەستیان ئیمزا کردووە، جارێکی تر بە هەموو هێز و توانایەکی تەکنیکیی زەمینی و ئاسمانیەوە لە سەرتاسەری سنووری رۆژئاوای کوردستان و باکورو رۆژهەڵاتی سوریا هێرشە داگیرکەرییەکانی بەردەوام دەکات و پەیمانەکانیش پێشێل دەکات.

بەرەی تل تەمر

سوپای داگیرکەری تورک و چەتەکانی هەم زەمینی و هەم ئاسمانی هێرشەکانی بۆ سەر تل تەمر و دەوروبەری بەردەوام دەکات.

بەرەی ئەبو راسێن

سوپای داگیرکەری تورک و چەتەکانی بە تانک و چەکی قوڕس هێرشێکی توندیان کردە سەر گوندی تل محمد.

بەرەی عین عیسا

سوپای داگیرکەری تورک و چەتەکانی بە چەکی قورس و تانک و تۆپ، بە توندترین شێوە هێرشیان کردە سەر گوندەکانی خربەت فارس، شەڕگراک، زەنووبا، مەسعودیە، دبس، خربەت کەریم، قزعەلی، کەفیفا و وەبدێ، هێزەکانمان لە چوارچێوەی مافی خۆپاراستنی ڕەوا دا وەڵامێکی توندی هێرشەکانیان دایەوەو شەڕێکی قوڕس لەو ناوچانە روویدا، لە ئەنجامدا لە نزیک رێگای نێودەوڵەتی (M4) ٢ ئۆتۆمبیلی سەربازی وئۆتۆمبیلێکی دۆشکە هەڵگر تێكشكێنرا، هەروەها دەست بەسەر رەختێک و ٣ چەکیشدا گیراوە.

بە گشتی لە ئەنجامی وەڵامدانەوەی هێزەکانماندا ١٣ سەربازی تورک و چەتە کوژران و ١٩ی دیکەش بریندار بوون.

هەورها لە ئەنجامی بەرخۆدانی هێزەکانماندا ١٢ لە هەڤالە قارەمانەکانمان شەهیدبوون و ٧ هەڤاڵی دیکەشمان بریندار بوون."

ب.ش