قەسەدە ڕایگەیاند، جموجۆڵی هێزە گەرەنتیکارە نێودەوڵەتییەکان لە ناوچەکانی عەین عیسا و کۆبانێ ئاساییە و داواش دەکات، هێزە گەرەنتیکارە میکانیزمی مەیدانیی و یاسایی بگرنەبەر، بۆ ڕێگرییکردن لە داگیرکارییەکانی تورکیا.
ئەمڕۆ ناوەندی ڕاگەیاندنی هێزەکانی سووریای دیموکرات (قەسەدە) ڕاگەیەندراوێکی بڵاوکردەوە و تێیدا هاتووە: جموجۆڵی هێزە ئەمنییە نێودەوڵەتییەکان لە ناوچەکانی عەین عیسا و کۆبانێ بەشێوەیەکی ئاسایی بەڕێوەدەچێت، کە بە هەماهەنگیی و لە چوارچێوەی پاراستنی ئاسایش و ڕێککەوتنی ئاگربەستدا ئەنجام دەدرێن.
قەسەدە داواش لە هێزە گەرەنتیەکان دەکات: میکانیزمی مەیدانیی و یاسایی بگرنەبەر، بۆ ڕێگرییکردن لە داگیرکارییەکانی تورکیا.
ڕۆژی ٢٣ی ئایار تەیب ئەردۆغانی سەرۆکی دەوڵەتی تورک دوای کۆبوونەوەی کابینەی کۆماریی تورکیا جارێکی دیکە نیازی خۆی بۆ ئەنجامدانی داگیرکاریی لە باکوور و ڕۆژهەڵاتی سووریا دەربڕییەوە و ڕایگەیاند، کە هێرشێکی نوێ بۆ سەر باکوور و ڕۆژهەڵاتی سووریا دەستپێدەکەن و ئەو ناوچە بەناو “ئەمنی”یەی پێشتر قسەیان لەسەر کردووە بە قووڵایی ٣٠ کیلۆمەتر تەواوی دەکەن.
قەسەدەش شەوی ٢٣ی ئایار وەڵامی هەڕەشەکەی ئەردۆغانی دایەوە و لە بەیاننامەیەکدا ڕایگەیاند: هیچ گۆڕانکارییەکی ستراتیژیی لە جێگیرکردنی هێزە نێودەوڵەتییە گەرەنتیکارەکان لە ناوچەکانی باکوور و ڕۆژهەڵاتی سووریا ڕووینەداوە.
ئاماژەی بەوەشکردووە، “پەرەسەندنی دۆخەکە و نمایشکردنی هێز لەلایەن دەوڵەتی داگیرکەری تورکەوە، بەشێکە لە هەوڵەکان بۆ تێکدانی ناسەقامگیریی ناوچەکە، ئامانجی داگیرکەرانیش سەرلەنوێ زیندووکردنەوەی داعشە”.
ب.ل
