قەسەدە جەختیکردەوە، کە هیچ گۆڕانکارییەکی ستراتیژیی لە بڵاوەپێکردنی هێزە نێودەوڵەتییەکان لە ناوچەکانی باکوور و ڕۆژهەڵاتی سووریا ڕووی نەداوە، دەشڵێت: لێکۆڵینەوە لە هەڕەشەکانی دەوڵەتی تورکیا دەکەین.
دوێنێ تەیب ئەردۆغانی سەرۆکی دەوڵەتی تورک دوای کۆبوونەوەی کابینەی کۆماریی تورکیا جارێکی دیکە نیازی خۆی بۆ ئەنجامدانی داگیرکاریی لە باکوور و ڕۆژهەڵاتی سووریا دەربڕییەوە و ڕایگەیاند، کە هێرشێکی نوێ بۆ سەر باکوور و ڕۆژهەڵاتی سووریا دەستپێدەکەن و ئەو ناوچە بەناو “ئەمنی”یەی پێشتر قسەیان لەسەر کردووە بە قووڵایی ٣٠ کیلۆمەتر تەواوی دەکەن.
شەوی ڕابردووش هێزەکانی سووریای دیموکرات قەسەدە لە وەڵامی هەڕەشەکەی ئەردۆغاندا بەیاننامەیەکی بڵاوکردەوە و ڕایگەیاند: هیچ گۆڕانکارییەکی ستراتیژیی لە جێگیرکردنی هێزە نێودەوڵەتییە گەرەنتیکارەکان لە ناوچەکانی باکوور و ڕۆژهەڵاتی سووریا ڕووینەداوە.
ئاماژەی بەوەشکردووە، “پەرەسەندنی دۆخەکە و نمایشکردنی هێز لەلایەن دەوڵەتی داگیرکەری تورکەوە، بەشێکە لە هەوڵەکان بۆ تێکدانی ناسەقامگیریی ناوچەکە، ئامانجی داگیرکەرانیش سەرلەنوێ زیندووکردنەوەی داعشە”.
قەسەدە ئەوەشی خستووەتەڕوو، کە هێزەکانیان لێکۆڵینەوە لە ئاستی هەڕەشە چالاک و پێشبینیکراوەکانی دەوڵەتی تورکیا دەکەن بۆ سەر ناوچەکانی باکوور و ڕۆژهەڵاتی سووریا و هاوبەشکردنی زانیاریی لەگەڵ هێزە گەرەنتیکارە نێودەوڵەتییەکان.
ب. ل
