ئەندامێكی لیژنەی یاسایی ئەنجومەنی نوێنەرانی عێراق ڕوونیدەكاتەوە، ئەنجومەنی نوێنەران ناتوانێت كۆببێتەوە و سەرۆك كۆمار هەڵبژێرێت تا ئەو كاتەی دادگای فیدراڵی لەسەر دانیشتنی یەكەمی پەرلەمان بریار نەدات.
ڕۆژی نۆی ئەم مانگە، خولی پێنجەمی ئەنجومەنی نوێنەرانی عێراق یەكەم دانیشتنی خۆی ئەنجامدا، لە دانیشتنەكەدا مەحمود مەشهەدانی، سەرۆكی كاتی ئەنجومەنی نوێنەران دۆخی تەندروستی تێكچوو بەهۆی دروستبونی ئاڵۆزییەوە و ڕەوانەی نەخۆشخانەكرا.
دوای ئەوەی سەرۆكی كاتی ڕەوانەی نەخۆشخانەكرا، دووەم گەورەترین ئەندامی پەرلەمان سەرۆكایەتی دانیشتنەكەی گرتەدەست و ئەندامانی پەرلەمان سوێندی یاساییان خوارد و سەرۆكایەتی پەرلەمان هەڵبژێردرا، بەڵام چوارچێوەی هەماهەنگی شیعی بایكۆتی دانیشتنەكەیان كرد و دواتر لە دادگای فیدراڵی، باسم خەشان ئەندامی پەرلەمان تانەی لە یەكەم دانیشتنی پەرلەماندا و داوای هەڵوەشاندنەوەی یەكەم دانیشتنیان کرد.
ئەمڕۆ جارێکی دیکە، دادگای فیدراڵی عێراق دانیشتنی خۆی لەسەر بڕیاردان لەسەر یەكەم دانیشتنی پەرلەمانی عێراقی بۆ یەكی شوبات دواخست، وا لێكدەدرێتەوە هۆكاری دواخستنەكانی دایشتنی دادگای فیدراڵی، پێدانی دەرفەتە بە لایەنەكان بۆ ڕێككەوتن.
بەهار مەحمود، ئەندامی لیژنەی یاسایی خولی پێشوی ئەنجومەنی نوێنەرانی عێراق بە ڕۆژنیوزی وت: لە یەكەم دانیشتنەوە ماوەی ١٥ ڕۆژ دیارییكراوە بۆ ڕادەستكردنی ناوی كاندیدەكانی سەرۆك كۆمار، پاشان ١٥ ڕۆژ تەرخاندەكرێت بۆ ئەوەی بزانرێت ئەو مەرجانەیان تێدایە، كە دەستوور دیارییكردووە بۆ كاندیدی سەرۆك كۆمار، بەڵام پەرلەمان دەبێت پابەند بێت بەو مانگەی، كە دەستوور دیارییكردووە بۆ هەڵبژاردنی سەرۆك كۆمار.
ڕەتیكردەوە پەرلەمان بەبێ بڕیاری دادگای فیدراڵی بتوانێت كۆببێتەوە و وتی: لەبەرئەوەی دادگای فیدراڵی بڕیاری داوە بە هەڵپەساردنی كارەكانی، پەرلەمانی عێراق ناتوانێت كۆببێتە هەتا ئەو كاتەی دادگای فیدراڵی بڕیار دەدات، كە دانیشتنی یەكەمی پەرلەمان هیچ پێشێلكردنێكی یاسایی و دەستووریی تێدانەبووە،.
سەبارەت بە هۆكاری دواخستنی دانیشتنەكانی دادگای فیدراڵی ئاشكرای كرد، دادگای فیدراڵی بۆیە دانیشتنەكانی دوادەخات دەیەوێت لایەنە ناكۆكەكان لەسەر یەكم دانیشتنی پەرلەمان بگەن بە ڕێككەوتن و ئەوانیش ڕێككەوتنەكەی ئەوان بخاتە چوارچێوەی بڕیارێكی دەستورییەوە.
س.س
