چوؤرشەممە, 4 يول 2018 – 15:52 ڕۆژنیوز – كەركوك
نیوەڕۆی ئەمڕۆ، لە شارەدێی قەرەهەنجیری سەر بە پارێزگای كەركوك، شاندێكی باڵای وەزارەتی ناوخۆ و سوپای عێراقی، لەگەڵ فەرماندەكانی هێزەكانی پێشمەرگە كۆبوونەوە.
سەرچاوەیەك لە هێزەكانی پێشمەرگە، كە نەیوست ناوەكەی ئاشكرا بكرێت، بە ڕۆژنیوزی ڕاگەیاند: كۆبونەوەیەكی هاوبەش لەنێوان وەزارەتی ناوخۆی عێراق و سوپای عێراقی لەگەڵ فەرماندە باڵاكانی هێزەكانی پێشمەرگە لە شارەدێی قەرهەنجیر ئەنجام دراوە و لایەنی عێراقی داواكارییان هەبووە، بەڵام لەلایەن بەرپرسانی پێشمەرگەوە داواكارییەكەیان ڕەتكراوەتەوە.
سەرچاوەكەی ڕۆژنیوز وتی: “هێزە عێراقیەكان پلانی ئەنجامدانی ئۆپەراسیۆنێكی گەروەیان هەیە بۆ هێرشكردنە سەر چەتەكانی داعش و شانە نوستوەكانیان، بۆ ئەو مەبەستە داوایان لە هێزەكانی پێشمەرگە كردووە، ڕێگەیان بدەن لە هەریەك لە شاردێی (لەیلان، شوان، قەرەهەنجیر) نزیك ببنەوە لە سەنگەرەكانی پێشمەرگە”.
ئەو سەرچاوەیە ئاشكراشی كرد: “هێزەكانی پێشمەرگە وەڵامی سوپای عێراقیان داوتەوە، كە بە هیچ شێوەیەك ڕێگا نەدەن نزیكی سەنگەرەكانی پێشمەرگە ببنەوە، لە ئەگەری نزیك بوونەوەی هێزە عێراقیەكانیش لە سەنگەرەكانی پێشمەرگە ئەوا وەڵامیان دەبێت”.
ك.ك/س
