كەركوك، داوای دامەزراندنی ژنان لە هێزە ئەمنییەکاندا دەكرێت

كۆمەڵەی هیوای عێراقی، لە گردبوونەوەیەکدا داوا لە وەزارەتی ناوخۆی عێراق دەکات، کە هەلی کار بڕەخسێنن بۆ ژنان و بەشدارییان پێبکەن لە دەزگا ئەمنییەکاندا، دەشڵێن: لەم ڕێگەوە دەتوانین مافەكانی مرۆڤ لە كەركوك پێشبخەین و ئارامی شارەكە بەروپێشەوە ببەین".


نیوەڕۆی ئەمڕۆ لقی كەركوكی 'كۆمەڵەی هێوای عێراق' لە سەنتەری ڕۆشنبیری كەركوك گردبوونەوەو داوای دامەرزاندنی ژنانیان لە ناو پۆلیسی كەركوکدا کرد.

لە گردبوونەوەکەدا هاوژین حاجی بەیاننامەی كۆمەڵەی هێوای خوێندەوە، كە تێیدا هاتبوو:"ئێمە وەك كۆمەڵەی ژنان و كچانی كەركوك دەسپێشخەریمان كردووە بە ڕٍاگەیاندنی هەڵمەتێ 'ئەوان ئەفسەرن'، لە ڕوانگەی باوڕی تەوامان بە یەكسانی و هەلی كاركردن بە پشت بەستن بە مادەی ١٤ و ١٦ی دەستوری عێراقی، بە پێویستی دەزانین پێتان ڕابگەیەنین كە پارێزگای كەركوك قوربانی زۆری داوە بەهۆی ململانێی چەكدار و توندڕەوی گروپە تیرۆرستییەكان، كە ئەوەش شاڵاوی گەوەرەی ئاوارەیی و دەربەدەریی لێكەوتووەتەوە، كە ژنان قوربانی گەوەرن و ڕووبەڕووی كوشتن و ڕفاندن دەسدرێژی بونەتەوە".

هەروەها هاتبوو:"ئەم دۆخە پێویستی بە هەنگاوی هەلی كار و دامەزراندن هەیە بۆ ژنان لە ڕیزی دەزگا ئەمنییەكان لە ڕێگەی بەهێزكردنی ڕۆڵی ژنان لە بەرقەراكردنی ئارامی و ڕوبەڕووبوونەوەی توندوتیژییەكان، لە هەمانكادا بەشداری پێكردنی ژنان لە ڕێگای وەزارەتی ناوخۆ و بەڕێوبەرایەتی پۆلیسی و بە تایبەتی لە بەشی پاراستنی خێزان و منداڵ و پۆلیسی كۆمەڵگا بە سیفەتی لێكۆڵەر و ئەفسەران، دەتوانین بوار بڕەخسێنین بۆ ژنان كە تواناكانیان بەرجەستە بكەن و بتوانن پەیوەندی و متامەن دروست بكەن لە دەزگا ئەمنییەكان".

لە كۆتاییدا داوایان کردووە:"دواكارین لە وەزارەتی ناوخۆ بوار بڕەخسێنرێت بۆ ژنان وەك لێكۆڵەر و ئەفسەر لە ڕیزەكانی پۆلیس، زیادكردنی ژنان لە پۆلیس لە ڕێگای كردنەوەی دامەزراندن و هەلی كار و كردنەوەی خول و ڕاهێنان لە بوارە جیا جیاكان، لەم ڕێگەوە دەتوانین مافەكانی مرۆڤ لە كەركوك پێشبخەین و ئارامی شارەكە بەروپێشەوە ببەین".

س.ح