كەركوك، ڕێگریی لە ئەندامانی ئەنجوومەن دەكرێت بچنە سەر دەوامەكانیان

بەهۆی هاتنی شاندی باڵای عێراق بۆ كەركوك، ڕێگە نەدرا ئەندامانی ئەنجوومەنی پارێزگای كەركوك دەوامی ئاسایی خۆیان بكەن و بچنە ناو بینای ئەنجوومەنەكە، ئەندامێكی ئەنجوومەنیش دەڵێت: لەبەر ئەوە ڕێگرییمان لێكراوە بە نهێنی گەندەڵییەكان پەردە پۆش بكەن.


ئەمڕۆ شاندێکی باڵای حكومەتی عێراق سەردانی كەركوكیان كرد، لە كاتی سەردانەكەدا ڕێگە بە ئەندامانی ئەنجوومەنی پارێزگای كەركوك نەدرا بچنە ناو بینای ئەنجوومەنەكەوە، دواتر ئەندامانی ئەنجوومەن ویستان لە ناو ئەنجوومەن كۆنگرەیەكی ڕۆژنامەوانی ئەنجام بدەن، بەڵام ڕێگە بەوەش نەدرا.

ئەحمەد عەسكەری، ئەندامی ئەنجوومەنی پارێزگای كەركوك لە لیستی برایەتی، لە كۆنگرەیەكی ڕۆژنامەوانیدا ڕاگەیاند:" لە ڕاگەیاندنەوە بیستوومانە كە ئەو شاندە دێتە كەركوك، لە كاتێكدا ئێمە چاوێری سەرجەم كارە ئیدارەكانی ئەم شارە دەكەین، ئەمڕۆ بەیانی ویستمان بچین بۆ دەوامی خۆمان لە ناو بینای ئەنجوومەن، هێزە ئەمنیەكان ڕێگریان لێكردین و نەیان هێشت بچینە ناو بینای ئەنجوومەنەكەوە".

وتشی:" بە چ بڕیارێك ڕێگریی لە ئەندامانی ئەنجوومەن دەكرێت كە بچنە سەر كارەكانیان، دەبوو شاندەکە لەگەڵ ئێمە دابنیشتنایە چونكە ئەندامانی ئەنجوومەنی پارێزگا نوێنەری سەرجەم نەتەوەكانی كەركوكن، بەڵام دوور نزیك ئێمە ئاگاداری ناوەڕۆكی سەردانەكە نین".

ڕوونشیكردەوە:" پارێزگاری بەوەكالەتی كەركوك دەوێت ئەنجوومەن نەمینێت بۆ ئەوەی چاودێری بابەتە ئیداری و یاساییەكانی كەركوك نەكرێت، وە ئەوە تۆڵەیەكە بۆ ئەوەی كە هەفتەی ڕابردوو ئەنجوومەنی پارێزگای كەركوك كۆبونەوەی ئەنجامدا، ئێستا ئەو ئیدارەیە دەیەوێت كێشە بۆ ئەنجوومەن دورستبكات، دەوێت نوێنەری پێكهاتەكانی كەركوك لەو بوجە زەبەلاحەی كە بۆ كەركوك هاتووە بێ ئاگابن كە چۆن سەرف دەكرێت".

د.ع