بەشێک لە لایەنە سیاسییەکان، هاتنی شاندی سەربازیی دەوڵەتی تورک بە هەوڵی قەرەبووکردنەوەی شکست و قەیرانە سیاسی و سەربازی و ئابورییەکانی ئەو وڵاتە و لە ناوبردنی دۆزی ڕەوای کورد دەزانن، هۆشداری بە هەموو لایەنەکان دەدەن، کە نەکەونە ژێر کاریگەریی ئەو شاندە و داوای هەڵوێست لە لایەنە سیاسییەکانی دیکەش دەکەن.
١٨ی ئەم مانگە شاندێکی سەربازیی دەوڵەتی تورکی داگیرکەر، کە پێکدێن لە خلوسی ئاکار وەزیری بەرگریی و یەشار گولەر سەرۆک ئەرکانی سوپای تورک، سەردانی عێراق و هەرێمی کوردستانیان کرد و چەندین کۆبوونەوەیان ئەنجامدا، ئەمەش باس و خواسی جیاوازی بەدوای خۆیدا هێنا و لەم بارەیەوە بەختیار مستەفا ئەندامی کۆمیتەی ناوەندی حزبی زەحمەتکێشانی کوردستان و حسێن کەرکوکی بەرپرسی دەستەی دیپلۆماسی تەڤگەری ئازادیی کۆمەڵگەی کوردستان، بۆ ڕۆژنیوز دەدوێن.
بەختیار مستەفا وتی: پەنابردنی تورکیا بۆ عێراق و هەرێم، جۆرێکە لە پەلەقاژێ و پەیوەندیدارە بە ئاڵۆزییەکانی ناوخۆی تورکیا و ئەو دۆخە تەنگەژەی تێیکەوتووە، لە دەرئەنجامی ئەو دەستدرێژی و سەرپێچییانەی کە بەرامبەر وڵاتانیتر دەیکات بە تایبەتی ڕۆژئاوای کوردستان، بەمەش پشتیوانی نێودەوڵەتی لاواز بووە و بەتایبەتی ئەمریکا و خودی جۆ بایدن-ی زۆر نیگەران کردووە، بۆیە دەیەوێت پشتیوانی هەرێم و عێراق بەدەستبهێنێت بۆ بەردەوامیدان بە سیاسەتە داگیرکارانەکەی.
وتیشی: نابێت هەرێم بکەوێتە ژێر باری ئەو شاندە سەربازییەوە و هیچ پەیوەندییەک لەگەڵ تورکیا ببەستێت لەسەر حسابی پارچەکانی دیکەی کوردستان و لێدان لە پەکەکە، چونکە پەکەکە گەلە و بۆ بەدەستهێنانی مافەکانی کورد تێدەکۆشن، دەوڵەتی تورکیش دوژمنی هەموو کوردێکە، هەموو لایەنە سیاسییەکانیش لەبەردەم بەرپرسیارێتی مێژووییدان، نابێت ڕێگا بدەین ئەم پەیوەندییانە لەسەر بنەمای زیان گەیاندن بە بزوتنەوەی ڕزگاری خوازی گەلەکەمان بێت.
هەروەها حسێن کەرکوکی هاتنی شاندی سەربازی دەوڵەتی تورکی گرێدا بە دوو هۆکارەوە و وتی: تورکیا لە هێرش و پەلامارەکانی ڕابردووی بۆسەر پەکەکە و باشوری کوردستان شکستیهێناوە و ئەنجامی نەبووە، بۆیە دەیەوێت چیتر سوپاکەی بەتەنها نەخاتە ئەو شەڕەوە و عێراق و هەرێم-یش بەشداربکات، لایەنێکی دیکەی پەیوەندی بەو قەیرانانەوە هەیە کە لە ناوخۆ و جیهان توشیبووە، لە ڕووی سیاسی، ئابوری، دیپلۆماسی و پەیوەندییەوە، بۆیە لەگەڵ دەستبەکاربوونی ئیدارەی نوێی ئەمریکا دەیەوێت پەڕەیەکی نوێ هەڵبداتەوە لە پەیوەندییە ئابوری، سەربازی و سیاسییەکانی.
دەشڵێت: هەردوو لایەنەکە شکستی گەورەی دەوڵەتی تورک و پارتەکەی ئەردۆغان نیشاندەدات، ئەم هەوڵەشیان بێ ئەنجامدەبێت، چونکە حکومەتی هەرێم و عێراقیش خۆیان بە جۆرەها قەیران و ئاڵنگاریدا تێدەپەڕن و ئەو توانایان نییە هاوکاری تورکیا بکەن، ڕەنگە پەدەکە وەکو حزبی دەسەڵاتدار بەڵێنی بە تورکیا دابێت بەڵام مێژوو و ڕاستییەکان پێمان دەڵێت، لەناوبردنی پەکەکە خەیاڵێکە و قەت نابێتە ڕاستی، تاکە ڕێگاچارەی تورکیاش گەڕانەوەیە بۆ ئیمراڵی و دانوستانە لەگەڵ ڕێبەر ئاپۆ لەسەر پرۆسەی ئاشتی.
لە کۆتایشدا ئاماژەی بەوەدا: ئێمە وەکو تەڤگەری ئازادیی داوا لە سەرجەم لایەنەکانی دیکە دەکەین، کە هەڵویستی خۆیان ڕوونبکەنەوە، ئایا لەگەڵ پەدەکەدان و لە بەرەی دژ بە کورد و دژایەتیکردنی پارچەکانی دیکەن، یان لە دژین و لەسەر هێڵێ نەتەوەیین، چونکە بەرپرسیارێتییەکی مێژوویی و نەتەوەییان لە ئەستۆدایە.
س.ح
