هەینی, 21 سبت 2018 – 09:45 ڕۆژنیوز – ناوەندى هەواڵەکان
یەکێک لە کێشەکانى هەرێمى کوردستان، ئەو گرفتانەیە، کە لەنێوان هەرێمى کوردستان و حکومەتى ناوەندیدا هەیە، لەسەر پرسى نەوت و گازى سورشتى و بودجەى هەرێمى کوردستان و دەسەڵاتى خاڵە سنورى و فڕۆکەخانەکان و ناوچە جێناکۆکەکان، ئەو گرفتانەش بووەتە هۆى سەرهەڵدانى چەندین کێشەى سایى و ئابورى لە هەرێمى کوردستان.
لیستى بەرەو ئیسڵاح، کە لیستێکى هاوبەشى نێوان یەکگرتووى ئیسلامى کوردستان و بزوتنەوەى ئیسلامى کوردستان-ە، لە کارنامەکەیاندا دەڵێن، بۆ چارەسەرکردنى کێشەکانى نێوان هەرێم و بەغدا، کار دەکەن بۆ ڕێکخستنى پەیوەندییەکانى نێوان هەرێمى کوردستان و بەغدا، لەسەر بنەماى خاڵەکانى دەستور، هەروەها کاردەن بۆ ئەوەى دامەزراوەیەکى سەربەخۆى نیشتیمانى پێک بهێنن بۆ ئەوەى سەرپەرشتى گفتوگۆکانى هەرێم و بەغدا بکات.
بزوتنەوەى گۆڕان-یش، بە هەمان شێوەى لیستى بەرەو ئیسڵاح، جەخت لەوە دەکاتەوە ، کە کار دەکەن بۆ ئەوەى دامەزراوەیەکى نیشتیمان پێک بهێنن، بۆە ئەوەى پەیوەندییەکانى هەرێمى کوردستان و بەغدا، بە دامەزراوەیى بکات، پەرلەمانى هەرێمى کوردستان، بکاتە مەرجەعى بڕیاردان لەو پەیوەندییە.
مەبەستى هەردوو لیستەکە، لە بە دامەزراوەیى کردنى پەیوەندییەکانى نێوان هەرێم و بەغدا، هێنانە دەرەوەى گفتوگۆکانى نێوان هەرێم و بەغدا-یە لە دەستى یەکێتى و پارتى، چونکە هەتاوەکو ئێستا گفتوگۆکانى نێوان هەرێم و بەغدا، لەگەڵ نوێنەرانى یەکێتى و پارتى-دا کراوە و لایەنەکانى دیکە ئاگادارى ئەو گفتوگۆیانە نەبوون.
یەکێتى نیشتیمانى کوردستان و پارتى دیموکراتى کوردستان، بۆ چارەسەرکردنى کێشەکانى نێوان هەرێم و بەغدا، لە کارنامەکانیاندا، ئاماژە بەوەدەکەن، کە هەوڵدەدەن پێگەى کورد لە بەغدا بەهێز بکەن و بنەماى شەراکەت لە بەغدا بچەسپێنن، وە کێشەکانى نێوان هەرێم و بەغدا، لەڕێگەى دەستورەوە چارەسەر بکەن.
ئەمە لەکاتێکدایە کە هەردوو حزب لە سەروبەندى ئەنجامدانى ڕیفراندۆم-دا، دەیانوت،کە پێویستە ڕیفراندۆم ئەنجام بدەین و لە عێراق جیا ببینەوە، بەڵام لەدوى شکستهێنانى ڕیفراندۆم، هەردووکیان گەڕاونەتەوە بۆ چارەسەرکردنى کێشەکان لەڕێگەى بەغدا-وە، هەروەها یەکتر تۆمەتبار دەکەن بە لاوازکردنى پێگەى کورد لە عێراق-دا، یەکێتى دەڵێت، کە ڕیفراندۆم بووەتە هۆى ئەوەى پێگەى کورد لە عێراق لاواز بێت، پارتی-ش دەڵێت، کە خیانەتى ١٦ى ئۆتۆبەرى ساڵى ٢٠١٧ بووەتە هۆى ئەوەى پێگەى کورد لە بەغدا لاواز بێت.
کۆمەڵى ئیسلامى کوردستان و لیستى سەردەم و جوڵانەوەى نەوەى نوێ و لیستى ئازادى، بەشێوەیەکى ڕاستەوخۆ لە کارنامەکانیاندا باسیان لە چۆنیەتى چارەسەرکردنى کێشەکانى نێوان هەرێمى کوردستان و حکومەتى ناوەندى عێراق نەکردووە.
د.ع
