ڕۆژنیوز-بەغداد
لایەنگرانی مەهەپە لە شاری كەركوک، لەسەر دیوارەکانی ژووری بازرگانیی ئەو پارێزگایە دروشمەكانی پارتی بزوتنەوەی نەژادپەرەست (مەهەپە)یان نووسیوە و ئەمەش بە مەترسیی لەسەر ئایندەی پارێزگای كەركوک و پارێزگای موسڵ لێكدەدرێتەوە.
پارتی بزوتنەوەی نەژادپەرست (مەهەپە) ڕابەرایەتی بیری نەژادپەرستی دەكات لە توركیا، ڕۆژی نۆی شوباتی ١٩٦٩ دامەزارە و ئێستا خاوەنی ٤٨ كورسییە لە پەرلەمانی توركیا، دەوڵەت باخچەلی سەرۆكایەتی دەكات و پشتگیریی ئاکەپەی کرد بۆ پێكهێنانی حكومەتی توركیا.
لایەنگرانی مەهەپە دروشمیان لەسەر دیوارەکانی ژووری بازرگانی کەرکوک نووسیوە، ئەمەش بۆ وروژاندنی ناکۆکیی و ڕەگەزپەرستیی لەناو پارێزگای کەرکوکدا لێكدەدرێتەوە، كە بە شارێكی هەمەچەشنیی ئایینی و کلتووریی دەناسرێت، هاوکات کاردانەوەی بەدوای خۆیدا هێناوە.
ئەندامێکی هاوپەیمانی فەتح هۆشداریدا لەهەوڵەکانی تورکیا بۆ قوتدانی پارێزگای کەرکوک لەڕێگەی جۆراوجۆرەوە ئاماژە بەوە دەکات، کە لە پەرلەمانی نوێ داوادەکرێت دژی دەستێوەردانی زەقی تورکیا لە هەرێمی کوردستان کاربکات.
لەوبارەیەوە، محەمەد بەلەداوی، ئەندامی هاوپەیمانی فەتح بە ڕۆژنیوزی وت: توركیا خەون بە پارێزگای موسڵ و كەركوكەوە دەبینێت، لە درێژماوەدا تورکیا پارێزگای کەرکوک داگیردەکات ئەگەر حکومەتی عێراق دەستوەرنەكات بۆ وەستاندنی فراوانبوونی دڕندانەی تورکیا، بۆیە کەرکوک لە مەترسییەکی گەورەدایە.
دەشڵێت: جوڵەی تورکیا لەناو عێراق لە بێ ئاگاییەوە نییە، بەدڵنیاییەوە کەسایەتیی سیاسی ناوخۆیی هەیە کە پشتگیریی دەکەن.
هاوکات ئەحمەد شەریفی، شارەزای ئەمنی هۆشدارییدا، کە تورکیا بەدوای داگیرکردنی موسڵ و کەرکوکەیە و لە چەند ساڵی داهاتوودا بەپێی پەیمانێکی نێودەوڵەتیی کار بۆ لکاندنی ئەو پارێزگایانە بە تورکیا دەكات.
شەریفی نەیشاردەوە، كە “هێرشە تیرۆریستییەکانی تورکیا لە هەرێمی کوردستان بە هەماهەنگی لەگەڵ کەسایەتییە کاریگەرە سیاسییەکانی ناو عێراق بەڕێوەدەچێت”.
سەبارەت بە بڵاوکردنەوە و نووسینی دەستەواژە ڕەگەزپەرستەکان لە کەرکوک وتی: ئەمە شێوازێکی نوێی تورکە کە ئامانج لێی نانەوەی ئاژاوە و ململانێی نەتەوەییە، سوود لە دۆخی ناسەقامگیری سیاسی وەردەگرێت.
جەختیشیكردەوە، هێرشی سەربازیی تورکیا بۆ ناو عێراق بە پاساوی شەڕی پەکەکە درۆیە و ئامانجی سەرەکیی هەڵوەشاندنەوەی ئەو ڕێککەوتنەیە، کە موسڵ و کەرکوکی گەڕاندەوە بۆ عێراق.
لە كۆتایی قسەكانیدا تیشكی خستە سەر ڕێككەوتنی سەدام حسێن و توركیا و وتی: سەروەریی عێراق لەمەترسییەکی گەورەدا دەبێت و پێویستە عێراق بچێتە ناو پرۆسەیەکی دیپلۆماسییەوە بۆ ڕێگریکردن لەو پیلانە چەوسێنەرەوانەی توركیا، لەگەڵ هەڵوەشاندنەوەی ڕێککەوتنی عێراق و ڕژێمی سەدام، کە ڕێگەی داوە تورکەکان بەدرێژایی سنووری هاوبەش و ١٠ کیلۆمەتر بێنە ناو خاکی عێراقەوە.
س.س
