لەتیف فاتیح فەرەج: دەوڵەتی تورک هۆکاری نائارامییەکانی کەرکوکە

نووسەر و ڕۆژنامەنووس لەتیف فاتیح فەرەج، باس لە دۆخی ناوخۆی کەرکوک دەکات و پێیوایە، لە مێژووەوە تا ئەمڕۆ دەوڵەتی تورک نەیهێشتووە نەتەوەکانی کەرکوک پێکەوە بە ئارامی بژین، ئاماژە بەوەش دەکات، هەموو وڵاتان و سیستمی سەرمایەداریی ڕۆڵیان هەیە لە خراپیی دۆخی ژیان لە کەرکوکدا.


لەتیف فاتیح فەرەج نووسەر و ڕۆژنامەنووسی لە شاری کەرکوک، دەربارەی دەستێوەردانی وڵاتان بەگشتی و دەوڵەرتی تورک بەتایبەت، بۆ ڕۆژنیوز دەدوێت.

لەتیف فاتیح دەوڵەتی تورک بەهۆکاری کێشەی ناو پێکهاتەکانی کەرکوک دەزانێت، لەو بارەیەوە دەڵێت:"بەڕاستی بڵێم كەركوك بە درێژای مێژوو ئەوەی كە ناهیڵێت لە ناو شارەكەدا 'کورد، عەرەب و توركمان' بگەنە یەك و لە یەكتر تێبگەن، ئەوە دەوڵەتی تورک و و توركیایە، ڕاستە فارس و عەرەبەكانی دەوربەر ڕۆڵیان هەبووە، ڕاستە لە چەندین وڵاتەوە بە هۆی بۆری نەتەوە ستمەكاری گەروە و سەرمایەداری گەورەی دنیاش هەندێ كێشەیان لەم شارە ناوەتەوە، بەڵام ئەوەی بەردەوام لە سەردەمی عوسمانی و دوای سەردەمی عوسمانی ڕێگر بووە لەوەی نەتەوەکانی كەركوك بە زمانێكی هاوبەش قسە بكەن و بە یەكەوە بدوێن و ئازارەكانی یەكتر كەم بكەنەوە، ئەوە دەوڵەتی توركە".

ئەو نووسەرە وەها باس لە ئامانج و عەقڵییەتی دەسەڵاتداریی دەوڵەتی تورک دەکات "كێشەی گەورە لە عەقڵیەت و زهنیەتی دەوڵەتی توركیادایە، توركیا پێیوایە دەبێت ئەو خاوندارێتی لە جیهان بكات، بۆیە ئەم دۆخە پێوێستی بە شەڕێكی گەورەیە، شەڕێكی ئەخلاقی نا توندوتیژی، شەڕێكی ئەخلاقی بەرامبەر ئەم عەقڵیەت و زهنیەتە، شەڕی من باوڕم وایە ئەمەش پێویستی بە خەباتێكی گەورە هەیە، خەباتێك دەبێت دنیاش خەبەر بكەینەوە لە ئاستی، چونكە دونیاش خەوتووە لە ئاستی ئێمەدا".