لەسیمینارێكدا ڕەوشی ڕۆژئاوای كوردستان خرایە ڕوو

لەناوەندی غەزەلنووس لە شاری سلێمانی سیمینارێك بۆ هەریەك لە د.فاروق ڕەفیق و هاوژینی مەلا ئەمین ڕێكخرا تایبەت بە ڕەوشی ڕۆژئاوا و بەرگری شەڕڤانان لە شەڕی دژی داعش.


دوانیوەڕۆی ئەمڕۆ لە ناوەندی ڕۆشنبیری غەزەلنووس لە شاری سلێمانی، سیمینارێكی هاوبەش بۆ هەریەك لە د.فاروق ڕەفیق و هاوژینی مەلا ئەمین ڕێكخرا تیایدا دەرەنجامی گەشتێكیان خستە ڕوو كە بۆ ڕۆژئاوای كوردستان ئەنجامیان داوە و باسیان لەوەكرد میدیای كوردی نەیتوانیوە وەكو پێویست بارودۆخی ئەو بەشەی كوردستان بگوازێتەوە.

لەسەرەتای سیمینارەكەدا د.فاروق ڕەفیق ئەوەی خستە ڕوو كە میدیای باشور وێنەی ڕۆژئاوای كوردستان بەو شێوەیەی كە بینویانە نەگواستۆتەوە،  لە هەموو ڕووەكانەوە لەوێ چی ئەگوزەرێت بەتایبەتی خەباتی نەتەوەیی شەڕی شەڕڤانان دژ بە چەتەكانی داعش.

فاروق و ڕەفیق و هاوژین مەلا ئەمین باسیان لەوە كرد، مەبەستیان لە ڕۆشتن بۆ ڕۆژئاوای كوردستان ئەوە بووە كە ئەوەی میدیای كوردی لە باشور بەتایبەتی میدیای حزبی، باسیان نەكردوە و نەیان گواستوەتەوە، ئەوان باسی بكەن و وێنەیەك دەربارەی ئەو جەنگەی كە لە ڕۆژئاوای كوردستان ڕوویداوە بیگوازنەوە.

د. فاروق وتیشی:شەڕی داعش وەك جوگرافی تەواو بووە بۆ سەر كورد بەڵام وەك نەتەوە تەواو نەبوە چونكە توركیا و ئێران و هەر داگیركەرێكی تر داعشێكی ترە بۆ خاكی كوردستان، ئەو ئەزمونەی ڕۆژئاوای كوردستانیش پێویستی بە پشتگیری هەیە چونكە هێشتا جەنگ كۆتایی نەهاتوە و دەبێت داخستنی سنورەكان شەرمەزار بكرێت. 

ئەوەشی خستە ڕوو، هێشتا پاشماوەی داعش لەوێ ماوە كە ئەم شەڕە كۆتای هاتوە بەدەستی ١١ هەزار شەهیدی شەڕڤانان و مەدەنی و ٢٤ هەزار بریندار بووە، ئەوەی من لەوێ بینم نەمزانی كێ سەركردەیە و كێ پلەیەكی بەرزتری هەیە هەمووی وەك یەك سەیر دەكرێن بە ژن و پیاوە و بە گەورە و بچوكیانەوە.

هاوكات هاوژین مەلا ئەمین ئەوەی خستە ڕوو  كە ژن لە ڕۆژئاوای كوردستان سەركردایەتییەكی بەرزی هەیە و هەزاران كەس بەڕێوە دەبات شان بەشانی پیاوان لە شەڕەكاندابوون و لە هاوسەرۆكایەتی دا بەشداریان كردوە چونكە متمانەیان بەو ئەزموونە هەیە كە دەبێت تێیدا بەشداری بكەن. 

هاوژین مەلا ئەمین وتیشی: لە باشور ژن وەك بوكەڵەیەك وایە كە لەناو كۆڕەكان و پۆستەكاندا بمێنتەوە ئەگەر بشتوانێت كارێك بكات ڕێگەی پێنادرێت.
 
لەكۆتایی سیمینارەكەدا ئامادەبووان بەسەرەنج و قسەكانیان بەشدارییان لەگفتوگۆیەكی چڕ لەبارەی ڕەوشی ڕۆژئاوای كوردستان كرد.

 

د.ح