لەهەڵەبجە و كەركوك یادی ٣١ ساڵەی تاوانی ئەنفال كرایەوە

لەمۆنۆمێنتی هەڵەبجە و گوندی تۆپزاوای سەر بە پارێزگای كەركوك بەچەند چالاكییەك یادی ٣١ ساڵەی تاوانی ئەنفال كرایەوە، كەسوكاری ئەنفالكراوەكانیش جەختدەكەنەوە، كە هەرێم و بەغداد تا ئێستا نەیانتوانیووە برینی قوربانیانی ئەنفال ساڕێژبكەن.


ئەمڕۆ بەدروشمی سۆزێك بۆ ئەنفال، بەڕێوەبەرایەتی پەروەردەی هەڵەبجە، بەهاوبەشی بەڕێوەبەرایەتی گشتی شەهیدان و ئەنفالكراوان، بەبۆنەی ٣١مین ساڵیادی تاوانی ئەنفال چەند چالاكیەكی لەناو مۆنۆمێنتی هەڵەبجە ئەنجامدا.

لەسەرەتای چالاكییەكاندا لەلایەن خوێندنگای ئایندە و شەهیدانی خێڵی حەمە نمایشێكی شانۆیی پێشكەشكرا، هەروەها پارچە گۆرانیەكی تایبەت بەو تاوانە پێشكەشكران و پێشانگایەكی شێوەكاریش بۆ خوێندكارانی سەنتەری چالاكی گەنجانی هەڵەبجە و منداڵپارێزی كوردستان كرایەوە.

لەمەراسیمەكەدا كە ژمارەیەك لەكەسوكاری ئەنفالكراوان تێیدا ئامادەبوون سەبریە محەمەد، كە دایكی سێ‌ كچ و كوڕێكی ئەنفالكراوە ڕەخنەی توندی لە لەحكومەتی هەرێم و ناوەند گرت و لە لێدوانێكدا بە ڕۆژنیوزی وت: كوڕێك و سێ‌ كچم ئەنفالكراون، كوڕێكی دیكەشم بەخەفەتی ئەوانی دیكەوە مردن، "كوڕەكەم دەرچووی كۆلێژی پزیشكی بوو دووەم ساڵی بوو لەبەغداد، دوو كچەكەشم خوێندكاری چوار و پێنجی ئامادەیی بوون ئەنفالكران".

ئەو دایكە خاوەن ئەنفالە وتیشی"گلەیی بێت لەحكومەتی هەرێم و بەغدا، ماوەی ٣٠ ساڵە نوسراویان پێدەدەم تائێستا كەسێك وەڵامی نەداومەتەوە هیچمان بۆ نەكراوە".

 

هەر ئەمڕۆ كاتژمێر ۱۰ و نیوی پێشنیوەڕۆ، لە گوندی تۆپزاوای شاری كەركوك، بەبەشداری كەسوكاری ئەنفالكراوان و نوێنەرانی حیزبە كوردستانییەكان یادی٣١ ساڵەی تاوانی ئەنفال كرایەوە.

سەرەتای یادەكە بە خولەكێك وەستان بۆ گیانی شەهیدان دەستی پێكرد، دواتر وتاری، بەڕێوەبەرایەتی كاروباری شەهیدانی كەركوك خوێندرایەوە، پاشان هۆشیار عەبدولڕەحمان، وتاری حزبە كوردستانیەكانی خۆێندەوە و ڕایگەیاند "لەم یادە نەگریسەدا كە ڕژێمی بەعس ۱٨۲ هەزار كەسی ئەنفال كرد، دوای ۳۱ ساڵ تا ئێستا برینی جەستەی گەلی كورد ساڕێژ نەبووە و ساڕێژ نابێت".

وتیشی: "لێرەوە داوا لە هێز و حزب و لایەنە سیاسیەكان دەكەین، ببنە خاوەنی یەك گوتاری هاوبەش بۆی ئەوەی هەمووان زامی كەسوكاری شەهیدان ساڕێژ بكەین".

دوابەدوای ئەوەش تاجە گوڵینە لەسەر گڵكۆی شەهیدان دانرا.

 

گوندی تۆپزاوە دەكەوێتە باشوری كەركوك، لە ساڵی ۱۹٨٨ ئەو ناوچانەی كەركوك كە بەرشاڵاوی ئەنفال كەوتن دەگوازرانەوە ئەو گوندە كە بنكەی سەربازی لێبوو و لەوێشەوە بۆ زیندانی نوگرە سەلمان دەگوازرانەوە، لە ئێستاشدا ڕووفاتی ٨۱ ئەنفالكراوی كورد لەو سەربازگەیەماوە.

ك.س