بەشێک لە دانیشتووانی شارۆچکەی چەمچەماڵ دژی نەبوونی خزمەتگوزاری و گرانی نرخی بەنزین و جیاوازی نرخەکەی لەگەڵ سەرجەم شارەکانی دیکەی عێراق و هەولێر و دهۆک دەستیان بەخۆپیشاندان کرد.
دوانیوەڕۆی ئەمڕۆ لە شارۆچکەی چەمچەماڵی سەر بەشاری سلێمانی ژمارەیەک لە سۆفێران و هاوڵاتیان دەستیان بە خۆپیشناندان کرد دژی نەبوونی خزمەتگوزاری و ئاو کارەبا و گرانی نرخی بەنزین و جیاوازی نرخەکەی لەگەڵ هەولێر و دهۆک.
خۆپیشاندەران لەنزیک چێشتخانەی سیروان، دەستیان بە خۆپیشاندان کرد و ڕێگای سەرەکی کەرکوک ـ سلێمانیان داخستووە و ڕێگا نادەن کەس هاتووچۆ بکات.
ئەوەش لە دوای ئەوە هات کە مەسرور بارزانی بڕیایردا دوو ملیۆن لیتر بەنزین بۆ هەولێر و دهۆک دابین بکات بە نرخی ٨٠٠ دینار بدرێت بە هاوڵاتیان، بەڵام تا ئێستا هیچ بڕیک لەو بەنزینە بۆ سلێمانی و هەڵەبجە دیاری نەکراوە.
لە ئێستادا بەنزینی حکومەتی عێراقی بە ٦٩٠ دینار دەدریتە هاوڵاتیانی دهۆک و هەولێر و بەنزینی حکومەتی هەریم بە ٨٠٠ دینار، بەڵام لە سنوری سلێمانی هیچ یەکێک لەو بەنزینانە بونیان نییە و لیتری بەنزینیش هەرزانەکەی بە ١٢٠٠ دینارە.
ها-غ
