لە ئامەد و ئیستەنبوڵ ٢٢ کەس دەستگیر کران

لە ئەنجامی ئۆپراسیۆنێکی پۆلیسی دەوڵەتی تورک لەهەر یەک لە شارەکانی ئامەد و ئیستەنبول ٢٢ کەس دەستگیر کران و بڕیاری گرتنیش بۆ ٤٥ کەسی دیکە لە ئیستەنبوڵ دەرچوو.


ئۆپراسیۆنەکانی قڕکردنی سیاسی لەلایەن دەسەڵاتدارانی ئاکەپە – مەهەپە وە بەردەوامن، لەم چوارچێوەیەدا ئەمڕۆ لە ئیستەنبوڵ ١٥ کەس و لە ئامەد ٧ کەس دەستگیر کران و بڕیاری گرتنیش بۆ ٤٥ کەسی تر دەرچوو.

ئیستەنبوڵ

سەر لە بەیانی ئەمڕۆ لە شاری ئیستەنبوڵ پۆلیس و هێزە ئەمنیەکان لە یەک کاتدا هەڵیان کوتایە سەر چەندین ماڵ و ١٥ کەسیان دەستگیر کرد و بە پێی زانیاریەکان یەکێک لە دەستگیرکراوەکان منداڵ بووە، لەهەمان کاتدا بڕیاری گرتن بۆ ٤٥ کەسی دیکەش دەرچووە.

 ئامەد

پۆلیس و هێزە ئەمنیەکان لە شاری ئامەدیش بەهەمان شێوە لەیەککاتدا هەڵیان کوتایە سەر چەندین ماڵ، لە ئۆپراسیۆنی قڕکردنی سیاسیدا، هەر یەک لە محمد یاڵچین بەڕێوەبەری ڕێکخستنی (هەدەپە) و عەڵادین زوگورلی و سەڤیجان یاشار ئەندامانی ئەنجومەنی شارەوانی یەنی شەهیر و حیکمەت ئالتوگ و سەنگول داغ کاپانجی ئەندامانی ئەنجومەنی شارەداری ناوچەی پەیاس، ئایسەل توفان ئەندامی دەستپێشخەری دایکانی ئاشتی، کەنان جانپۆڵات ڕاوێژکاری سەمیرا گوزەلی ئەندام پارلەمانی (هەدەپە) دەستگیرکران.

د.ع