ئێوارەی دوێنێ، لە گوندی زنجیرەی سەرو لە ناوچەی شیروان چەرداوڕ سەربە پارێزگای ئیلام لە ڕۆژهەڵاتی کوردستان، تانکەرێکی هەڵگری غازی کلۆرین تەقیوەتەوە.
بەپێی زانیارییەکان، تا ئێستا لە ئەنجامی تەقینەوەی ئەو تانکەرەدا، ٢١٧ هاوڵاتی گوندی زنجیرەی سەرو ژەهراویبوون و گوازراونەتەوە بۆ نەخۆشخانەکانی پارێزگای ئیلام.
بەپێی ئەو زانیاریانەی یەکێک لە هاوڵاتیانی گوندەکە بە ڕۆژنیوزی داوە، شۆفێڕی تانکەرە بارهەڵگرەکە، ئەو غازەی لە تەبرێزەوە بۆ عێراق بردووە و بۆ ئەوەی چەند ڕۆژێک لەسەر سنووری مێهران ماوە، بۆ سەردانکردنی خزمێکی هاتووەتە گوندەکە.
تا ئێستا هۆکاری تەقینەوەی ئەو تانەکرە غازە نەزاندراوە، بەپێی لێدوانی بەرپرسانی تەندروستی پارێزگای ئیلام، هیچ هاوڵاتییەک لە ئەنجامی ژەهراویبوون بەو غازە گیانی لەدەست نەداوە، بەڵام دوترێت دۆخی تەندروستی هەندێک لە هاوڵاتییە ژەهراویبووەکان ناجێگیرە.
ب.ک
